पायल पवार-झांबरे मृत्यू: लग्नात 50 तोळे सोने, 25 लाख रोख दिल्याची माहिती; पती अक्षयला अटक

पुण्यातील पायल पवार-झांबरे यांच्या मृत्यूप्रकरणात आता नवी माहिती पुढे आली आहे. स्वारगेट पोलिसांनी त्यांचे पती अक्षय झांबरे यांना अटक केली आहे. अक्षय झांबरे यांच्यासह सासू मंगल अरविंद झांबरे, सासरे अरविंद झांबरे आणि नणंद अक्षता यांच्याविरोधात गुन्हा दाखल करण्यात आला आहे. झांबरे कुटुंबातील सदस्यांवर हुंडाबळी प्रतिबंधक कायद्यांतर्गत गुन्हा नोंदवला गेला आहे.

पुणे पोलीस उपायुक्त मिलिंद मोहिते यांनी दिलेल्या माहितीनुसार, 2019 मध्ये पायल आणि अक्षय यांचे लग्न झाले. त्या वेळी पवार कुटुंबाने 50 तोळे सोने आणि 25 लाख रुपये रोख दिले होते. पोलिसांनी असेही सांगितले की, आत्महत्येपूर्वी पायल यांनी आपल्या भावाला मेसेज केला आणि त्यात सासूला जबाबदार धरले होते. दिवाळीसाठी सासू-सासऱ्यांकडून 5 तोळे सोन्याची मागणी करण्यात आली होती, अशीही माहिती समोर आली आहे.

पोलिसांच्या प्राथमिक माहितीनुसार, रविवारी 1 नोव्हेंबरला पायल यांचा सासूशी वाद झाला. त्यानंतर त्या घरातून निघून गेल्या. सोमवारी 2 नोव्हेंबरला सकाळी त्यांचा शोध सुरू झाला. कुटुंबीय आणि नातेवाईक शोध घेत असताना मुकुंदनगर परिसरातील अक्षय हाइट्स सोसायटीमधील एका फ्लॅटमध्ये त्या मृतावस्थेत सापडल्या. माहेरच्या मंडळींच्या म्हणण्यानुसार, तो एक जुना फ्लॅट होता आणि तिथे त्यांचा मृतदेह गळफास घेतलेल्या स्थितीत होता. घटनास्थळी कोणतीही सुसाइड नोट सापडली नसल्याचे सांगितले जात आहे. त्यामुळे मृत्यूमागची नेमकी परिस्थिती, कौटुंबिक वाद आणि छळाचे आरोप, या सगळ्याची चौकशी सुरू आहे.

माहेरच्या कुटुंबीयांनी पोलिसांकडे दिलेल्या तक्रारीत गंभीर आरोप केले आहेत. त्यांच्या म्हणण्यानुसार, लग्नापासूनच पायल यांचा सासरच्या मंडळींकडून मानसिक आणि शारीरिक छळ होत होता. प्रत्येक दिवाळीला 5 ते 10 तोळे सोन्याची मागणी केली जायची. पायल यांचे कुटुंब शेतकरी आहे. दुष्काळी परिस्थितीमुळे त्यांनी पुढच्या हंगामापर्यंत वेळ मागितला होता, तरीही छळ थांबला नाही, असा आरोप आहे. मुलगा व्हावा म्हणून पतीकडून सतत मानसिक छळ होत होता, असेही कुटुंबीयांचे म्हणणे आहे. 2022 मध्ये पायल गर्भवती असताना त्यांना मुलगाच व्हावा यासाठी त्रास देण्यात आला, असा आरोप तक्रारीत आहे.

तक्रारीनुसार, 30 मार्च 2023 रोजी पायल यांना मुलगी झाली. त्यानंतर सासरची मंडळी हॉस्पिटलमध्ये आली, त्यांनी वाद घातला आणि पायल किंवा बाळाची जबाबदारी घेण्यास नकार दिला, असाही आरोप करण्यात आला आहे.

मृत्यूच्या दिवशी सकाळी सुमारे 7 वाजता सासरच्या मंडळींनी माहेरच्या लोकांना फोन करून पायल घरातून निघून गेल्याचे सांगितले. माहेरचे लोक तिथे पोहोचले तेव्हा पायल मृतावस्थेत होत्या आणि पती अक्षय व त्यांचे आई-वडील तिथून निघून गेले होते, असे सांगण्यात आले आहे. पोलिसांनी अक्षय झांबरे यांना ताब्यात घेतले असून उर्वरित आरोपींचा शोध सुरू आहे.