पायल झांबरे मृत्यू: 35 तोळे सोने, फुटेज जप्त, पती व सासरच्यांची कोठडी वाढली

पुण्यातील पायल झांबरे यांच्या मृत्यूप्रकरणी तपासात नवी माहिती समोर आली आहे. हुंड्यासाठी विवाहितेचा शारीरिक आणि मानसिक छळ करून तिला आत्महत्येस प्रवृत्त केल्याचा हा गुन्हा आहे. पोलिसांनी झांबरे यांच्या घरातून 35 तोळे सोने आणि चांदीचे दागिने जप्त केले आहेत.

याच कारवाईत पती अक्षय आणि सासरे अरविंद यांचे मोबाईल, तसेच मृत पायल यांचा मोबाईल आणि सीसीटीव्ही फुटेजही पोलिसांच्या ताब्यात आले आहे. मात्र या गुन्ह्यातील उर्वरित 15 तोळे सोने अजून मिळालेले नाही. या गुन्ह्यातील आरोपी अक्षता झांबरे ऊर्फ निमन हिचा पोलीस शोध घेत आहेत.

पती अक्षय अरविंद झांबरे (वय 35), सासरे अरविंद वसंतराव झांबरे (वय 68) आणि सासू मंगल अरविंद झांबरे (वय 58) हे सर्व मंगलमय, मुकुंदनगर येथे राहतात. त्यांच्या पोलीस कोठडीची मुदत संपत आल्याने त्यांना शनिवारी न्यायालयात हजर करण्यात आले. सरकार पक्षातर्फे ॲड. भाग्यश्री डागळे-संचेती यांनी, तर मूळ फिर्यादी यांच्यातर्फे ॲड. पुष्कर पाटील आणि ॲड. ऋतुराज पाटील यांनी युक्तिवाद केला. त्यानंतर तिघांच्या पोलीस कोठडीत दोन दिवसांची वाढ करण्यात आली.

सोमवारी, 2 नोव्हेंबर रोजी मुकुंदनगर येथील अक्षय हाइट्स सोसायटीतल्या फ्लॅटमध्ये पायल अक्षय झांबरे यांचा मृतदेह आढळला होता. प्राथमिक माहितीनुसार त्यांनी गळफास घेतल्याचा संशय व्यक्त करण्यात आला. माहिती मिळताच स्वारगेट पोलीस घटनास्थळी पोहोचले. त्यांनी मृतदेह ताब्यात घेऊन शवविच्छेदनासाठी ससून रुग्णालयात पाठवला.

पायल यांच्या मृत्यूची बातमी समजल्यानंतर त्यांच्या माहेरच्या कुटुंबीयांनी सासरच्या मंडळींवर गंभीर आरोप केले. हा आत्महत्येचा प्रकार नसून घातपात असण्याची शक्यता आहे, असा संशयही नातेवाइकांनी व्यक्त केला आहे.

माहेरच्या कुटुंबीयांनी दिलेल्या तक्रारीनुसार, लग्नानंतर सासरची मंडळी पायल यांचा सतत मानसिक आणि शारीरिक छळ करत होती. पती अक्षय झांबरे, सासू, सासरे आणि नणंद यांच्याकडून पैसे आणि सोन्याची मागणी होत होती, असा आरोप आहे. दरवर्षी दिवाळीच्या सुमारास माहेरून पाच ते दहा तोळे सोने आणण्यास सांगितले जात होते, असे नातेवाइकांचे म्हणणे आहे. यंदाही तशी मागणी झाली होती.

तक्रारीनुसार, आर्थिक परिस्थितीमुळे ही मागणी पूर्ण करणे शक्य नसल्याचे पायल यांच्या माहेरच्यांनी सांगितले. त्यांचे कुटुंब शेतकरी आहे. दुष्काळी परिस्थितीमुळे त्यांनी पुढच्या हंगामापर्यंत वेळ मागितला होता. तरीही छळ सुरूच राहिला आणि या मागण्यांमुळे पायल यांच्यावर मानसिक दबाव आणला जात होता, असा कुटुंबीयांचा आरोप आहे. या सर्व आरोपांमध्ये किती तथ्य आहे, हे पोलीस तपासातून स्पष्ट होणार आहे.