राज ठाकरे: येत्या काही महिन्यांत देशात मोठं काही घडेल, बॅलेट पेपरवरच मतदान हवं

शिवसेनेच्या दसरा मेळाव्यात शिवसेना उबाठा पक्षप्रमुख उद्धव ठाकरे आणि खासदार संजय राऊत यांनी केंद्रातील मोदी सरकारवर जोरदार हल्ला चढवला. देशात हुकूमशाही सुरू आहे, आंदोलन करणाऱ्या विद्यार्थ्यांना मारहाण होत आहे, असं त्यांनी सांगितलं. एप्रिल महिन्यात मोदी सत्तेतून जातील, असा दावाही राऊत यांनी केला. आता मनसेप्रमुख राज ठाकरे यांनी राऊत यांच्या या बोलण्याला दुजोरा दिला आहे.

देशात निवडणुका बॅलेट पेपरवरच झाल्या पाहिजेत, अशी मागणी राज ठाकरे यांनी केली. पुढच्या दोन ते पाच महिन्यांत देशात काहीतरी मोठं होईल, गडबड होईल, एक छोटा काळ असा येईल की देशाला पंतप्रधान नसेल, असं ते म्हणाले. राऊत यांनी रेजीम चेंजबद्दल सांगितलं, त्यांच्याशी आपलं बोलणं झालं आहे, असंही राज यांनी नमूद केलं. एपस्टिन यांच्याबरोबरचा फोटो बाहेर आला आहे, अजून खूप गोष्टी बाहेर येणार, हे थांबणार नाही, सरकार चुकांवर चुका करत राहणार, असं त्यांचं म्हणणं होतं. येत्या काही वर्षांत देश रस्त्यावर आला तर आपल्याला नवल वाटणार नाही, असं भाकीत त्यांनी केलं.

बॅलेट पेपरबद्दल बोलताना राज म्हणाले की, 2018 पासून मतदान बॅलेट पेपरवर व्हावं यासाठी आपण प्रयत्न करत आहोत आणि आयुक्तांना भेटूनही बोललो होतो. आधी लोकांना हे कळत नव्हतं, पण आता कळत आहे. आपण मतदान केलं आणि ते मतपेटीत पडलं, हे समाधान मतदाराला मिळायला हवं; हरणं-जिंकणं हा वेगळा विषय आहे. पाकिस्तान, बांगलादेश, नेपाळमध्येही बॅलेट पेपरवर मतदान होतं, असं ते म्हणाले. फ्रान्समध्ये मशीन रद्द होऊन पुन्हा बॅलेट पेपर आले आहेत. विधानसभा आणि लोकसभा एकाच वेळी होत नाहीत. मतमोजणी पटापट होते, तरी निकाल उशिराच मिळतात. चार दिवस लागले तरी चालेल, घाई कोणाला आहे, असं त्यांनी विचारलं.

नीटच्या आंदोलनाच्या वेळी मुलं रस्त्यावर आली होती, ती फक्त नीटसाठी आली नव्हती. लोकांच्या मनात कुठला ना कुठला राग आहे, तो व्यक्त करण्यासाठी ती आली होती, असं राज यांनी सांगितलं. राज्यात दुष्काळ जाहीर झाला आहे, अन्नधान्याची टंचाई येईल, या परिस्थिती सरकारला झेपणाऱ्या नाहीत, असं ते म्हणाले. शांततेने आंदोलन करणाऱ्या मुलांवर लाठीचार्ज केला, त्यांनी काहीच केलं नव्हतं. भाजप जुने दिवस विसरला का, पुढच्या वेळी त्यांचं छायाचित्र लावा, असं म्हणत त्यांनी आंदोलकांची बाजू घेतली.

लोकशाही देशात कुठे आहे, अमेरिकेत आहे, आपल्याकडे नाही, असं राज म्हणाले. ऑस्कर पुरस्काराच्या वेळी अभिनेते ट्रम्पबद्दल काहीही बोलतात, पण तिथे फतवे निघत नाहीत. शबीर भाटिया यांनी अदानी आणि मोदी यांच्यावर डॉक्युमेंटरी केली आहे, ती काढून टाका असं पोलिसांनी सांगितलं आहे. मग फक्त भाजप स्पॉन्सर चित्रपटच पाहायचे का, असा सवाल त्यांनी केला. सत्तेचा अमरपट्टा घेऊन कोणीही आलेलं नाही, बदल गरजेचा असतो, हाफ पँटची फुल पँट झाली नाही का, असंही ते म्हणाले.

मर्डर केसमधल्या माणसाला जामीन दिला आणि सीजेपीच्या माणसाला अटक केली आहे, याकडे लक्ष वेधत उच्च न्यायालय आणि सर्वोच्च न्यायालयानेही आपण कसे निर्णय देतोय याचा विचार करावा, असं राज यांनी म्हटलं. कोणत्या संस्था स्वायत्त राहिल्या आहेत, पत्रकार तरी स्वायत्त राहिले आहेत का, असा प्रश्न त्यांनी विचारला. मोहन भागवत यांच्या हाती सत्ता नाही, ती देशाच्या जनतेच्या हाती आहे. 2014 साली सत्ता आली ती नरेंद्र मोदी यांच्यामुळे, आरएसएसमुळे नव्हे. सत्ता आम्ही आणली असा गैरसमज असेल तर तो चुकीचा आहे, असं म्हणत राज ठाकरे यांनी आरएसएसलाही सल्ला दिला.