सुनेत्रा पवारांचा पायल झांबरेच्या आईला फोन; तपास जलद करण्यासाठी मुख्यमंत्र्यांशी बोलणार

पुणे : पायल झांबरे प्रकरणाचा आपण नियमित आढावा घेत आहोत, असे राष्ट्रवादी काँग्रेसच्या अध्यक्षा आणि उपमुख्यमंत्री सुनेत्रा पवार यांनी सांगितले. तपास फास्टट्रॅकवर आणण्यासाठी त्या मुख्यमंत्र्यांशी चर्चा करणार आहेत. पायल यांच्या कुटुंबीयांच्या मागण्याही मुख्यमंत्र्यांपर्यंत पोहोचवणार असल्याचे त्यांनी म्हटले आहे.

उपमुख्यमंत्री आणि पुणे जिल्ह्याच्या पालकमंत्री असलेल्या सुनेत्रा पवार यांनी काल, गुरुवारी (५ तारखेला), पायल यांच्या आईशी फोनवरून संवाद साधला. त्यांचे म्हणणे शांतपणे ऐकून घेतले आणि या प्रकरणावर आपले नियमित लक्ष असल्याचे त्यांना सांगितले.

प्रकरणाचा तपास सुरू आहे आणि त्यासंदर्भात आपण पोलीस अधीक्षकांशीही बोललो आहोत, असे सुनेत्रा पवार यांनी सांगितले. पायल यांच्या आईला धीर देताना त्या म्हणाल्या, "तुमच्या भावना मला समजू शकतात. मीसुद्धा एक आई आहे. अशा प्रकारच्या घटना घडायलाच नकोत; मात्र दुर्दैवाने ही घटना घडली आहे. या कठीण प्रसंगी तुमच्या भावना आणि वेदना मी समजू शकते."

तपास योग्य दिशेने आणि अधिक वेगाने व्हावा, यासाठी ही केस फास्टट्रॅकवर घेण्याबाबत मुख्यमंत्री महोदयांशी बोलणार असल्याचेही त्यांनी स्पष्ट केले. कुटुंबीयांच्या ज्या काही मागण्या आहेत, त्या मुख्यमंत्र्यांपर्यंत पोहोचवून त्यांचा पाठपुरावा करण्याचे आश्वासन सुनेत्रा पवार यांनी दिले.

आता या प्रकरणाची पार्श्वभूमी पाहू. पुण्यातील मुकुंदनगर येथील अक्षय हाइट्स सोसायटीमधील एका फ्लॅटमध्ये सोमवारी, २ नोव्हेंबर रोजी पायल अक्षय झांबरे यांचा मृतदेह आढळला. प्राथमिक माहितीनुसार, गळफास घेऊन आत्महत्या केल्याचा संशय व्यक्त करण्यात आला आहे. माहिती मिळताच स्वारगेट पोलीस घटनास्थळी पोहोचले. पोलिसांनी मृतदेह ताब्यात घेऊन शवविच्छेदनासाठी ससून रुग्णालयात पाठवला.

पायल यांच्या मृत्यूची बातमी कळल्यानंतर त्यांच्या माहेरच्या कुटुंबीयांनी सासरच्या मंडळींवर गंभीर आरोप केले. हा आत्महत्येचा प्रकार नसून घातपात असण्याची शक्यता आहे, असा संशयही नातेवाइकांनी व्यक्त केला आहे.

माहेरच्या कुटुंबीयांनी दिलेल्या तक्रारीनुसार, लग्नानंतर सासरच्या मंडळींकडून पायल यांचा सतत मानसिक आणि शारीरिक छळ केला जात होता. पती अक्षय झांबरे, सासू, सासरे आणि नणंद यांच्याकडून पैसे आणि सोन्याची मागणी होत होती, असा आरोप आहे. दरवर्षी दिवाळीच्या सुमारास माहेरून पाच ते दहा तोळे सोने आणण्यास सांगितले जात होते, असा आरोप नातेवाइकांनी केला आहे. यंदाही अशी मागणी झाली होती. आर्थिक परिस्थितीमुळे ती पूर्ण करणे शक्य नसल्याचे पायल यांच्या माहेरच्यांनी सांगितले, असा दावा तक्रारीत आहे. पायल यांचे कुटुंब शेतकरी असून दुष्काळी परिस्थितीमुळे त्यांनी पुढच्या हंगामापर्यंत वेळ मागितला होता, तरीही छळ सुरूच राहिला, असा आरोप कुटुंबीयांनी केला आहे. या सर्व आरोपांची सत्यता पोलीस तपासातून स्पष्ट होणार आहे.

पोलिसांनी दिलेल्या प्राथमिक माहितीनुसार, रविवारी (१ नोव्हेंबर) पायल यांचा त्यांच्या सासूशी वाद झाला होता. त्यानंतर त्या घरातून निघून गेल्याचे समोर आले आहे. सोमवारी (२ नोव्हेंबर) सकाळी त्यांचा शोध सुरू झाला. कुटुंबीय आणि नातेवाईक शोध घेत असताना मुकुंदनगर परिसरातील अक्षय हाइट्स सोसायटीमधील एका फ्लॅटमध्ये त्या मृतावस्थेत आढळल्या. घटनास्थळी पोलिसांना कोणतीही सुसाइड नोट सापडली नसल्याचे वृत्त आहे. त्यामुळे मृत्यूमागची नेमकी परिस्थिती, कौटुंबिक वाद आणि छळाच्या आरोपांची चौकशी केली जात आहे.

या प्रकरणात स्वारगेट पोलिसांनी पायल यांचे पती अक्षय झांबरे यांना अटक केली आहे. पती अक्षय, सासू मंगल अरविंद झांबरे, सासरे अरविंद झांबरे आणि नणंद अक्षता यांच्याविरोधात गुन्हा दाखल करण्यात आला आहे. पोलिसांनी भारतीय न्याय संहितेतील कलमांनुसार हा गुन्हा नोंदवला आहे.