नोव्हेंबरमध्येही पाऊस कोसळणार, पंजाबराव डख यांनी सांगितले कधी आणि कुठे

बंगालच्या उपसागरात कमी दाबाचे क्षेत्र तयार झाले आहे. पुढील २४ तासांत त्याचे चक्रीवादळात रूपांतर होण्याची शक्यता आहे. भारतीय हवामान खात्याने (IMD) दिलेल्या माहितीनुसार, हे वादळ २ नोव्हेंबरच्या संध्याकाळपर्यंत आंध्र प्रदेशच्या किनारपट्टीवर पोहोचू शकते. या वादळामुळे किनारपट्टीच्या भागात मुसळधार पाऊस पडण्याचा आणि वेगवान वारे वाहण्याचा धोका वर्तवण्यात आला आहे.

याच दरम्यान हवामान तज्ज्ञ पंजाबराव डख (Panjabrao Dakh) यांनी महाराष्ट्रातील पावसाचा अंदाज व्यक्त केला आहे. डख यांच्या अंदाजानुसार, १ ते ४ नोव्हेंबर २०२६ या काळात राज्यात काही भागांत अवकाळी पाऊस किंवा स्थानिक वातावरणामुळे पडणारा पाऊस होण्याची शक्यता आहे. १, २, ३ आणि ४ नोव्हेंबर या चार दिवसांत राज्यात विखुरलेल्या स्वरूपात, तसेच स्थानिक वातावरणामुळे वादळी पाऊस पडू शकतो, असा अंदाज वर्तवण्यात आला आहे. नोव्हेंबरच्या सुरुवातीला महाराष्ट्रात अनेक ठिकाणी पाऊस पडेल, असे डख म्हणाले.

पश्चिम महाराष्ट्रातील पुणे जिल्ह्यात मेघगर्जनेसह सरी पडण्याची जास्त शक्यता आहे. पुण्याच्या घाटमाथा परिसरातही पावसाचा अंदाज आहे. कोल्हापूर जिल्हा आणि तिथला घाटमाथा परिसर इथेही मेघगर्जनेसह सरी येऊ शकतात. सातारा आणि सांगली जिल्ह्यांतही पावसाची शक्यता कायम आहे. सोलापूर जिल्ह्यात मात्र हवामान कोरडे राहण्याची शक्यता आहे.

विदर्भातील भंडारा, चंद्रपूर, गडचिरोली, गोंदिया, नागपूर आणि यवतमाळ या जिल्ह्यांत मेघगर्जनेसह पाऊस पडेल, असा अंदाज आहे. मराठवाडा विभागातील लातूर आणि धाराशिव जिल्ह्यांतही मेघगर्जनेसह सरी कोसळण्याचा अंदाज वर्तवण्यात आला आहे.

छत्रपती संभाजीनगर शहरात आणि आसपासच्या परिसरात हलकासा पाऊस झाला. आज दुपारी शहर परिसरात ढगाळ वातावरण होते आणि हलका पाऊस पडला, त्यामुळे थोडा गारवा निर्माण झाला. यंदाच्या पावसाळ्यात सुरुवातीला काही दिवस पाऊस झाला होता. पण नंतर पूर्ण पावसाळा कोरडा गेला, त्यामुळे सगळेजण चातकासारखी पावसाची वाट पाहत आहेत. आजच्या हलक्या पावसाने आणखी पाऊस येईल, अशी आशा निर्माण झाली आहे.

बीड जिल्ह्यातल्या आष्टीतही पावसाने हजेरी लावली. काल संध्याकाळी ढग दाटून आले आणि थोड्याच वेळात पाऊस सुरू झाला. त्यामुळे वातावरणात गारवा आला आणि नागरिकांना काहीसा दिलासा मिळणार आहे. तरीही संपूर्ण बीड जिल्ह्यात शेतकऱ्यांना आणि नागरिकांना अजून मोठ्या पावसाची प्रतीक्षा आहे. हा पाऊस कधी पडणार, म्हणून बळीराजाच्या नजरा आकाशाकडे लागलेल्या आहेत.