दिल्लीत शाळेतच बारावीच्या विद्यार्थिनीने स्वतःला पेटवून घेतले; बॅगेत तीन पानांची सुसाईड नोट सापडली

दिल्लीच्या कृष्णा नगर भागातील एका शाळेत इयत्ता बारावीत शिकणाऱ्या विद्यार्थिनीने स्वतःला पेटवून घेऊन आत्महत्या केल्याचे उघडकीस आले आहे. शाळेच्या गार्ड रूमच्या मागे तिचा मृतदेह आढळला. या प्रकारामुळे संपूर्ण परिसरात घबराट पसरली आहे.

दिल्ली पोलिसांनी सांगितले की, शनिवारी कृष्णा नगर पोलीस स्टेशनला एका शाळेतून आग लागल्याचा पीसीआर कॉल आला. आगीची माहिती मिळताच पोलीस घटनास्थळी पोहोचले, तेव्हा त्यांना गार्ड रूमच्या मागे एक मुलगी भाजलेल्या अवस्थेत दिसली. तिला तात्काळ रुग्णालयात नेण्यात आले. पण उपचार सुरू होण्यापूर्वीच तिचा मृत्यू झाला होता आणि डॉक्टरांनी तिला मृत घोषित केले. ती अंदाजे १८ वर्षांची होती. तिची बॅगही जळालेल्या अवस्थेत होती. घटनास्थळावरून काही साहित्य आणि तिची शाळेची बॅग जप्त करण्यात आली आहे.

पोलिसांना तिच्या बॅगेत तीन पानांची सुसाईड नोट सापडली. त्या नोटमध्ये तिने आपण आई-वडिलांच्या अपेक्षा पूर्ण करू शकलो नाही, असे लिहिले होते. तसेच तिच्या एका मैत्रिणीने दुसऱ्या मुलीशी बोलल्याचा उल्लेखही त्या नोटमध्ये होता. नोटमध्ये एका मुलाचाही उल्लेख असल्याने पोलीस प्रेमप्रकरणाच्या शक्यतेचाही तपास करत आहेत. मुलीच्या बॅगेत काही ज्वलनशील पदार्थ आढळल्याचेही पोलिसांनी सांगितले.

पोलिसांच्या माहितीनुसार, सहाव्या तासानंतर ती क्लास पास घेऊन पाणी प्यायला गेली होती. दोन-तीन मिनिटांनी तिच्या किंकाळ्या ऐकू आल्या. ती पाण्याच्या टाकीजवळ पूर्णपणे जळालेल्या अवस्थेत सापडली. पोलिसांच्या मते, तिने काहीतरी रसायन पिऊन आत्महत्या केली. ही विद्यार्थिनी मूळची गोंडली गावची रहिवासी होती. ती दिल्लीत आपल्या बहिणीसोबत राहत होती आणि तिचे आई-वडील गावातच राहतात.

पोलिसांनी मृतदेह ताब्यात घेतला असून तो शवविच्छेदनासाठी पाठवण्यात आला आहे. घटनास्थळाची पाहणी करण्यासाठी आणि पुरावे गोळा करण्यासाठी गुन्हे शाखेच्या पथकाला बोलावण्यात आले होते. तसेच घटनास्थळी एफएसएल (FSL) पथकाकडून तपासही करण्यात आला. घटनास्थळी असलेले पोलीस पथक या घटनेला कारणीभूत ठरलेल्या परिस्थितीचा तपास करत असून पुढील तपास सुरू आहे.

घटनेची माहिती मिळताच दिल्ली सरकारचे मंत्री आशिष सूद यांनी शाळेला भेट देऊन घटनास्थळाची पाहणी केली. ते म्हणाले, "पोलीस या प्रकरणाचा तपास करत आहेत. शाळेने पोलिसांना सर्व पुरावे दिले आहेत. ही एक दुःखद घटना आहे. तपास पूर्ण झाल्यावर सर्व माहिती दिली जाईल."