कोलकात्यातील चोरबागान येथे दुर्गा पूजा मंडपात चेंगराचेंगरी, 19 जणांचा मृत्यू

पश्चिम बंगालच्या कोलकाता येथील चोरबागान भागातल्या दुर्गा पूजा मंडपात झालेल्या चेंगराचेंगरीत 19 जणांचा मृत्यू झाला आहे. या घटनेत 25 हून अधिक लोक जखमी झाले आहेत. आतापर्यंत मृतांची संख्या 19 असल्याचे सांगण्यात आले आहे.

ही घटना शनिवारी सायंकाळी 7.40 वाजता गिरीश पार्क पोलीस ठाण्याच्या हद्दीत घडली. कोलकाता पोलिसांनी या घटनेतील जखमींना मेडिकल कॉलेज आणि इतर रुग्णालयांत पोहोचवले. जखमींची भेट घेण्यासाठी केंद्रीय गृहमंत्री अमित शाह आणि मुख्यमंत्री शुभेंदू अधिकारी हे दोघे पोहोचणार असल्याचीही माहिती आहे.

या गर्दीत सापडलेल्या 25 वर्षांच्या एका तरुणाने त्या क्षणांची आपबीती सांगितली. तो आपल्या आईसोबत दुर्गा पूजा पाहण्यासाठी गेला होता. तेवढ्यात अचानक मुसळधार पाऊस सुरू झाला. बाहेर पाऊस पडत असल्याने मंडपातून बाहेर पडायला कोणालाच नको होते. पावसापासून वाचण्यासाठी प्रवेशद्वारावर उभे असलेले लोक आत जाण्यासाठी धक्काबुक्की करत होते. थोड्याच वेळात गर्दी इतकी वाढली की आत असलेले लोक एकमेकांवर पडू लागले.

तो तरुण म्हणाला की तो गर्दीत खाली दबला गेला होता. कसाबसा त्या गर्दीतून बाहेर निघून तो आईपर्यंत पोहोचला, तेव्हा ती तिथे नव्हती. आईचा मृत्यू झाल्याने त्याला मोठा धक्का बसला आहे. या धक्कादायक घटनेबद्दल बोलताना तो म्हणाला, "मी माझ्या आईला माझ्यासमोर मरताना पाहिलं, कदाचित मी देखील जिवंत राहिलो नसतो."

पश्चिम बंगालचे मुख्यमंत्री शुभेंदू अधिकारी यांनी पूजा मंडपात घडलेली ही घटना दुर्दैवी असल्याचे म्हटले आहे.

दरम्यान, पोलिसांनी या प्रकरणी पूजा आयोजन समितीच्या सदस्यांसह 12 जणांना ताब्यात घेतले आहे. या घटनेप्रकरणी त्यांची चौकशी सुरू करण्यात आली आहे. कोलकाता पोलीस सीसीटीव्ही फुटेजही तपासत आहेत. घटनास्थळी बंदोबस्ताला तैनात असलेल्या पोलिसांचीही चौकशी केली जाणार असल्याची माहिती आहे.

मुख्यमंत्री शुभेंदू अधिकारी यांनी घटनेच्या चौकशीसाठी कोलकाता हायकोर्टाच्या न्यायमूर्तींच्या देखरेखीखाली एसआयटी स्थापन करण्याची घोषणा केली आहे. या घटनेनंतर कोलकात्यातील इतर मंडपांचीही तपासणी केली जाणार आहे. राज्य सरकारने या घटनेतील मृतांच्या नातेवाइकांना 25 लाखांची मदत जाहीर केली आहे.