दिवाळीत मिठाई घेताना सावध राहा, भेसळीबाबत तुकाराम मुंढे यांचा इशारा

दिवाळी आजपासून सुरू झाली आहे आणि दुकानांमध्ये मिठाई व खव्याची विक्री जोरात चालू झाली आहे. येत्या दिवसांत ही विक्री आणखी वाढणार आहे. त्याआधीच अन्न व औषध प्रशासन विभागाचे आयुक्त तुकाराम मुंढे यांनी नागरिकांना सावध राहण्याचा इशारा दिला आहे.

माध्यमांशी बोलताना मुंढे यांनी सांगितले की, लोकांनी गरजेपुरतीच मिठाई घ्यावी. दोन-तीन दिवसांपेक्षा जास्त वेळ दुकानात पडून असलेली खव्याची मिठाई घेऊ नये. मिठाई किंवा खवा घेताना काळजी घ्यावी, असे ते म्हणाले. नामांकित आणि लेबल असलेली मिठाई व खवाच घ्यावा, असेही त्यांनी सांगितले. कुणाला काही संशयास्पद वाटले किंवा भेसळीची तक्रार असली, तर एफडीएला कळवावे, योग्य ती कारवाई केली जाईल, असे मुंढे यांनी म्हटले आहे. मिठाई दुकानदारांनीही आणि इतर आस्थापनांनीही योग्य ती खबरदारी घेणे गरजेचे आहे, असेही त्यांनी नमूद केले.

बनावट मिठाई कशी ओळखायची, याबद्दलही त्यांनी सांगितले. खूप रंग वापरलेली, भडक रंगाची मिठाई घेऊ नये. पाकिटावर मिठाईची किंवा खव्याची तयार केल्याची तारीख असेल, तरच ती विकत घ्यावी. सोन्याचा किंवा चांदीचा वर्ख लावलेल्या मिठाईबाबत विशेष काळजी घ्यावी. चांदीचा वर्ख तपासूनच घ्यावा. वर्ख हातात घेतल्यावर तो विरघळला, तर तो योग्य समजावा. पण त्याची फॉईल तयार होत असेल, तर तो अल्युमिनियम फॉईल आहे असे समजावे, असे मुंढे यांनी सांगितले.

नागरिकांचे आरोग्य चांगले ठेवणे हे आमचे काम आहे, असे सांगत मुंढे यांनी सणासुदीच्या काळात राज्यभर मोहीम राबवल्याचे सांगितले. 1 सप्टेंबर ते 3 नोव्हेंबर या काळात एकूण 954 लायसन्स निलंबित करण्यात आले. 64 कोटी 45 लाख रुपये किमतीचा अन्नसाठा जप्त करण्यात आला. याच काळात 9667 अन्न आस्थापनांची तपासणी झाली, 4603 आस्थापनांना नोटीस देण्यात आली आणि तपासणीसाठी 8835 अन्न नमुने घेण्यात आले. एकूण 398 टन अन्नसाठा जप्त केल्याची माहिती त्यांनी दिली.

दिवाळीच्या काळातील कारवाईचीही आकडेवारी त्यांनी दिली. 15 ऑक्टोबर ते 3 नोव्हेंबर दरम्यान 3332 अन्न आस्थापनांची तपासणी झाली आणि 1501 आस्थापनांना नोटीस देण्यात आली. 326 लायसन्स निलंबित करण्यात आले, तर 15 परवाने रद्द करण्यात आले. 1828 टन अन्नसाठा जप्त करण्यात आला. दिवाळीच्या निमित्ताने परराज्यातून आलेला खवा, मावा, दूध, पनीर, खाद्यतेल, खाद्यरंग आणि इतर वस्तूंची तपासणी करण्यात आली आहे.