थायलंडचे सुमारे ११० भिक्खू भद्रावतीत, शांती संदेश धम्मयात्रा शहरात दाखल

तथागत भगवान गौतम बुद्ध यांचा शांती, करुणा, मैत्री, अहिंसा, समता आणि मानवकल्याणाचा संदेश लोकांपर्यंत पोहोचावा, या उद्देशाने 'शांती संदेश धम्मयात्रा २०२६' काढण्यात आली. ही यात्रा भद्रावती शहरात आली तेव्हा तिचे उत्साहात स्वागत झाले. या आंतरराष्ट्रीय यात्रेत थायलंडमधील सुमारे ११० भिक्खू सहभागी होते आणि त्यामुळे भद्रावतीतील ऐतिहासिक विज्जासन बुद्ध लेणीला वेगळे महत्त्व मिळाले.

यात्रेची सुरुवात ५ नोव्हेंबरला सकाळी सहा वाजता चंद्रपूर येथील ऐतिहासिक दीक्षाभूमीतून झाली. ऊर्जाग्राम (ताडाळी) येथे जेवण आणि विश्रांती झाली, त्यानंतर ताडाळी पुलापासून पदयात्रा पुन्हा सुरू झाली. सुमठाणा येथील ऑर्डनन्स फॅक्टरी बुद्ध विहार आणि सम्राट अशोक चौकात यात्रेचे स्वागत करण्यात आले. पुढे चंद्रपूर-नागपूर मुख्य मार्गाने पदयात्रा भद्रावतीच्या दिशेने निघाली.

भद्रावती शहरात आल्यावर बाळासाहेब ठाकरे प्रवेशद्वार परिसरात यात्रेचे स्वागत झाले. भदंत ज्ञानज्योती आणि त्यांच्या भिक्खू संघानेही यात्रेत भाग घेतला. शहरातील वेगवेगळ्या चौकांत धम्मबांधव, उपासक-उपासिका आणि नागरिकांनी फुलांचा वर्षाव करून आणि बुद्ध वंदनेचा जयघोष करून भिक्खू संघाचे स्वागत केले. डॉ. बाबासाहेब आंबेडकर पुतळ्याजवळ माल्यार्पणाचा कार्यक्रम झाला आणि त्यानंतर यात्रा विज्जासन बुद्ध लेणीत पोहोचली.

लेणी परिसरात भिक्खू संघाच्या उपस्थितीत धम्मदेशना आणि धार्मिक कार्यक्रम झाले. ६ नोव्हेंबरला सकाळी भिक्खू संघाची चारिका (पिंडपात) पार पडली. त्यानंतर यात्रा संभाजीनगरकडे (औरंगाबाद) रवाना झाली.

विज्जासन बुद्ध लेणी वर्षावास समिती, सम्राट अशोक वाचनालय, धम्मचक्र अनुवर्तन दिन सोहळा समिती, डॉ. आंबेडकर जयंती उत्सव समिती, जयभीम पंचविज्ञान, डॉ. आंबेडकर युथ क्लब, संविधान नागरिक संवर्धन कृती समिती आणि भद्रावती शहरातील सर्व बुद्ध विहार समित्या यांनी मिळून या यात्रेचे आयोजन केले होते.

शांती, समता, बंधुता आणि मानवतेचा बुद्धांचा संदेश समाजात रुजविणारी ही यात्रा भद्रावतीच्या बौद्ध सांस्कृतिक आणि ऐतिहासिक परंपरेच्या दृष्टीने महत्त्वाची आणि संस्मरणीय ठरली.