बोध कीर्तन पुस्तकाचे प्रकाशन: उद्धव आणि राज ठाकरेंसमोर संजय राऊत यांची तुफान फटकेबाजी

शिवसेना खासदार संजय राऊत यांनी लिहिलेल्या बोध कीर्तन या पुस्तकाचा प्रकाशन सोहळा पार पडला. शिवसेना पक्षप्रमुख उद्धव ठाकरे, मनसे अध्यक्ष राज ठाकरे आणि लेखक अंबरिश मिश्र हे कार्यक्रमाचे प्रमुख पाहुणे होते. या सोहळ्यात राऊत यांनी चांगलीच फटकेबाजी केली.

"महाराष्ट्रामध्ये प्रत्येक पुस्तकाचा एक उत्सव साजरा व्हावा म्हणून मी माझ्या प्रत्येक पुस्तकाचा कार्यक्रम करतो," असे राऊत म्हणाले. खाद्यपदार्थांचे किंवा कपड्यांचे उत्सव आपण नेहमी साजरे करतो, पण महाराष्ट्राच्या राजधानीत मराठी साहित्यासाठी लोक एकत्र येतात आणि संवाद साधतात हे सिद्ध करण्यासाठी अशा साहित्यिक कार्यक्रमांना प्राधान्य दिले पाहिजे, असे त्यांनी सांगितले.

संजय राऊत आध्यात्मिक असू शकत नाही का, असा सवाल करत ते म्हणाले की ते दररोज 10 वाजता कीर्तन करत असतात. पुस्तकाच्या 'बोध कीर्तन' या नावावरून काहींना वाटते की राऊत आध्यात्मिक कसे असू शकतात, असाही उल्लेख त्यांनी केला. "उत्तम वक्ता हा उत्तम कीर्तनकार असावा लागतो," असे सांगून त्यांनी स्पष्ट केले की वक्त्याकडे सांगण्यासारखे काही असेल तरच तो उत्तम कीर्तन करू शकतो. अशाच कीर्तनकाराला जास्त श्रोते लाभतात, असेही ते म्हणाले.

तुरुंगातल्या दिवसांबद्दल बोलताना राऊत म्हणाले, "मला तुरुंगात जे 105 दिवस मिळाले, त्यात कामच नव्हते; अधूनमधून लेखकांना तुरुंगात पाठवायला पाहिजे, त्यामुळे उत्तम साहित्य निर्माण होईल." वीर सावरकर, लोकमान्य टिळक, जयप्रकाश नारायण, गॉर्की, स्टालिन आणि लेनिन यांचे उत्तम साहित्य तुरुंगातच निर्माण झाले आणि क्रांतीची ठिणगीही तिकडेच पडते, असे त्यांनी सांगितले.

कोठडीचा एक किस्साही त्यांनी सांगितला. "आम्हाला ज्या कोठडीत ठेवले होते, त्याच्या बाजूला २-बीएचके हॉलसारखी सुंदर कोठडी होती," असे ते म्हणाले. आम्ही जेलरकडे तिथे शिफ्ट करण्याची मागणी करायचो, तेव्हा ते सांगायचे की लंडनच्या कोर्टाला मानवी हक्कांचे पालन होत असल्याचे दाखवण्यासाठी ही कोठडी निरव मोदी किंवा विजय मल्या यांच्यासाठी राखून ठेवलेली आहे.

"मोदी काय माझे व्यक्तिगत शत्रू आहेत?" असा प्रश्न राऊत यांनी विचारला. अयोध्येत राम मंदिर प्राणप्रतिष्ठापनेच्या वेळी मोदी यांनी प्रभू श्रीरामांवर केलेले भाषण आपण तुरुंगात असताना ऐकले आणि लिहून काढले, असे त्यांनी सांगितले. समोर टेलिप्रॉम्प्टर नसताना केलेले ते उस्फूर्त अराजकीय भाषण त्यांच्या आतापर्यंतच्या सर्व भाषणांमधील एक उत्तम नमुना होते, म्हणून त्याचा पुस्तकात समावेश केला आहे, असेही राऊत म्हणाले.

"मी पण माणूस आहे, आपल्यालाही भावना असतात, कविता आवडतात," असे सांगत त्यांनी पुस्तकाच्या जडणघडणीबद्दल सांगितले. प्रसिद्ध कवी ग्रेस हे 'सामना' येथील त्यांच्या कॅबिनमध्ये येऊन तासंतास बसायचे. अशा अनेक साहित्यिक मित्रांशी झालेल्या संवादातून हे पुस्तक आकारास आले आहे, असे राऊत यांनी सांगितले.