मध्य रेल्वेची १ ते ३१ ऑक्टोबरला तपासणी मोहीम; तिकिटासोबत ओळखपत्र बाळगा

मध्य रेल्वे १ ऑक्टोबर ते ३१ ऑक्टोबर २०२६ या काळात विशेष तिकीट तपासणी मोहीम राबवणार आहे. या काळात प्रवाशाकडे फक्त तिकीट किंवा पास असून भागणार नाही. तिकिटासोबत ओळख आणि पात्रता दाखवणारी कागदपत्रेही सोबत ठेवावी लागणार आहेत.

तुम्ही रोज ट्रेनने प्रवास करत असाल किंवा ऑक्टोबरमध्ये रेल्वेने बाहेर जाणार असाल, तर ही माहिती तुमच्यासाठी महत्त्वाची आहे. या मोहिमेत प्रवाशांच्या तिकिटांसोबत त्यांची ओळख आणि पात्रता यांचीही तपासणी होणार आहे. सवलत, विशेष आरक्षण कोटा, ई-पास किंवा प्रिव्हिलेज तिकीट ऑर्डर (PTO) अंतर्गत तिकीट काढणाऱ्यांनी आवश्यक कागदपत्रे जवळ बाळगणे अत्यंत महत्त्वाचे ठरेल.

प्रिव्हिलेज तिकीट ऑर्डर म्हणजे PTO हे भारतीय रेल्वेतील पात्र कर्मचारी आणि सेवानिवृत्त कर्मचाऱ्यांना दिले जाणारे सवलतीचे प्रवासी व्हाउचर आहे. त्याच्या मदतीने ते सामान्य प्रवासी भाड्याच्या एक तृतीयांश म्हणजेच 33% दराने रेल्वे तिकीट घेऊ शकतात.

मोहिमेदरम्यान रेल्वे कर्मचारी तिकीट वैध आहे का आणि त्या तिकिटावर प्रवास करणारी व्यक्ती पात्र आहे का, याची बारकाईने पडताळणी करतील. म्हणजेच आता फक्त तिकीट आहे का एवढेच पाहिले जाणार नाही. तिकीट मिळवण्यासाठी आधार आणि आवश्यक पात्रता पूर्ण केली आहे का, हेही तपासले जाण्याची शक्यता आहे.

मध्य रेल्वेचे मुख्य जनसंपर्क अधिकारी (CPRO) डॉ. स्वप्निल नीला यांच्या म्हणण्यानुसार, सवलत किंवा विशेष आरक्षण कोट्यातून प्रवास करणाऱ्यांनी आवश्यक ओळखपत्र सोबत ठेवले पाहिजे. एकाच तिकिटावर अनेक प्रवासी असतील, तर रेल्वेच्या नियमांप्रमाणे किमान एका प्रवाशाकडे आवश्यक ओळखपत्र असायला हवे. तिकीट योग्य प्रवाशालाच दिले आहे का, हे पाहण्यासाठी तपासणीत रेल्वे कर्मचारी ही कागदपत्रे तपासतील.

तपासणीत आवश्यक मूळ कागदपत्र सापडले नाही, तर लागू नियमांनुसार त्या तिकिटावर प्रवास करणारे प्रवासी वैध तिकिटाशिवाय प्रवास करत आहेत असे मानले जाऊ शकते, असे रेल्वेने म्हटले आहे. म्हणजे हातात तिकीट असूनही कागदपत्रे नसतील तर अडचण येऊ शकते. त्यामुळे सवलत किंवा विशेष कोट्यातून तिकीट काढले असेल, तर प्रवासाला निघण्यापूर्वी कागदपत्रे आहेत का ते नक्की पाहून घ्या.

या मोहिमेत अनारक्षित तिकिटांचीही तपासणी होणार आहे. गरज पडली तर तिकीट परीक्षक टीटीई ॲपच्या मदतीने तिकीट तपासू शकतात. तुमच्याकडे आरक्षित सीट नसेल आणि तुम्ही अनारक्षित तिकिटावर प्रवास करत असाल, तरीही तिकिटाची वैधता तपासली जाऊ शकते.

रेल्वेच्या म्हणण्यानुसार प्रवासात ओळखीसाठी अनेक कागदपत्रे चालतात: आधार कार्ड, मतदार छायाचित्र ओळखपत्र, पासपोर्ट, पॅन कार्ड, ड्रायव्हिंग लायसन्स, केंद्र किंवा राज्य सरकारचे क्रमांक असलेले फोटो ओळखपत्र, विद्यार्थ्याचे फोटो ओळखपत्र, फोटो असलेले राष्ट्रीयीकृत बँकेचे पासबुक आणि लॅमिनेटेड फोटो असलेले क्रेडिट कार्ड. ज्यांच्या तिकिटांसाठी पात्रतेचे निकष आहेत, त्यांना फक्त कोणतेही ओळखपत्र दाखवून चालणार नाही. गरजेनुसार पात्रतेची कागदपत्रेही दाखवावी लागतील.

मध्य रेल्वेने सांगितले की, तिकीट आणि आरक्षणाशी संबंधित गैरप्रकारांना आळा घालणे हा या तपासणी मोहिमेचा उद्देश आहे. महसुलाचे नुकसान टाळणे, आरक्षणाचा गैरवापर रोखणे आणि सवलती, पास किंवा इतर लाभांचा फसवणुकीने होणारा वापर थांबवणे यावर रेल्वे विशेष लक्ष देणार आहे.