करिश्मा कपूरच्या फिटनेसमागे फक्त दही-भात नाही, तर वर्षांच्या सवयी, म्हणतात ऋजुता दिवेकर

वय वाढलं की चेहऱ्यावर सुरकुत्या येतात आणि शरीरात बदल होतात, हे आपण गृहीतच धरतो. पण काही जणांकडे बघून त्यांचं वय कळतच नाही. करिश्मा कपूर हे त्याचं उत्तम उदाहरण आहे. ५२ व्या वर्षीही ती इतकी फिट आणि सुंदर दिसते की बघणारे थक्क होतात.

करण जोहरच्या 'कॉफी विथ करण' च्या ९ व्या सीझनच्या पहिल्या एपिसोडमध्ये ती नुकतीच दिसली. तिथला तिचा लूक पाहून सगळेच चकित झाले. इतक्या वर्षांनंतरही ती तितकीच तरुण आणि एनर्जेटिक वाटत होती. मग साहजिकच प्रश्न आला की तिच्या फिटनेसचं सिक्रेट काय? याचं उत्तर सेलिब्रिटी न्यूट्रिशनिस्ट ऋजुता दिवेकर यांनी दिलं आहे. त्यांनी इंस्टाग्रामवर पोस्ट टाकून करिश्माच्या फिटनेसचं खरं रहस्य सांगितलं.

अनेक जण म्हणतात की करिश्मा रोज दही-भात खाते, म्हणून ती फिट आहे. ऋजुता यांच्या मते हे पूर्ण खरं नाही. फक्त एखाद्या पदार्थामुळे कोणी फिट राहत नाही. करिश्मानं अनेक वर्षं चांगल्या सवयी लावून घेतल्या आहेत, त्याचंच हे फळ आहे. रात्रीत कोणी फिट होत नाही, त्यासाठी वर्षानुवर्षं मेहनत करावी लागते.

ऋजुता सांगतात की वीस वर्षांचं असताना फिट राहणं सोपं असतं. खाल्लेलं पचतं आणि वजन पटकन वाढत नाही. पण तिशीनंतर गेम बदलतो. महिलांच्या शरीरात हार्मोनल बदल सुरू होतात, वजन वाढू लागतं आणि खासकरून पोट व कंबरेभोवती चरबी जमा होते. शरीराचा शेपही बदलतो. म्हणूनच चाळीशीची वाट न बघता तिशीपासूनच काळजी घ्यायला हवी, असं त्या म्हणतात.

आजकाल अनेक बायका फक्त वजनकाट्यावरचा आकडा बघत बसतात. ऋजुता यांच्या मते हे चुकीचं आहे. वजन कमी करण्याचा विचार करू नका, तर शरीर मजबूत आणि अॅक्टिव्ह कसं राहील याचा विचार करा. त्यासाठी त्यांचा सोपा सल्ला आहे की आठवड्यातून किमान ३ तास व्यायाम करायचाच. जे जमेल ते करा. वेगानं चालणं, थोडं वजन उचलण्याचे व्यायाम, योगा, स्ट्रेंथ ट्रेनिंग, काहीही चालेल. यानं हाडं मजबूत होतात, शरीराला पोषण मिळतं आणि वय वाढलं तरी थकवा येत नाही.

निरोगी राहायचं म्हणून अनेक स्त्रिया भात खाणं बंद करतात, पोळी सोडतात, साखर पूर्णपणे बंद करतात आणि रात्रीचं जेवणही टाळतात. ऋजुता यांच्या मते ही सगळ्यात मोठी चूक आहे. डाएटच्या नावाखाली स्वतःला उगाच त्रास देऊ नका. भात, पोळी आणि कार्बोहायड्रेट्स शरीराला लागतातच. ते पूर्णपणे बंद केले तर व्हिटॅमिन D, B12, लोह आणि कॅल्शियम कमी होतं. मग थकवा येतो, केस गळतात आणि चिडचिड होते.

त्यापेक्षा संतुलित आहार घ्या. वरण-भात, भाजी-पोळी, दही असं घरचं साधं जेवण प्रमाणात खा. जेवणाचा आनंदही घ्या आणि शरीराची काळजीही घ्या.

करिश्मा कपूरनं नेमकं हेच केलं आहे. तिनं कधीही उपाशी राहून डाएट केलं नाही. चांगलं खाणं, रोज थोडी कसरत आणि चांगली लाईफस्टाईल, हेच तिच्या फिटनेसचं खरं सिक्रेट आहे. पन्नाशीनंतरही फिट दिसायचं असेल, तर या सवयी आतापासूनच लावून घ्या, असं ऋजुता सांगतात.