धम्मचक्र अनुप्रवर्तन दिनानिमित्त आमदार किशोर जोरगेवार यांचे दीक्षाभूमीवर डॉ. बाबासाहेब आंबेडकर यांना अभिवादन

धम्मचक्र अनुप्रवर्तन दिनाचे औचित्य साधून आमदार किशोर जोरगेवार यांनी चंद्रपूर येथील पवित्र दीक्षाभूमीवर जाऊन महामानव, भारतीय संविधानाचे शिल्पकार भारतरत्न डॉ. बाबासाहेब आंबेडकर यांना विनम्र अभिवादन केले. डॉ. बाबासाहेब आंबेडकर यांनी दिलेला समता, स्वातंत्र्य, बंधुता आणि न्याय हा विचार समाजाला नेहमीच प्रेरणा देणारा आहे, असे यावेळी सांगण्यात आले.

त्यांच्या विचारांचा स्वीकार करून समतेवर आधारलेला आणि न्याय्य समाज घडवण्यासाठी प्रत्येकाने आपले योगदान द्यावे, असे आवाहनही या निमित्ताने करण्यात आले.

धम्मचक्र अनुप्रवर्तन दिन हा भारताच्या इतिहासातील सामाजिक बदलाचा महत्त्वाचा दिवस आहे. १६ ऑक्टोबर १९५६ रोजी चंद्रपूर येथील दीक्षाभूमीवर डॉ. बाबासाहेब आंबेडकर यांनी बौद्ध धम्माची दीक्षा दिली. या ऐतिहासिक घटनेमुळे देशातील सामाजिक आणि वैचारिक बदलाला नवी दिशा मिळाली. विषमता, अन्याय आणि सामाजिक भेदभाव यांच्याविरुद्ध संघर्ष करताना बाबासाहेबांनी मानवतावाद, समता आणि बंधुता यांचा संदेश दिला. त्यांच्या या विचारांचा वारसा पुढच्या पिढ्यांपर्यंत पोहोचवणे ही प्रत्येकाची जबाबदारी आहे, असेही सांगण्यात आले.

दीक्षाभूमीच्या सर्वसमावेशक विकासासाठी आपण कटिबद्ध आहोत, असे आमदार किशोर जोरगेवार यावेळी म्हणाले. तेथील विकासकामांना लवकरच सुरुवात होणार असून त्यासाठी मोठा निधी मंजूर करण्यात आला आहे, असेही त्यांनी सांगितले. समाजाला अपेक्षित असा विकास आपण येथे करणार आहोत, असेही ते म्हणाले.

चंद्रपूर येथील दीक्षाभूमीवर धम्मचक्र अनुप्रवर्तन दिनानिमित्त दरवर्षी विविध भागांतून लाखो अनुयायी येतात. मात्र, इतक्या मोठ्या संख्येने येणाऱ्या अनुयायांसाठी विश्रामाची पुरेशी व्यवस्था नसल्याने त्यांना अनेकदा गैरसोयींचा सामना करावा लागतो. ही अडचण लक्षात घेऊन अनुयायांसाठी विश्रामाची व्यवस्था करावी, अशी मागणी करण्यात आली होती.

या मागणीनुसार आमदार किशोर जोरगेवार यांच्या वतीने दीक्षाभूमी परिसरातील कृषी कार्यालयाजवळ भव्य मंडप उभारण्यात आला आणि दूरवरून आलेल्या अनुयायांसाठी विश्रामाची सोय करण्यात आली. धम्मचक्र अनुप्रवर्तन दिनानिमित्त दीक्षाभूमीवर येणाऱ्या अनुयायांना विश्रांतीसाठी योग्य जागा मिळावी आणि त्यांची गैरसोय कमी व्हावी, हा या व्यवस्थेमागचा उद्देश होता.

याशिवाय धम्मचक्र अनुप्रवर्तन दिनानिमित्त दीक्षाभूमीवर येणाऱ्या अनुयायांसाठी भारतीय जनता पार्टी चंद्रपूर महानगरच्या वतीने पुरी-भाजीचे वाटप करण्यात आले. दूरवरून आलेल्या अनुयायांना जेवण मिळावे, या उद्देशाने हा उपक्रम राबवण्यात आला.