पुणे, रत्नागिरीत धो धो पाऊस; मुरासू चक्रीवादळामुळे वातावरण बदलले, 24 तासांसाठी इशारा

भारतीय हवामान विभागाने राज्यात पावसाचा मोठा इशारा दिला होता. त्यानंतर राज्यातील अनेक भागांत पाऊस कोसळताना दिसत आहे. पुणे जिल्ह्यातही चांगलाच मुसळधार पाऊस झाला असून काही ठिकाणी रस्त्यांवर पाणी साचले.

बारामती शहरात आणि आजूबाजूच्या परिसरात रात्रीपासून सतत जोरदार पाऊस सुरू आहे. त्यामुळे लोकांचे रोजचे जीवन विस्कळीत झाले आहे. शहरातील अनेक भागांत पाणी साचण्याची परिस्थिती निर्माण झाली आहे. विशेषतः बारामती-भिगवण रोडवर पावसाचे पाणी मोठ्या प्रमाणात जमा झाल्याने हा रस्ता पूर्णपणे पाण्याखाली गेला. अशा रस्त्यावरून गाडी चालवणे धोकादायक झाले असून रस्ता पाण्याखाली गेल्याने वाहनचालकांना अडचणींना तोंड द्यावे लागत आहे.

चाकण परिसरालाही अवकाळी पावसाने अक्षरशः धुवून काढले. काही वेळ पडलेल्या जोरदार पावसानेही शहरातील रस्त्यांची वाईट अवस्था पुन्हा एकदा सर्वांसमोर आणली. चाकणमधील अनेक रस्त्यांना अक्षरशः नदीचे रूप आले होते. पुणे-नाशिक महामार्गावर आणि तळेगाव-चाकण-शिक्रापूर महामार्गावर सगळीकडे पाणीच पाणी साचल्याचे चित्र दिसत होते. रस्ते वाहतुकीसाठी आहेत की पावसाचे पाणी साठवण्यासाठी, असा संतप्त सवाल आता नागरिक विचारत आहेत.

पुणे जिल्ह्यातील भोर तालुक्यात खेड शिवापूर परिसरात काल संध्याकाळी मुसळधार पाऊस पडला. काही वेळ पडलेल्या या पावसाने पुणे-सातारा महामार्गावर पाणीच पाणी झाले. खेड शिवापूर उड्डाणपुलाजवळचा महामार्गावरील रस्ता पाण्याखाली गेला. रस्त्यावर इतके पाणी साचले की वाहनचालकांना त्यातून वाट काढताना कसरत करावी लागली. मात्र या पावसामुळे हवेत गारवा पसरला. गेले काही दिवस उकाड्याने हैराण झालेल्या नागरिकांना त्यामुळे काही प्रमाणात दिलासा मिळाला.

रत्नागिरीत काल जवळपास दीड तास पाऊस पडला आणि त्यामुळे तिथे दाणादाण उडाली. कापून ठेवलेला भात अवकाळी पावसात भिजला आणि त्याचे मोठे नुकसान झाले. रत्नागिरी जिल्ह्यातील शेतकऱ्यांना याचा मोठा फटका बसला आहे.

आजही कोकणात पावसाचा इशारा देण्यात आला आहे. बंगालच्या उपसागरात तयार झालेल्या मुरासू चक्रीवादळामुळे महाराष्ट्रात पावसाला पोषक वातावरण निर्माण झाले. कोकणात काही ठिकाणी ढगाळ हवा राहील आणि हलक्या ते मध्यम सरी पडण्याची शक्यता आहे. कोकणातील रत्नागिरी, सिंधुदुर्ग आणि रायगडमधील काही जिल्ह्यांत विजांच्या कडकडाटासह वादळी पावसाचा अंदाज वर्तवण्यात आला असून या भागांसाठी येलो अलर्ट जारी करण्यात आला आहे. मुंबईत आज ढगाळ हवा राहण्याची शक्यता असून हलका पाऊस पडू शकतो.