गोजोलीच्या आश्रमशाळेत धाबा पोलिसांनी ३८० विद्यार्थ्यांना दिले सुरक्षेचे धडे

गोंडपिपरी तालुक्यातील गोजोली येथील श्रीराम आदिवासी आश्रमशाळेत धाबा उपपोलीस स्टेशनच्या वतीने जनजागृती कार्यक्रम घेण्यात आला. विद्यार्थ्यांमध्ये कायद्याविषयी जागरूकता निर्माण व्हावी, सायबर गुन्ह्यांपासून बचावाचे ज्ञान मिळावे आणि महिला सुरक्षा, बाललैंगिक अत्याचार प्रतिबंध व वाहतूक नियमांचे महत्त्व कळावे, हा यामागचा उद्देश होता. विविध शाळा-महाविद्यालयांतील सुमारे ३८० विद्यार्थ्यांना यात सुरक्षिततेबाबत मार्गदर्शन करण्यात आले.

या कार्यक्रमात फक्त कायद्यांची माहिती दिली गेली नाही. रोजच्या जीवनात कोणती काळजी घ्यावी, सोशल मीडिया सुरक्षितपणे कसा वापरावा, अनोळखी माणसांपासून सावध का राहावे आणि संकटात पोलिसांची मदत कशी घ्यावी, हेही विद्यार्थ्यांना समजावून सांगण्यात आले.

सध्या मोबाईल आणि इंटरनेटचा वापर वाढला आहे आणि त्यासोबत सायबर फसवणुकीचा धोकाही वाढत आहे. त्यामुळे अनोळखी व्यक्तीला ओटीपी, पासवर्ड किंवा बँक खात्याची माहिती देऊ नये, अशी सूचना विद्यार्थ्यांना करण्यात आली. संशयास्पद लिंकवर क्लिक करणे, अनोळखी लोकांशी ऑनलाइन संपर्क करणे आणि वैयक्तिक माहिती सोशल मीडियावर शेअर करणे टाळावे, असेही सांगण्यात आले. सायबर गुन्ह्याला बळी पडल्यास घाबरून न जाता लगेच संबंधित यंत्रणेकडे तक्रार करावी, असे आवाहन करण्यात आले.

महिलांशी संबंधित गुन्हे, मुलांच्या सुरक्षिततेचे प्रश्न, बाललैंगिक अत्याचार प्रतिबंधक कायदा (पोक्सो) आणि 'गुड टच-बॅड टच' या विषयांवरही विद्यार्थ्यांना मार्गदर्शन झाले. कोणताही अनुचित स्पर्श, छळ किंवा संशयास्पद वागणूक आढळली, तर ते लपवून न ठेवता पालक, शिक्षक किंवा पोलिसांना सांगावे, असे आवाहन करण्यात आले. स्वतःच्या सुरक्षिततेबद्दल जागरूक राहण्यासोबतच इतरांच्या अडचणी समजून घेऊन योग्य वेळी मदतीला पुढे यावे, यावरही भर देण्यात आला.

रस्ते अपघात टाळण्यासाठी वाहतूक नियम पाळणे अत्यावश्यक असल्याचे सांगण्यात आले. दुचाकी चालवताना हेल्मेट वापरावे, गाडी चालवताना मोबाईल वापरू नये, वाहतुकीचे संकेत पाळावेत आणि अल्पवयीन मुलांनी वाहन चालवू नये, अशा सूचना विद्यार्थ्यांना देण्यात आल्या. नशामुक्त अभियानाचे महत्त्व सांगून व्यसनांपासून दूर राहण्याचे आवाहनही करण्यात आले. आपत्कालीन परिस्थितीत डायल ११२ या क्रमांकावर संपर्क साधून पोलिसांची मदत घेता येते, याचीही माहिती देण्यात आली.

या कार्यक्रमात चार शैक्षणिक संस्थांतील विद्यार्थी सहभागी झाले होते. श्रीराम आदिवासी आश्रमशाळा (गोजोली), जनता विद्यालय तथा कनिष्ठ महाविद्यालय (धाबा), नवजीवन महाविद्यालय (गोजोली) आणि स्वामी विवेकानंद आश्रमशाळा (किरमिरी) अशा संस्थांमधील सुमारे ३८० विद्यार्थी आणि २० शिक्षकवृंद उपस्थित होते. सुरक्षिततेचे धडे देण्यासोबतच विद्यार्थ्यांमध्ये सामाजिक जबाबदारीची जाणीव निर्माण करण्याच्या दृष्टीने हा उपक्रम महत्त्वपूर्ण ठरला.

धाबा उपपोलीस स्टेशनचे ठाणेदार सपोनि विरेंद्र केदारे तसेच दामिनी पथक, चंद्रपूर येथील सपोनि प्रज्ञा वाडेकर यांनी विद्यार्थ्यांना मार्गदर्शन केले. धाबा येथील पोलीस कर्मचारी सफौ वासुदेव आत्राम, पोहवा जीवन आचेवार, पोअं धनराज सयाम, पोअं गजानन तुरेकर, मासूम मेश्राम आणि संबंधित शैक्षणिक संस्थांतील शिक्षकवृंद यावेळी हजर होते.

विद्यार्थ्यांमध्ये कायद्याविषयी जागरूकता निर्माण करणे, त्यांना गुन्हेगारीपासून वाचवणे आणि सुरक्षित समाज घडवण्यासाठी त्यांना सजग नागरिक बनवणे, हा उपक्रमाचा मुख्य उद्देश होता. शालेय वयातच सुरक्षा नियमांची माहिती मिळाली, तर पुढे ते अधिक जबाबदार आणि जागरूक नागरिक म्हणून घडण्यास मदत होईल. त्यामुळे शैक्षणिक संस्थांमध्ये असे जनजागृती कार्यक्रम नियमितपणे व्हायला हवेत.