बिकानेर हाऊसमधील फोटो प्रदर्शन वाद: नियम वाचूनच फोटो निवडले, रेहान वाड्रा म्हणाला

काँग्रेसच्या खासदार प्रियंका गांधी वाड्रा यांचा मुलगा रेहान वाड्रा याचे सोलो फोटो प्रदर्शन दिल्लीतील बिकानेर हाऊसमध्ये होणार आहे. या प्रदर्शनावरून मोठा वाद निर्माण झाला आहे. बिकानेर हाऊसच्या व्यवस्थापनाने 70 पेक्षा जास्त फोटो हटवण्यास सांगितले होते. त्यानंतर आता रेहान वाड्राची प्रतिक्रिया समोर आली आहे.

एका वृत्तसंस्थेशी बोलताना रेहान वाड्रा म्हणाला की, बिकानेर हाऊसचे राजकीय बाबींशी संबंधित सगळे नियम व अटी त्याने वाचल्या होत्या. त्यानंतरच त्याने आपले फोटो निवडले. त्याच्या म्हणण्यानुसार, प्रदर्शनात राजकीय घोषणाबाजी किंवा नेत्यांचे फोटो कमीच होते.

रेहान पुढे म्हणाला की, जे झाले ते चुकीचे झाले असे त्याला वाटते आणि हा त्याच्यावरचा अन्याय आहे. तो म्हणाला की, बिकानेर हाऊसला जितके शक्य होते तितके सहकार्य त्याने केले. त्यांची राजकीय बाबींबाबतची अट वाचूनच फोटो निवडले होते. कोणतीही राजकीय घोषणाबाजी प्रसिद्ध केली नाही आणि नेत्यांचे फोटोही जास्त नव्हते, असे तो म्हणाला.

फोटो हटवायला सांगितले, तेव्हा आपण त्यांना म्हणालो की तुमच्या म्हणण्याप्रमाणे करू, असे रेहानने सांगितले. चार ते पाच फोटो हटवायचे असतील तर ते नक्की हटवा, पण त्याचे कारणही द्या, असे त्याने त्यांना सांगितले. ते कारण आपल्याला मिळाले नाही, असे तो म्हणाला. त्याच्या सांगण्यानुसार, त्यांनी 70 च्या 70 फोटो हटवावे लागतील असे सांगितले.

रेहानच्या म्हणण्यानुसार, सार्वजनिक संस्था म्हणून बिकानेर हाऊसची जबाबदारी आहे की त्यांनी कलाकार आणि कलादालनांच्या अभिव्यक्ती स्वातंत्र्याला कायम राखावे आणि त्याचे रक्षण करावे. या प्रकरणात तसे काही झाले नाही, असे त्याला वाटते. हा अभिव्यक्ती स्वातंत्र्यावर घाला आहे, असे त्याचे मत आहे.

रेहान म्हणाला की, त्याचे फोटो संस्थेच्या नियमांविरोधात आहेत असे त्याला सांगण्यात आले. त्याचे अनेक फोटो इन्स्टाग्रामवरही आहेत आणि त्यात सर्वसाधारण लोकच दिसतात. हो, हे फोटो आंदोलनाचे आहेत, पण त्यात सर्वसाधारण लोकच दिसतील, असे तो म्हणाला.

बिकानेर हाऊसने आपले नियम अधिक विस्ताराने तयार करावेत, असे रेहानचे म्हणणे आहे. राजकीय सामग्री म्हणजे काय आणि त्याचा निर्णय कोण करतो, हेही स्पष्ट करायला हवे, असे तो म्हणतो. बहुतेक कलाकार राजकीय असतात, त्यामुळे असे नियम ठेवायलाच नकोत असे त्याला वाटते.

तुझ्या फोटोत मामा राहुल गांधी किंवा आई प्रियंका गांधी यांचे फोटो आहेत का, असे रेहानला विचारण्यात आले. त्यावर तो म्हणाला की, एक-दोन फोटोंमध्ये त्यांची हलकीशी झलक दिसते. वाद होऊ नये म्हणून सर्व बाजूंनी विचार करून फोटो निवडले, असेही त्याने सांगितले.

आई किंवा मामांमुळे तुला लक्ष्य करण्यात आले का, असे विचारल्यावर रेहान म्हणाला की, त्यावर तो काही बोलू शकत नाही आणि त्याचे उत्तर बिकानेर हाऊसवालेच देऊ शकतात. फोटो हटवण्याबाबत आईची प्रतिक्रिया काय होती, असे विचारल्यावर तो म्हणाला की, हे कळल्यावर ती त्याला म्हणाली, तुला जे योग्य वाटते ते तू कर.