रावेतमधील 'वेस्ट टू एनर्जी' प्रकल्पाविरोधात नागरिक आक्रमक; आंदोलन तीव्र करण्याचा निर्धार

पिंपरी-चिंचवड महानगरपालिकेने रावेत आणि दुर्गा टेकडीलगतच्या जागेवर 'वेस्ट टू एनर्जी' प्रकल्प उभारण्याचा प्रस्ताव ठेवला आहे. त्याला स्थानिक नागरिकांनी जोरदार विरोध सुरू केला आहे. मोशी कचरा डेपोतील दुर्घटनेनंतर कचरा व्यवस्थापनासाठी हा प्रस्ताव पुढे आला. प्रदूषण आणि आरोग्याच्या धोक्याबाबत नागरिकांनी चिंता व्यक्त केली आहे. "आमच्या जीवाशी का खेळता?" असा संतप्त सवाल करत रावेत आणि निगडी प्राधिकरणातील सोसायट्या व रहिवाशांनी प्रशासनाविरोधात एल्गार पुकारला आहे.

मोशी कचरा डेपोतील दुर्घटनेनंतर शहरात रोज जमा होणाऱ्या सुमारे १५०० टन कचऱ्यावर प्रक्रिया कशी करायची, यासाठी पालिकेने पर्यायी जागांचा शोध सुरू केला होता. त्यातून रावेत येथील जलशुद्धीकरण केंद्राच्या शेजारी असलेल्या एमआयडीसीच्या २५ एकर जागेत २७ मेगावॉट क्षमतेचा प्रकल्प उभारण्याची हालचाल प्रशासनाने सुरू केली. पण ही जागा रहिवासी भागाच्या, जलशुद्धीकरण केंद्राच्या आणि पर्यावरणाच्या दृष्टीने महत्त्वाच्या दुर्गा टेकडीच्या अगदी जवळ आहे. त्यामुळे लोकांमध्ये भीती आणि तीव्र नाराजी पसरली आहे.

नागरिकांच्या म्हणण्यानुसार निगडी प्राधिकरण आणि रावेत हा संपूर्ण परिसर शांत आणि विकसित निवासी भाग म्हणून ओळखला जातो. अशा वस्तीजवळ कचरा प्रकल्प आला तर दुर्गंधी, हवेचे प्रदूषण आणि गंभीर आजारांचा धोका वाढेल आणि लोकांचे आरोग्य धोक्यात येईल, असे त्यांना वाटते. लाखो नागरिकांना पाणीपुरवठा करणाऱ्या जलशुद्धीकरण केंद्राजवळ असा प्रकल्प उभारणे अत्यंत धोकादायक आहे, असे मत पर्यावरणप्रेमींनी व्यक्त केले आहे.

याआधी पुनावळे येथे नियोजित असलेल्या कचरा डेपोच्या आरक्षणाला तेथील रहिवाशांनी तीव्र जनआंदोलन करून हाणून पाडले होते. त्यानंतर प्रशासनाने रावेतचा पर्याय पुढे आणला. म्हणजेच पुनावळेपाठोपाठ आता रावेतमध्येही संतापाची लाट उसळली आहे. रावेत, निगडी आणि प्राधिकरणातील रहिवासीही संघटित झाले आहेत. मोशीतील दुर्घटनेची पुनरावृत्ती आमच्या भागात होऊ देणार नाही, अशी ठाम भूमिका त्यांनी घेतली आहे.

या प्रस्तावित प्रकल्पाविरोधात पुढची दिशा ठरवण्यासाठी 'कचरा डेपो विरोधी कृती समिती, निगडी प्राधिकरण' यांच्या वतीने नागरिकांची विशेष बैठक बोलावली आहे. ही बैठक शनिवार, २४ ऑक्टोबर रोजी सायंकाळी ५:३० वाजता निगडी येथील ज्ञानप्रबोधिनी शाळेत होणार आहे. शाळेत प्रवेश मनोहर गेटमधून आहे. लोकशाही मार्गाने लढा उभारून हा प्रकल्प रद्द होईपर्यंत आंदोलन तीव्र करण्याचा निर्धार समिती आणि स्थानिक रहिवाशांनी व्यक्त केला आहे.