चंद्रपूर दीक्षाभूमीचा ५६ कोटींतून कायापालट होणार; विकासकामांचे लवकरच भूमिपूजन
चंद्रपूरच्या दीक्षाभूमी परिसराच्या विकासकामासाठी ५६ कोटी ९० लाख रुपयांचा निधी मंजूर झाला असून लवकरच या कामाचे भूमिपूजन होणार आहे.
चंद्रपूरच्या दीक्षाभूमीचं रूपडं आता पूर्णपणे बदलणार आहे. या ऐतिहासिक जागेच्या विकासकामाचं भूमिपूजन लवकरच होणार असल्याचं आमदार किशोर जोरगेवार यांनी एका पत्रकार परिषदेत सांगितलं. या विकासकामासाठी ५६ कोटी ९० लाख रुपयांचा निधी मंजूर झाला असून त्यातून दीक्षाभूमी परिसराचा कायापालट केला जाणार आहे.
आमदार जोरगेवार यांनी या पत्रकार परिषदेत विकसित होणाऱ्या दीक्षाभूमीची झलक दाखवली. दीक्षाभूमीच्या कामाचं भूमिपूजन काही दिवसांत होणार असल्याची माहिती त्यांनी यावेळी दिली. २०२० सालच्या अर्थसंकल्पीय अधिवेशनात त्यांनी दीक्षाभूमीच्या विकासासाठी निधीची मागणी केली होती. त्या पाठपुराव्याला आता यश मिळालं असून ५६ कोटी ९० लाख रुपयांचा निधी मंजूर झाला आहे.
या निधीतून दीक्षाभूमी परिसरात बाबासाहेबांचा ५१ फुटी पुतळा उभारला जाणार आहे. याशिवाय कम्युनिटी हॉल, विपश्यना केंद्र, थीम पार्क आणि नवा विहार या परिसरात साकारला जाणार आहे. या ठिकाणी तीन नवी प्रवेशद्वारंही बांधली जाणार आहेत. दीक्षाभूमी परिसरात नेमकं काय काय उभं राहणार आहे, याचा तपशील आमदारांनी पत्रकार परिषदेत मांडला.
हा निधी सध्या समाजकल्याण विभागाकडे आला असून तो वेळोवेळी सार्वजनिक बांधकाम विभागाला दिला जाणार आहे. आमदार जोरगेवार यांच्या पुढाकारामुळे दीक्षाभूमीसाठी इतक्या मोठ्या प्रमाणात निधी मिळाल्यामुळे भविष्यात हा परिसर जगभरातील पर्यटकांसाठी प्रसिद्ध होईल, असा विश्वास त्यांनी व्यक्त केला.
चंद्रपूर विधानसभा क्षेत्राच्या विकासासाठी आपण नेहमीच प्रयत्नशील राहणार असल्याचं जोरगेवार म्हणाले. ताडोबा सफारी प्रकल्प, महाकाली मंदिर परिसराचा विकास आणि हेरिटेज वॉक अशी आणखी अनेक कामं पुढील काळात मार्गी लावायची असल्याचंही त्यांनी सांगितलं.
दीक्षाभूमीच्या विकासकामात सध्या काही अडथळे आणण्याचा प्रयत्न सुरू असल्याचं आमदारांनी नमूद केलं. मात्र त्या अडथळ्यांकडे लक्ष न देता, बाबासाहेबांच्या पदस्पर्शानं पावन झालेल्या या भूमीच्या विकासासाठी सर्व समाजबांधवांनी सहकार्य करावं, असं आवाहन त्यांनी केलं.
विकासकामात काही त्रुटी आढळल्यास समाजबांधवांनी त्या लेखी स्वरूपात द्याव्यात, प्रशासन त्या दुरुस्त करेल, असंही जोरगेवार यांनी सांगितलं. त्यामुळे समाजबांधवांनी या पावन भूमी परिसराच्या विकासाला सहकार्य करावं, असं आवाहनही त्यांनी केलं. दीक्षाभूमीबाबत सध्या पसरलेल्या संभ्रमाच्या पार्श्वभूमीवर, घोटेकर आणि खोब्रागडे कुटुंबीयांची मतं जाणून घेऊन परिसरात आणखी काय व्हायला हवं, याबाबत लेखी सूचना घेतल्या जाणार आहेत.
ही बातमी प्रकाशित झाली आहे पण थेट मालिका सुरू झालेली नाही. डेस्कने अपडेट दाखल करताच तो इथे दिसेल.
