बोर व्याघ्र प्रकल्पात तरुण वाघांचा रुबाब, वज्र आणि अघोरने पर्यटकांना घातली भुरळ

बोर व्याघ्र प्रकल्पाच्या ढगा बफर क्षेत्रात सध्या वाघांचे दर्शन वन्यजीवप्रेमींसाठी मोठे आकर्षण ठरले आहे. पार्वती नावाच्या टी-60 वाघिणीचे दोन तरुण नर बछडे 'वज्र' आणि 'अघोर' आपल्या रुबाबदार चालीने आणि बिनधास्त वावराने पर्यटकांना भुरळ घालत आहेत.

हे दोन्ही वाघ सहज दिसू लागल्याने वन्यजीव पर्यटनाच्या क्षेत्रात ढगा बफर क्षेत्राची चर्चा वाढू लागली आहे. वज्र आणि अघोर यांचा या भागातील वावर चांगल्या प्रमाणात नोंदवला जात असून, हे तरुण वाघ बोर व्याघ्र प्रकल्पात आपले क्षेत्र पक्के करत आहेत. सुमारे एक वर्षापूर्वी सफारीसाठी सुरू करण्यात आलेल्या या क्षेत्रात अलीकडच्या काळात पर्यटकांना वाघ पाहण्याची संधी मिळत आहे.

त्यामुळे बोर व्याघ्र प्रकल्पाकडे वन्यजीवप्रेमी, पर्यटक आणि वाघांची छायाचित्रे काढणारे फोटोग्राफर यांचा ओढा वाढत आहे. हे क्षेत्र नागपूर आणि वर्धा या दोन्हींशी जोडलेले असल्याने कमी वेळात जंगल सफारीचा थरार अनुभवू इच्छिणाऱ्यांसाठीही ते आवडीचे ठिकाण बनत चालले आहे.

ढगा बफर क्षेत्रातील प्रसिद्ध वाघीण पार्वती आणि प्रभावशाली नर वाघ विराट यांना तीन बछडे आहेत. त्यापैकी सुमारे 16-17 महिन्यांचे वज्र आणि अघोर सध्या पर्यटकांचे लक्ष वेधून घेत आहेत. हे दोघेही तरुण नर वाघ पार्वती वाघीण आणि विराट यांचे बछडे असल्याचे सांगितले जाते, आणि दोघे सफारी मार्गावर नजरेस पडत आहेत.

जंगलातील पायवाटा आणि सफारी मार्गावरून रुबाबात चालणारे हे दोन्ही तरुण वाघ पाहून पर्यटक रोमांचित होतात. त्यांच्या आकर्षक वावरामुळे वन्यजीव छायाचित्रकारांनाही उत्तम छायाचित्रे टिपण्याची संधी मिळत आहे.

अलीकडेच जंगल सफारीदरम्यान वज्र आणि अघोर सफारी मार्गावर जणू 'रोड शो' करताना दिसले. वन्यजीव छायाचित्रकार नितीन बरापात्रे आणि पीयूष आकरे यांनी या तरुण वाघांचे जंगलात विहार करतानाचे मनमोहक क्षण आपल्या कॅमेऱ्यात टिपले. या छायाचित्रांमधून दोन्ही तरुण वाघांचे सौंदर्य, त्यांची रुबाबदार चाल आणि नैसर्गिक वर्तन जवळून पाहण्याची संधी मिळत आहे.