दीक्षाभूमी, ड्रॅगन पॅलेस परिसरात २२ ऑक्टोबरपर्यंत वाहतुकीत बदल; ११ ठिकाणी पार्किंग

धम्मचक्र प्रवर्तन दिनाच्या ७० व्या वर्धापनदिनानिमित्त मंगळवारी, २० ऑक्टोबर रोजी दीक्षाभूमी आणि कामठी येथील ड्रॅगन पॅलेस येथे लाखो बौद्ध अनुयायी येण्याची शक्यता आहे. एवढी गर्दी होणार असल्याने वाहतूक सुरळीत राहावी म्हणून नागपूर शहर वाहतूक पोलिसांनी विशेष व्यवस्था केली आहे.

दीक्षाभूमी परिसरातील अनेक प्रमुख मार्गांवर १८ ऑक्टोबर रोजी सकाळी ९ वाजल्यापासून २२ ऑक्टोबर रोजी रात्री १० वाजेपर्यंत वाहनांवर निर्बंध राहतील. ड्रॅगन पॅलेस परिसरात वाहतुकीतील बदल १९ ते २२ ऑक्टोबरदरम्यान लागू राहतील.

काचीपुरा चौक ते माताकचेरी चौक, काचीपुरा चौक ते रामदासपेठेतील कल्पना बिल्डिंग टी-पॉइंट, माताकचेरी चौक ते कृपलानी टर्निंग, माताकचेरी चौक ते नीरी रोड टी-पॉइंट आणि माताकचेरी चौक ते लक्ष्मीनगर चौक या मार्गांवर दोन्ही बाजूंनी वाहतुकीला प्रतिबंध असेल. काचीपुरा चौक ते बजाजनगर चौक हा मार्ग शहर आणि एसटी बससाठी राखीव ठेवला जाणार आहे.

अनुयायांच्या वाहनांसाठी ११ ठिकाणी पार्किंगची सोय केली आहे. ही ठिकाणे अशी: धरमपेठ सायन्स कॉलेज, राणी लक्ष्मीबाई सभागृह, तारकुंडे धरमपेठ हायस्कूलचे मैदान, धरमपेठ कॉलेजचे मैदान, बजाजनगर व्हॉलीबॉल मैदान, मॉडर्न हायस्कूल (नीरी), लक्ष्मीनगर झोन कार्यालय, एलएडी कॉलेज, कृपलानी चौक ते अजनी रेल्वे पूल यांच्यामधला नवीन विकास आराखडा रस्ता, मूक-बधिर विद्यालय (शंकरनगर चौक) आणि इंदिरा गांधी रुग्णालयामागील महापालिकेचे मैदान.

दीक्षाभूमी परिसरात राहणाऱ्यांना तसेच कार्यालयात जाणाऱ्या नागरिकांना लागणारे प्रवेश पास वर्धा रोडवरील सोनेगाव वाहतूक परिमंडळाच्या पोलीस निरीक्षकांकडून किंवा सोनेगाव पोलीस ठाण्यातून मिळू शकतील. बंदोबस्तावरील वाहतूक पोलीस अधिकाऱ्यांना परिस्थितीनुसार वाहतूक व्यवस्थेत बदल करण्याचे अधिकार दिले आहेत.

जनता चौकातून काचीपुरा चौकमार्गे बजाजनगरकडे जाणाऱ्या वाहनचालकांनी पंचशील चौक, झाशी राणी चौक, लायब्ररी चौक आणि अलंकार चौक या मार्गाने जावे. पर्यायी मार्ग म्हणून जनता चौक, कल्पना बिल्डिंग टी-पॉइंट, लायब्ररी चौक, अलंकार चौक आणि शंकरनगर चौक या मार्गानेही जाता येईल.

वर्धा रोडवरून कृपलानी टर्निंग आणि माताकचेरी चौकाकडे जाणाऱ्या वाहनांनी अजनी मेट्रो स्थानकावरून डावीकडे वळून आरपीटीएस मार्ग घ्यावा. जनता चौकातून कृपलानी टर्निंगमार्गे माताकचेरी चौकाकडे जाणाऱ्यांनी वर्धा रोड, अजनी पूल चौक, हिंदुस्तान कॉलनी चौक, यू-टर्न आणि अजनी मेट्रो स्थानकावरून आरपीटीएस मार्गाने जावे.

अलंकार टॉकीज चौकातून काचीपुरा चौकाकडे जाणारी वाहने नॉर्थ अंबाझरी मार्ग, शंकरनगर चौक, विद्यापीठ लायब्ररी चौक आणि झाशी राणी चौकमार्गे वळवली जातील. लक्ष्मीनगर चौकातून माताकचेरी चौकाकडे जाणाऱ्यांनी आठ रस्ता चौकाचा वापर करावा. नीरी टी-पॉइंटवरून माताकचेरी चौकाकडे जाणाऱ्यांनी आरपीटीएस आणि अजनी चौकाचा वापर करावा. बजाजनगर चौकातून लक्ष्मीनगर चौकाकडे जाणाऱ्या वाहनांना व्हीएनआयटी चौक आणि अभ्यंकरनगरमार्गे जावे लागेल.

कामठीतील ड्रॅगन पॅलेसमध्ये येणाऱ्या अनुयायांची संभाव्य गर्दी लक्षात घेऊन १९ ते २२ ऑक्टोबरदरम्यान पोरवाल कॉलेज रोडवरील वाय-पॉइंट ते भोयर कॉलेज टी-पॉइंटदरम्यान सर्व प्रकारच्या वाहनांना प्रतिबंध असेल. कुंभारे कॉलनी, आझादनगर, लुंबिनीनगर आणि छत्रपतीनगर परिसरातील रहिवाशांनी तसेच या मार्गाने ये-जा करणाऱ्या वाहनचालकांनी घोरपड टी-पॉइंट, शासकीय आयटीआय कॉलेज आणि रामनगर उड्डाणपुलामार्गे जयस्तंभ चौकाकडे जावे. पर्यायी मार्ग म्हणून जुनी सुरंग पुलिया, जेपन रोड, नवीन भूमिगत सुरंग, अजनी आणि गादा गावमार्गे नीरी पुलियापर्यंत जाता येईल.

तेथून उजवीकडे वळून हैदराबाद महामार्गावर जावे. लिहिगाव पुलियाखालील मार्गाने घोरपड रोड आणि घोरपड टी-पॉइंट गाठून डॉ. बाबासाहेब आंबेडकर चौकाकडे जाता येईल. तेथून उजवीकडे वळून छत्रपतीनगर, रविदासनगर, कुंभारे कॉलनी आणि आझादनगरकडे जाण्याची व्यवस्था करण्यात आली आहे. वाहनचालकांनी वाहतूक पोलिसांच्या सूचनांचे पालन करून पर्यायी मार्गांचा वापर करावा, असे आवाहन करण्यात आले आहे.