बारामतीत जिल्हास्तरीय युवा महोत्सव उत्साहात; पाच कलाप्रकारांत १५० युवक-युवतींचा सहभाग

पुणे, दि. ०५ : जिल्हास्तरीय युवा महोत्सव २०२६-२७ बारामती येथील टी.सी. कॉलेजमध्ये उत्साहात पार पडला. या महोत्सवात समूह लोकनृत्य, समूह लोकगीत, चित्रकला, पथनाट्य आणि कविता लेखन या पाच कलाप्रकारांत जिल्ह्यातील सुमारे १५० युवक-युवतींनी भाग घेतला.

हा महोत्सव क्रीडा व युवक सेवा संचालनालय, महाराष्ट्र राज्य, जिल्हा क्रीडा अधिकारी कार्यालय, पुणे, नेहरू युवा केंद्र, पुणे, टी.सी. कॉलेज, बारामती आणि राष्ट्रीय एकात्मता विद्यार्थी संघटना यांनी संयुक्तपणे आयोजित केला होता.

महोत्सवाचे उद्घाटन दीपप्रज्वलनाने झाले. बारामती नगरपरिषदेचे नगराध्यक्ष सचिन सातव, क्रीडा व युवक सेवा पुणे विभागाचे उपसंचालक युवराज नाईक, जिल्हा युवा अधिकारी आशिष शेटे, राष्ट्रीय युवा पुरस्कारार्थी ताहेर आसी आणि टी.सी. कॉलेजचे प्राचार्य डॉ. अविनाश जगताप यांच्या हस्ते दीप प्रज्वलित करण्यात आला.

यावेळी बोलताना सचिन सातव यांनी सांगितले की, युवा महोत्सव हे युवकांमध्ये एकता, सामाजिक बांधिलकी आणि आत्मविश्वास निर्माण करणारे व्यासपीठ आहे. युवकांनी व्यसनांपासून दूर राहावे, ज्ञानार्जनाची आवड जोपासावी आणि आपल्या आवडीच्या क्षेत्रात उत्कृष्ट कामगिरी करण्यासाठी प्रयत्न करावेत, असे आवाहन त्यांनी केले.

हा महोत्सव 'नशामुक्त युवा फॉर विकसित भारत' या संकल्पनेवर आधारित होता. या महोत्सवातून युवकांमध्ये व्यसनमुक्तीबाबत जनजागृती होण्यास मदत होईल, असा विश्वास टी.सी. कॉलेजचे प्राचार्य डॉ. अविनाश जगताप यांनी व्यक्त केला.

उपसंचालक युवराज नाईक यांनी युवा महोत्सवाचे आयोजन जिल्हा पातळीपासून राष्ट्रीय पातळीपर्यंत कसे होते, याची माहिती दिली. तसेच सहभागी झालेल्या सर्व स्पर्धकांना त्यांनी शुभेच्छा दिल्या.

महोत्सवात वेगवेगळ्या कलाप्रकारांतील विजेत्यांना सन्मानचिन्ह आणि प्रमाणपत्र देऊन गौरवण्यात आले. पोलीस उपअधीक्षक चैतन्य कदम, कलाकार रामभाऊ जगताप आणि सुभाषराव मदने यांच्या हस्ते हे वितरण झाले. यावेळी चैतन्य कदम यांनी युवकांनी चांगल्या सवयी जोपासाव्यात आणि व्यसनमुक्त जीवन जगावे, असे आवाहन केले.

कार्यक्रमाचे प्रास्ताविक जिल्हा क्रीडा अधिकारी जगन्नाथ लकडे यांनी केले. इंदापूर येथील तालुका क्रीडा अधिकारी महेश चावले आणि स्पर्धा समन्वयक प्रा. भीमराव तोरणे यांनी शेवटी सर्वांचे आभार मानले.