मंजूर सुट्टीच्या दिवशीही मीटिंगचा आग्रह; बॉसच्या धमकीने तरुण कर्मचारी अडचणीत

सुट्टीच्या दिवशी तरी ऑफिसचा त्रास नको, असं कामावर जाणाऱ्या प्रत्येकाला वाटतं. अशाच एका तरुणाने आपली अडचण Reddit वरच्या Toxic Workplace नावाच्या ग्रुपवर लिहिली आणि ती पोस्ट सध्या चांगलीच चर्चेत आली आहे.

या तरुणाने कित्येक महिन्यांपूर्वी सुट्टीसाठी अर्ज केला होता. कंपनीने ती सुट्टी मंजूरही केली होती. या सुट्टीत निवांत राहायचं, कामाचं टेन्शन घ्यायचं नाही, असं त्याने ठरवलं होतं.

सुट्टीला एक-दोन दिवस उरले असतानाच बॉसचा त्याला मेसेज आला. सुट्टीच्या दिवशी एक महत्त्वाची ऑनलाइन मीटिंग आहे आणि ती अटेंड करावीच लागेल, असं बॉसने सांगितलं. त्यावर कर्मचाऱ्याने नम्रपणे उत्तर दिलं की साहेब, माझी सुट्टी आधीच मंजूर झाली आहे आणि त्या दिवशी मला कामापासून लांब राहायचं आहे.

हे ऐकून बॉस चिडला, असं तरुणाने लिहिलं आहे. बॉसने त्याला बाजूला बोलावलं आणि तू टीमचा विचार करत नाहीस, तू सहकार्य करत नाहीस, असं म्हटलं. तू मीटिंगला आला नाहीस, तर पुढच्या महिन्यात होणाऱ्या परफॉर्मन्स रिपोर्टमध्ये मी त्याची नोंद करीन, असंही बॉसने सांगितलं. एका प्रकारे ही धमकीच होती.

आता हा कर्मचारी पुरता अडकला आहे. मीटिंगला गेला नाही तर कामावर परिणाम होईल आणि गेला तर सुट्टी घेतल्याचा अर्थच काय राहिला, असा प्रश्न त्याला पडला आहे. मला खूप असहाय वाटत आहे, असं त्याने पोस्टमध्ये लिहिलं आहे. सुट्टीत लॉगिन केलं तर ती सुट्टीच राहणार नाही, असंही तो म्हणतो. असं वागणं योग्य आहे का, बॉस असा वागू शकतो का आणि इतर कोणाला असा अनुभव आला आहे का, असे प्रश्नही त्याने विचारले आहेत.

ही पोस्ट 2200 पेक्षा जास्त लोकांनी पाहिली आहे आणि त्यावर कमेंटचा पाऊस पडला आहे. बऱ्याच जणांनी त्या कर्मचाऱ्याची बाजू घेतली. आजकाल कंपन्या फक्त काम बघतात, कर्मचाऱ्याच्या आयुष्याचा विचार करत नाहीत, असा या प्रतिक्रियांचा सूर आहे.

एका युजरने सल्ला दिला की थेट एचआरला मेल कर. बॉस जे काही बोलला ते सगळं लिहून पाठव आणि कंपनीचं सुट्टीबद्दलचं धोरण नेमकं काय आहे ते विचार. एखादी इमर्जन्सी असेल तर ठीक आहे, पण प्रत्येक सुट्टीत असं होत असेल तर ते चुकीचंच आहे, असं त्याने म्हटलं.

दुसऱ्या एका युजरने आपल्या ऑफिसचा अनुभव सांगितला. त्याच्या मते त्याच्या ऑफिसमधल्या एचआरने अशा बॉसला चांगलंच सुनावलं असतं. चांगल्या कंपनीत एचआर कर्मचारी आणि कंपनी, दोघांचाही विचार करून निर्णय घेते, असं तो म्हणाला.

तिसऱ्या एका व्यक्तीने सांगितलं की त्याने आईच्या तब्येतीसाठी कामाच्या वेळेत बदल मागितला होता. जास्त काम करायची तयारीही त्याने दाखवली होती, तरीही त्याचा मॅनेजर नाखूष होता. पण त्याने एचआरला त्या मेलमध्ये घेतलं, तेव्हा त्याचं काम लगेच झालं, असं त्याने कमेंटमध्ये लिहिलं.