पिंपरी-चिंचवड महापालिकेच्या स्थायी समितीची शहरातील विविध कामांच्या प्रस्तावांना मंजुरी

पिंपरी-चिंचवड महापालिकेच्या स्थायी समितीने शहरातील वेगवेगळ्या भागांतील विकासकामांच्या प्रस्तावांना मंजुरी दिली आहे. पायाभूत आणि नागरी सुविधांच्या कामांना गती मिळावी, यासाठी हे प्रस्ताव मान्य करण्यात आले. समितीच्या साप्ताहिक सभेत हा निर्णय झाला.

मंजूर झालेल्या कामांमध्ये रस्त्यांचे डांबरीकरण, नाल्यांची दुरुस्ती, पदपथांची उभारणी, पावसाळी पाणी वाहिन्या आणि सार्वजनिक स्वच्छतागृहांची दुरुस्ती यांचा समावेश आहे. याशिवाय रुग्णालयांतील वैद्यकीय यंत्रणांच्या देखभाल-दुरुस्तीचीही कामे आहेत. ही सभा महापालिकेच्या प्रशासकीय इमारतीतील दिवंगत महापौर मधुकरराव रामचंद्र पवळे सभागृहात झाली.

रुग्णालयांबाबत दोन निर्णय झाले. चिंचवड येथील तालेरा रुग्णालयातील वातानुकूलन यंत्रणा (एचव्हीएसी), ऑपरेशन थिएटर आणि विद्युत यंत्रणा यांची पुढील दोन वर्षे देखभाल व दुरुस्ती करण्याच्या प्रस्तावाला मंजुरी मिळाली. यशवंतराव चव्हाण स्मृती रुग्णालयात (वायसीएम) एक्स-रे विभागातील डिजिटल रेडिओग्राफी मशीनची हमी कालावधी संपल्यानंतर देखभाल करावी लागणार आहे. त्यासाठी मूळ उत्पादक कंपनीसोबत करार करायलाही समितीने मान्यता दिली.

रस्त्यांच्या कामांमध्ये रावेत येथील प्रभाग क्रमांक १६ मधील ताब्यात आलेले डीपी आणि बिगर डीपी रस्ते विकसित करण्यासाठी प्रकल्प व्यवस्थापन सल्लागार नेमला जाणार आहे. प्रभाग क्रमांक २२ मधील पवनानगर व आदर्शनगर परिसरातील रस्त्यांचे हॉटमिक्स पद्धतीने डांबरीकरण होईल. प्रभाग क्रमांक ६, ८ आणि २० मधील विविध रस्त्यांची दुरुस्ती व डांबरीकरणही केले जाईल. प्रभाग क्रमांक १९ मधील सुदर्शननगर हेल्थ क्लबजवळचे जुने सीडी वर्क पाडून नवीन बांधण्याच्या कामालाही मंजुरी देण्यात आली.

प्रभाग क्रमांक १५ मधील आकुर्डी गावठाण परिसरात पावसाळी पाणी वाहिन्या, पदपथ आणि इतर स्थापत्यविषयक कामे होणार आहेत. प्रभाग क्रमांक ९ मध्ये पदपथ उभारले जातील, तसेच नेहरूनगर व विठ्ठलनगर परिसरात स्थापत्यकामे होतील. प्रभाग क्रमांक १० मधील शाहूनगर येथे रोड फर्निचरची कामे केली जाणार आहेत. दिघी-बोपखेल, चोविसावाडी, वडमुखवाडी, मोशी, डुडूळगाव आणि प्रभाग क्रमांक १८ मधील सार्वजनिक स्वच्छतागृहांची दुरुस्ती, पेव्हिंग ब्लॉक बसविणे आणि दिशादर्शक फलक लावणे या कामांनाही मान्यता मिळाली.

दापोडी, निगडी आणि दिघी येथील पाच मुस्लिम व लिंगायत दफनभूमींच्या देखभालीची जबाबदारी असलेल्या संस्थांना नवीन निविदा प्रक्रिया पूर्ण होईपर्यंत एक महिन्याची मुदतवाढ देण्यात आली. विविध क्षेत्रीय कार्यालयांच्या हद्दीत कार्यक्रमांसाठी ध्वनिक्षेपण, सीसीटीव्ही, जनरेटर व प्रकाश व्यवस्था उपलब्ध करून देण्याच्या निविदाही मंजूर झाल्या. राष्ट्रीय नागरी उपजीविका अभियानातील कंत्राटी कर्मचाऱ्यांच्या मानधनालाही मुदतवाढ मिळाली. प्रभाग क्रमांक १६, १७, १८ व २२ मध्ये वाहन, इंधन आणि चालकासह रिक्षा-टेम्पो व्यवस्था सुरू ठेवण्याच्या मुदतवाढीच्या प्रस्तावालाही मान्यता मिळाली.

सांगवी औद्योगिक प्रशिक्षण संस्थेतील विद्यार्थ्यांसाठी दृश्याधारित शिक्षण व व्हर्च्युअल प्रयोगशाळा सुविधा उपलब्ध करून देण्यासाठी ई-लर्निंग मॉड्यूलच्या खर्चाचा प्रस्ताव होता. त्याचे अवलोकन करण्यात आले. महिला आयटीआय कासारवाडी येथे अतिवृष्टीमुळे आवश्यक साहित्य खरेदी करावे लागले होते, त्या खर्चाला मंजुरी देण्यात आली. रस्ते, नाले, सार्वजनिक सुविधा आणि आरोग्य यंत्रणांशी संबंधित कामांना मिळालेल्या या मंजुरीमुळे शहरातील नागरी पायाभूत सुविधांच्या विकासाला चालना मिळणार आहे.