ऑक्टोबर हिटमुळे राज्यात उकाडा वाढला, बहुतांश जिल्ह्यांसाठी विशेष अलर्ट नाही

महाराष्ट्रात ऑक्टोबर हिटचा तडाखा दिवसेंदिवस वाढत चालला आहे. उन्हाच्या तीव्र झळांमुळे लोक हैराण झाले आहेत. राज्यातील बहुतांश भागांत पावसाने उघडीप दिली असून हवा उष्ण आणि कोरडी जाणवत आहे.

भारतीय हवामानशास्त्र विभागाच्या (IMD) अंदाजानुसार 12 ऑक्टोबरला राज्यातील बहुतांश जिल्ह्यांसाठी कोणताही विशेष हवामान अलर्ट जारी करण्यात आलेला नाही. तरीही तापमानातील वाढ आणि उकाडा कायम राहण्याची शक्यता असल्याने लोकांना उन्हाचा सामना करावा लागणार आहे.

कोकण विभागात मुंबई, ठाणे, पालघर, रायगड, रत्नागिरी आणि सिंधुदुर्ग या जिल्ह्यांत सध्या उष्ण आणि दमट हवा आहे. याआधी कोकणातील काही भागांसाठी उष्णतेचा यलो अलर्ट देण्यात आला होता. मात्र 12 ऑक्टोबरला विशेष अलर्ट नसल्याचा अंदाज आहे. तिथे कमाल तापमान 36 अंश आणि किमान तापमान 23 अंश सेल्सिअसच्या आसपास राहू शकते. पावसाची वाट पाहणाऱ्यांना उकाड्यातून दिलासा मिळण्याची शक्यता कमी आहे.

उत्तर महाराष्ट्रात धुळे, नंदुरबार, जळगाव आणि नाशिक जिल्ह्यांत प्रामुख्याने कोरडी हवा राहण्याचा अंदाज आहे. या भागासाठी कोणताही विशेष इशारा नाही आणि कमाल तापमान 33 ते 34 अंश सेल्सिअसच्या आसपास राहू शकते. दिवसा उन्हाचा चटका बसेलच, शिवाय काही ठिकाणी दमट हवेचाही त्रास होण्याची शक्यता आहे. त्यामुळे दुपारच्या वेळी उन्हात जास्त वेळ थांबणे टाळावे, असे सांगण्यात आले आहे.

पश्चिम महाराष्ट्रात पुणे, सातारा, सांगली, कोल्हापूर आणि सोलापूर जिल्ह्यांतही हवा प्रामुख्याने कोरडी राहण्याची शक्यता आहे. इथेही कोणताही विशेष अलर्ट नाही. कमाल तापमान 32 अंश आणि किमान तापमान 21 अंश सेल्सिअसच्या आसपास राहण्याचा अंदाज आहे. पाऊस नसल्याने शेतकरी आणि इतर लोकांचे लक्ष हवामानातील बदलांकडे लागले आहे. पण सध्याच्या अंदाजानुसार मोठ्या पावसाचे स्पष्ट संकेत दिसत नाहीत.

मराठवाड्यात छत्रपती संभाजीनगर, जालना, परभणी, बीड, हिंगोली, नांदेड, लातूर आणि धाराशिव जिल्ह्यांत कोरडी हवा राहण्याची शक्यता आहे. तिथे कमाल तापमान 35 ते 37 अंश आणि किमान तापमान 20 ते 24 अंश सेल्सिअसच्या दरम्यान राहू शकते. विशेष अलर्ट नसला तरी वाढत्या उष्णतेचा त्रास लोकांना सहन करावा लागू शकतो. पावसाअभावी आधीच पाणीटंचाईला तोंड देणाऱ्या भागांत परिस्थितीबद्दल चिंता कायम आहे.

विदर्भात नागपूर, अमरावती, अकोला, वर्धा, यवतमाळ, बुलढाणा, वाशिम, भंडारा, गोंदिया, चंद्रपूर आणि गडचिरोली या जिल्ह्यांतही प्रामुख्याने कोरडी हवा राहण्याची शक्यता आहे. पुढील 4 ते 5 दिवस उष्णतेचा प्रभाव जाणवू शकतो. कमाल तापमान 33 ते 34 अंश आणि किमान तापमान 22 ते 23 अंश सेल्सिअसच्या आसपास राहण्याचा अंदाज आहे.

एकूणच 12 ऑक्टोबरला महाराष्ट्रात पावसापेक्षा ऑक्टोबर हिट आणि वाढत्या उकाड्याचीच चर्चा जास्त राहण्याची शक्यता आहे. लोकांनी भरपूर पाणी प्यावे, दुपारच्या कडक उन्हात विनाकारण बाहेर पडणे टाळावे आणि उन्हापासून बचावासाठी आवश्यक ती काळजी घ्यावी. हवामानाच्या ताज्या अपडेटसाठी भारतीय हवामानशास्त्र विभागाच्या अधिकृत सूचनांवर लक्ष ठेवणे महत्त्वाचे आहे.