इको-प्रो भद्रावतीतर्फे पक्षी निरीक्षण व जनजागृती सप्ताहाला सुरुवात

इको-प्रो भद्रावतीतर्फे गुरुवारी, ५ नोव्हेंबर रोजी गवराळा तलाव परिसरात स्वच्छता अभियान राबवण्यात आले. याच स्वच्छता अभियानाने पक्षी निरीक्षण व जनजागृती सप्ताहाचे उद्घाटन करण्यात आले. या सप्ताहात भद्रावती परिसरातील वेगवेगळ्या तलावांवर पक्षी निरीक्षण आणि जनजागृतीचे उपक्रम राबवले जाणार आहेत.

पद्मभूषण डॉ. सलीम अली आणि सेवानिवृत्त वनाधिकारी मारुती चितमपल्ली यांनी पक्षी संवर्धनासाठी अमूल्य काम केले आहे. त्यांच्या कामाची दखल घेऊन आणि त्यांच्या जन्मदिनाचे औचित्य साधून दरवर्षी ५ ते १२ नोव्हेंबर या काळात पक्षी सप्ताह आयोजित केला जातो. याच निमित्ताने इको-प्रो भद्रावतीने यंदाचा सप्ताह आखला आहे.

सप्ताहातील कार्यक्रमांचे नियोजन आणि वेळापत्रक असे आहे. ६ नोव्हेंबरला घोटनिंबाळा तलाव, ७ नोव्हेंबरला चोरा तलाव आणि ८ नोव्हेंबरला भद्रावतीतील हुतात्मा स्मारकात चित्रकला स्पर्धा होईल. ९ नोव्हेंबरला सुमठाणा तलाव, १० नोव्हेंबरला डोलारा तलाव आणि ११ नोव्हेंबरला गोरजा तलाव येथे उपक्रम असतील. शेवटी १२ नोव्हेंबरला भद्रावतीतील हुतात्मा स्मारक येथे समारोप आणि बक्षीसवितरणाचा कार्यक्रम होणार आहे.

हे सर्व उपक्रम रोज सकाळी ६ ते ८.३० या वेळेत होतील. पक्षी निरीक्षणाबरोबरच निसर्गात पक्ष्यांचे काय महत्त्व आहे, संकटग्रस्त पक्षी आणि त्यांच्या अधिवासाचे संवर्धन कसे करायचे, स्थलांतरित पक्ष्यांच्या अधिवासाचे संरक्षण कसे करायचे, तसेच पक्षी संरक्षण व संवर्धन कायदा काय सांगतो, याबद्दल नागरिकांमध्ये जनजागृती केली जाणार आहे.

हिवाळ्याची चाहूल लागली की वेगवेगळ्या भागांतून अनेक प्रवासी पक्षी आपल्या परिसरात येतात. वर्षभर नजरेआड असलेले हे रंगीबेरंगी पक्षी पाहण्याची, त्यांचा अभ्यास करण्याची आणि त्यांच्या संवर्धनासाठी योगदान देण्याची ही एक सुवर्णसंधी आहे, असे इको-प्रो भद्रावतीने म्हटले आहे.

स्थानिक पक्ष्यांप्रमाणेच स्थलांतरित पक्ष्यांच्या संरक्षणाची जबाबदारीही स्थानिक नागरिकांची आहे. म्हणूनच या सप्ताहात आयोजित केलेल्या विविध उपक्रमांमध्ये विद्यार्थी, सामाजिक संघटना, पक्षी अभ्यासक आणि सामान्य नागरिकांनी मागच्या वर्षीप्रमाणे यंदाही मोठ्या संख्येने सहभागी व्हावे, असे आवाहन इको-प्रो भद्रावतीतर्फे करण्यात आले आहे.

उद्घाटनाच्या वेळी इको-प्रोचे तालुका अध्यक्ष संदीप जीवने, किशोर खंडाळकर, अमोल दौलतकर, मंगेश पडाल, अभी लोहकरे, हनुमान घोटेकर, निलेश ठाकरे, सौ. प्रगती जीवने आणि सौ. कल्पना बांदुरकर उपस्थित होते. पतंजली योग समितीचे अनंता मते आणि समितीचे सर्व सदस्यही कार्यक्रमाला हजर होते.