भीमाशंकरमधील झाडतोडीवरून सतेज पाटील यांचा फडणवीसांवर निशाणा, अल निनोचा मुद्दा उपस्थित

कर्जत-भीमाशंकर प्रकल्पावरून काँग्रेस नेते सतेज पाटील यांनी राज्य सरकारवर जोरदार टीका केली आहे. "एका बाजूला तुम्ही अल निनोचा परिणाम असल्याचे सांगता, पाऊस कमी असल्याचे सांगता. दुसरीकडे पर्यावरणाचे सगळे नियम धाब्यावर बसवून असे प्रकल्प आणता. दुर्दैवाने महाराष्ट्रात निसर्ग उद्ध्वस्त करणारे प्रकल्प यायला लागलेत," असे ते म्हणाले.

पुणे जिल्ह्यातील भीमाशंकर परिसरात जलविद्युत ऊर्जा साठवण प्रकल्प प्रस्तावित आहे. त्यासाठी लाखो झाडे तोडली जात असल्याचा आरोप होत आहे. गेल्या चार ते पाच दिवसांत भीमाशंकर जंगल परिसरातील शेकडो मोठी झाडे तोडली गेल्याने राज्यभर संताप व्यक्त होत आहे. स्थानिकांचा आरोप आहे की या प्रकल्पासाठी तीन लाख झाडे तोडली जात आहेत.

दरम्यान, मुख्यमंत्री देवेंद्र फडणवीस यांनी या आरोपांना उत्तर दिले आहे. भीमाशंकरचा प्रकल्प आणि कर्जत पंप स्टोरेज प्रकल्प हे दोन्ही पूर्णपणे पर्यावरणाला पूरक आहेत, असे त्यांचे म्हणणे आहे. तरीही विरोधक या प्रकल्पांबाबत फेक नरेटिव्ह पसरवत आहेत, अशी टीका त्यांनी केली. खोटा नरेटिव्ह तयार करणे हे महाराष्ट्रविरोधी कृत्य आहे, असेही ते म्हणाले. या प्रकल्पामुळे कोणाच्याही उपजीविकेवर परिणाम होणार नाही. तशी परिस्थिती निर्माण झालीच, तर राज्य सरकारकडून संबंधितांचे योग्य पुनर्वसन केले जाईल, असेही फडणवीस यांनी सांगितले.

फडणवीस यांच्या याच मुद्द्यावरून सतेज पाटील यांनी निशाणा साधला. आमचा प्रकल्पांना विरोध नाही, पण जिथे निसर्गाची हानी होणार नाही, असे प्रकल्प यायला हवेत, असे ते म्हणाले. डेटा सेंटरबद्दल जी आकडेवारी पुढे आली आहे, तिच्यावरून तसेच अशा प्रकल्पासाठी लागणाऱ्या पाण्याच्या वापरावरूनही चर्चा सुरू आहे, याकडे त्यांनी लक्ष वेधले. म्हणूनच राज्यात असे उद्योग-व्यवसाय यायला हवेत, ज्यातून रोजगार मिळेल आणि निसर्गाची हानीही होणार नाही, असा सल्ला त्यांनी दिला.

गुजरातमधील टोरंट पॉवर कंपनीच्या प्रस्तावित जलविद्युत ऊर्जा साठवण प्रकल्पासाठी कर्जत-भीमाशंकर जंगल परिसरात जंगलतोड सुरू आहे. स्थानिकांनी आणि राज्यातील विरोधी पक्षांनीही या वृक्षतोडीला कडाडून विरोध केला आहे. जंगलातील अंदाजे तीन लाख झाडे तोडली जातील, अशी भीती स्थानिकांना वाटते. या मुद्द्यावरून महायुती सरकारवर पक्षपातीपणाचा आरोपही केला जात आहे.

स्थानिकांनी २५ ऑक्टोबरला महाराष्ट्र नवनिर्माण सेनेचे अध्यक्ष राज ठाकरे यांची भेट घेतली आणि त्यांना सगळी माहिती दिली. त्यानंतर राज ठाकरे कर्जत-भीमाशंकर परिसराचा दौरा करून प्रकल्पाची पाहणी करणार असल्याचे आणि तिथे सभाही घेणार असल्याचे त्यांनी सांगितले आहे.

भीमाशंकर येथील साई डोंगर परिसरात हा प्रकल्प उभारला जाणार आहे. त्यावर अंदाजे १३ हजार ५०० कोटी रुपये खर्च होणार असून प्रकल्पाची क्षमता तीन हजार मेगावॅट असल्याची माहिती समोर आली आहे. जमीनमालकांच्या चिंता आणि पर्यावरण संरक्षणाच्या मागण्यांकडे दुर्लक्ष करून प्रकल्प पुढे नेला जात असल्याचा आरोप होत असल्याने भीमाशंकर परिसरातील स्थानिकांमध्ये नाराजी वाढत आहे.

तीन लाखांहून अधिक झाडे तोडली जाणार असल्याने परिसरातील जैवविविधतेवर गंभीर परिणाम होऊ शकतो, असे पर्यावरणप्रेमींचे म्हणणे आहे. पक्षी आणि वन्यजीवांचा नैसर्गिक अधिवास नष्ट होण्याची शक्यता त्यांनी व्यक्त केली आहे. तसेच डोंगरउतारावरील मृदासंवर्धन, नैसर्गिक जलप्रवाह, पारंपरिक शेती आणि पर्यटनावरही परिणाम होऊ शकतो, असे ते सांगतात.