बल्लारपूरच्या सुरक्षेसाठी सीसीटीव्ही प्रणालीची मागणी; मुनगंटीवारांच्या मागणीची मुख्यमंत्र्यांकडून तातडीने दखल

चंद्रपूर - बल्लारपूर शहरातील नागरिकांच्या सुरक्षिततेसाठी आणि वाढत्या गुन्हेगारीला आळा घालण्यासाठी आमदार सुधीर मुनगंटीवार यांनी अत्याधुनिक सीसीटीव्ही सर्व्हेलन्स प्रणाली उभारण्याची मागणी केली आहे. या प्रणालीला तातडीने तांत्रिक मान्यता द्यावी आणि लागणारा निधी उपलब्ध करून द्यावा, अशी विनंती त्यांनी मुख्यमंत्री देवेंद्रजी फडणवीस यांच्याकडे केली आहे.

मुनगंटीवार यांच्या या मागणीची मुख्यमंत्र्यांनी लगेच दखल घेतली. अपर मुख्य सचिव (गृह) यांना 'अ' प्रमाणे तातडीने कार्यवाही करण्याचे निर्देश त्यांनी दिले आहेत. नागरिकांना सुरक्षित वातावरणात निर्भयपणे फिरता यावे आणि पोलिसांना गुन्हेगारीवर प्रभावी नियंत्रण ठेवता यावे, या व्यापक जनहिताच्या भूमिकेतून मुनगंटीवार यांनी हा विषय शासनदरबारी मांडला आहे.

शहरातले प्रमुख चौक, बाजारपेठा, संवेदनशील ठिकाणे तसेच शहरात येण्याचे आणि बाहेर जाण्याचे मार्ग इथे ही प्रणाली उभारण्याची गरज मुनगंटीवार यांनी मुख्यमंत्र्यांच्या निदर्शनास आणून दिली आहे. बल्लारपूर औद्योगिक आणि व्यापारीदृष्ट्या महत्त्वाचे आहे. त्यामुळे इथे गंभीर गुन्ह्यांना प्रतिबंध घालणे, संशयास्पद हालचालींवर नजर ठेवणे आणि पोलिसांच्या तपासात आधुनिक तंत्रज्ञानाची मदत घेणे, हा या मागणीमागचा उद्देश आहे. नागरिकांच्या सुरक्षिततेशी जोडलेल्या या प्रश्नाचे गांभीर्य लक्षात घेऊन शहराची सुरक्षा व्यवस्था अधिक सक्षम करण्यासाठी तातडीने उपाययोजना कराव्यात, असे त्यांनी अधोरेखित केले.

मुनगंटीवार यांनी यासाठी पुढाकार घेतला आहे. त्यांच्या मागणीनुसार चंद्रपूरच्या पोलीस अधीक्षकांनी याबाबतचा सविस्तर प्रस्ताव गृह विभागाकडे सादर केला आहे. या प्रस्तावानुसार शहरातील प्रमुख आणि संवेदनशील ठिकाणी उच्चक्षमतेचे सीसीटीव्ही कॅमेरे बसवले जातील. त्याचबरोबर आधुनिक नियंत्रण कक्ष, रेकॉर्डिंग आणि स्टोरेज व्यवस्था, नेटवर्किंग तसेच अखंडित वीजपुरवठ्यासाठी लागणाऱ्या सुविधा उभारण्याचेही प्रस्तावित आहे.

या यंत्रणेमुळे संशयास्पद हालचालींवर प्रभावी नजर ठेवता येईल, गुन्ह्यांच्या तपासासाठी दृश्य पुरावे मिळतील आणि शहरातील कायदा व सुव्यवस्था अधिक बळकट होण्यास मदत होणार आहे.

मुनगंटीवार यांनी बल्लारपूरच्या नागरिकांना सुरक्षित वातावरण मिळावे आणि कायदा व सुव्यवस्था अधिक बळकट व्हावी, यासाठी अत्याधुनिक सीसीटीव्ही सर्व्हेलन्स प्रणाली उभारण्याचा विषय सातत्याने शासनदरबारी मांडला आहे. मुख्यमंत्री फडणवीस यांनी त्याची तातडीने दखल घेऊन संबंधित वरिष्ठ अधिकाऱ्यांना कार्यवाहीचे निर्देश दिले आहेत. प्रस्तावाला तांत्रिक मान्यता मिळून आवश्यक निधी उपलब्ध झाला, तर गुन्हेगारीवर प्रभावी नियंत्रण ठेवता येईलच, शिवाय नागरिकांच्या मनातला सुरक्षिततेचा विश्वासही अधिक दृढ होण्यास मदत होणार आहे.