विक्रोळी स्टेशनवर लोकलसमोर रुळांवर उभ्या तरुणाला मित्राने खेचले, व्हिडिओ व्हायरल

मुंबईतील विक्रोळी रेल्वे स्थानकावर आज सकाळी एक धक्कादायक घटना घडल्याचा व्हिडिओ सोशल मीडियावर व्हायरल होत आहे. या व्हिडिओमध्ये समोरून भरधाव लोकल येत असताना एक तरुण रेल्वे रुळांवर उभा असल्याचे दिसते. हा व्हिडिओ पाहून अनेकांना धक्का बसला आहे.

व्हायरल व्हिडिओमधील माहितीनुसार, तो तरुण रेल्वे रुळांवर जाऊन उभा राहिला होता. त्याचवेळी त्याचा मित्र त्याला वाचवण्यासाठी तातडीने धावला. लोकल जवळ येण्याआधीच त्याने तरुणाला रुळांवरून बाजूला खेचले. मित्राने प्रसंगावधान राखल्यामुळे संभाव्य मोठा अनर्थ टळला. मित्राच्या या धाडसी कृतीमुळे तरुणाचा जीव वाचल्याचे व्हिडिओत दिसत आहे.

या घटनेतला सर्वात धक्कादायक भाग पुढचा आहे. तरुणाला रुळांवरून बाजूला काढल्यानंतरही तो पुन्हा रुळांच्या दिशेने जाण्याचा प्रयत्न करत असल्याचे व्हिडिओमध्ये दिसून येते. त्यामुळे या सगळ्यामागे नेमके काय कारण आहे, असे प्रश्न लोक विचारत आहेत. मात्र, या घटनेमागील नेमके कारण अजूनही स्पष्ट झालेले नाही.

सोशल मीडियावरील एका पोस्टमध्ये असा दावा करण्यात आला आहे की, हा तरुण चालत्या ट्रेनखाली आत्महत्येचा प्रयत्न करत होता आणि त्याच्या मित्राने त्याचा जीव वाचवला. हा दावा अधिकृतपणे पुढे आलेला नाही. तसेच हा व्हिडिओ विक्रोळी रेल्वे स्थानकावरचा असल्याचाही दावा सोशल मीडियावर केला जात आहे.

घटनेची अधिक माहिती मिळावी म्हणून कुर्ला रेल्वे पोलिसांच्या वरिष्ठ पोलीस निरीक्षकांशी संपर्क साधण्याचा प्रयत्न करण्यात आला. पण त्यांच्याशी संपर्क होऊ शकला नाही. त्यामुळे घटना नेमकी कधी घडली, त्या तरुणांची ओळख काय आणि यामागचे कारण काय, याबद्दल अधिकृत माहिती अजून उपलब्ध झालेली नाही. रेल्वे पोलिसांकडून या प्रकरणाच्या तपासाची प्रतीक्षा आहे.

दरम्यान, सोशल मीडियावर व्हायरल होत असलेल्या या व्हिडिओमुळे रेल्वे स्थानकांवरील प्रवाशांच्या सुरक्षेचा प्रश्न पुन्हा ऐरणीवर आला आहे. पोलिसांकडून अधिकृत माहिती मिळाल्यानंतरच या घटनेबाबत अधिक स्पष्टता येईल.