२००४ मधील पत्नीवरील हल्ल्याचा आरोपी २२ वर्षांनी ब्रह्मपुरी पोलिसांच्या जाळ्यात

ब्रह्मपुरी (चंद्रपूर) : तब्बल २२ वर्षे फरार असलेल्या आरोपीला पकडण्यात ब्रह्मपुरी पोलिसांना अखेर यश आले आहे. २००४ मध्ये पत्नीवर प्राणघातक हल्ला केल्याच्या गुन्ह्यात रमेश झिंगुजी खानोरकर (रा. कूर्झा, ब्रह्मपुरी) हा आरोपी आहे. पोलिसांनी त्याला अटक केली आहे.

खानोरकर हा नागपूर जिल्ह्यातील नरसाळा येथे आपली ओळख लपवून राहत होता. गुप्त माहितीच्या आधारे पोलिसांनी १३ ऑक्टोबर रोजी त्याच्या राहत्या ठिकाणी कारवाई केली आणि त्याला ताब्यात घेतले.

या प्रकरणाची सुरुवात २००४ मध्ये झाली होती. त्या वेळी ब्रह्मपुरी पोलीस स्टेशनमध्ये भारतीय दंड संहितेच्या कलम ३०७ आणि ३२६ अन्वये गुन्हा दाखल झाला होता. आरोपीने आपल्या पत्नीवर प्राणघातक हल्ला करून तिला गंभीर जखमी केले, असा आरोप आहे. गुन्हा घडल्यानंतर तो पोलिसांच्या हाती लागला नाही आणि फरार झाला. न्यायालयाने त्याला फरार घोषित केले होते. गेली २२ वर्षे ब्रह्मपुरी पोलीस त्याचा शोध घेत होते, पण तो पोलिसांना चकवत राहिला.

अलीकडेच पोलिसांना एका गुप्त बातमीदाराकडून खात्रीशीर माहिती मिळाली. नरसाळा येथे एक जण गेल्या काही वर्षांपासून पूर्णपणे एकटाच राहत असून त्याच्याकडे कोणी नातेवाईक येत नाही आणि तोही कोणाच्या संपर्कात नसतो, अशी कुणकुण पोलिसांना लागली. त्यानंतर पोलिसांनी गुप्तता पाळत त्या व्यक्तीची माहिती गोळा करायला सुरुवात केली. सखोल चौकशीनंतर ती व्यक्ती म्हणजे २२ वर्षांपूर्वी ब्रह्मपुरीत पत्नीवर हल्ला करून फरार झालेला रमेश झिंगुजी खानोरकरच असल्याची खात्री पटली. तो गेली २२ वर्षे नाव आणि खरी ओळख बदलून नरसाळा (ता. कन्हान, जि. नागपूर) येथे लपून राहत होता, असे समोर आले.

आरोपीला पोलिसांच्या हालचालींचा सुगावा लागू नये याची काळजी घेत पोलिसांनी सापळा रचला. वरिष्ठ अधिकाऱ्यांच्या मार्गदर्शनाखाली १३ ऑक्टोबर २०२६ रोजी नरसाळा येथील त्याच्या राहत्या जागी अचानक धाड टाकण्यात आली. पोलिसांच्या माहितीनुसार, आरोपीने गुन्हा केल्याची कबुली दिली आहे. त्याला अटक करण्यात आली असून पुढील तपास सुरू आहे.

ही कारवाई चंद्रपूर जिल्ह्याचे पोलीस अधीक्षक आयुश नोपानी, अपर पोलीस अधीक्षक ईश्वर कातकडे, उपविभागीय पोलीस अधिकारी साहील झरकर आणि पोलीस निरीक्षक कांचन पांडे यांच्या मार्गदर्शनाखाली पार पडली. साहाय्यक पोलीस निरीक्षक मनोज खडसे यांच्यासह पोलीस हवालदार मुकेश गजबे, मिलिंद नैताम आणि पोलीस अंमलदार प्रवीण भिवगडे, इर्शाद खान, निलेश तूमसरे, स्वप्नील पळसपगार व वशिष्ठ रंगारी यांनी या कारवाईत महत्त्वाची भूमिका बजावली.