पायल झांबरे प्रकरणात पती अक्षय झांबरे पोलिसांच्या ताब्यात, सासरच्या चौघांविरोधात गुन्हा दाखल

पुण्यातील मुकुंद नगर येथील नामांकित 'झांबरे पॅलेस' कुटुंबाच्या सून असलेल्या 29 वर्षीय पायल पवार झांबरे यांनी राहत्या घरी गळ्याला दोर लावून जीवन संपवले. या प्रकरणात स्वारगेट पोलिसांनी मोठी कारवाई केली असून, पायल यांचे पती अक्षय झांबरे यांना पोलिसांनी ताब्यात घेतले आहे. पतीसह सासू, सासरे आणि नणंद अशा चौघांविरोधात गुन्हा दाखल करण्यात आला आहे.

या घटनेचे तीव्र पडसाद उमटले आहेत. या प्रकरणात कौटुंबिक छळाचा गंभीर आरोप समोर आला आहे. पायल यांच्या माहेरच्या पवार कुटुंबीयांनी पोलिसांत तक्रार दिली होती आणि त्या तक्रारीच्या आधारे पोलिसांनी चौघांविरोधात गुन्हा नोंदवला.

पवार कुटुंबीयांच्या तक्रारीनुसार, लग्नानंतर सासरच्या मंडळींकडून पायल यांचा सतत मानसिक आणि शारीरिक छळ केला जात होता. माहेरून जास्तीचे पैसे आणि सोने घेऊन येण्यासाठी सासू, सासरे, पती आणि नणंद त्यांच्यावर वारंवार दबाव टाकत होते, असा आरोप आहे. सासरच्या या असह्य जाचाला आणि सततच्या छळाला कंटाळूनच पायल यांनी राहत्या घरी गळ्याला दोर लावून जीवन संपवले, असा थेट आरोप पवार कुटुंबीयांनी केला आहे.

पायल यांनी जीवन संपवल्याची बातमी समजताच सोमवारी दुपारी सुमारे 2 वाजता माहेरचे संतप्त नातेवाईक आणि 15 ते 20 जणांच्या जमावाने महर्षी नगर येथील प्रसिद्ध 'झांबरे पॅलेस' या मंगल कार्यालयात धाव घेतली. संतप्त जमावाने इमारतीत घुसून तिथल्या साहित्याची मोठी तोडफोड केली. पुण्यातील मध्यवर्ती भागातील नामांकित मंगल कार्यालयावर भरदिवसा झालेल्या या हल्ल्यामुळे संपूर्ण परिसरात प्रचंड भीतीचे आणि तणावाचे वातावरण निर्माण झाले होते.

तोडफोडीनंतर खबरदारीचा उपाय म्हणून स्वारगेट पोलिसांनी झांबरे पॅलेस आणि आसपासच्या परिसरात तातडीने कडक पोलीस बंदोबस्त तैनात केला आहे. पायल यांच्या मृतदेहाचे शवविच्छेदन करण्यात आले आहे. स्वारगेट पोलीस स्टेशनमध्ये गुन्हा दाखल झाल्यानंतर पती अक्षय झांबरे यांची कसून चौकशी सुरू आहे. या प्रकरणातील इतर संशयित आरोपी असलेल्या सासू, सासरे आणि नणंद यांचीही चौकशी केली जाणार आहे, असे पोलिसांनी स्पष्ट केले आहे.

सध्या अक्षय झांबरे पोलिसांच्या ताब्यात आहेत. पवार कुटुंबीयांनी केलेले आरोप तक्रारीत नोंदवले गेले आहेत, तर बाकीच्या तिघांची चौकशी अजून व्हायची आहे.