विराट कोहलीची लिंक्डइनवर एंट्री, अवघ्या १० तासांत एक लाख फॉलोअर्स
भारतीय संघाचा माजी कर्णधार विराट कोहली याने लिंक्डइनवर पदार्पण केले असून पहिल्या पोस्टला चाहत्यांचा मोठा प्रतिसाद मिळाला आहे.
छायाचित्रे सत्यापित केलेली नाहीत
भारतीय क्रिकेट संघाचा माजी कर्णधार आणि स्टार फलंदाज विराट कोहली याने वयाच्या ३७ व्या वर्षी लिंक्डइन या प्रोफेशनल नेटवर्किंग प्लॅटफॉर्मवर नवी सुरुवात केली आहे. या प्लॅटफॉर्मवर येताच अवघ्या १० तासांत त्याच्या नावावर १,००,००० फॉलोअर्स जमा झाले. पहिल्याच दिवशी त्याच्या या पदार्पणाची जोरदार चर्चा झाली.
आपल्या प्रोफाइलमध्ये कोहलीने स्वतःची ओळख भारतीय क्रिकेट नियामक मंडळाचा (BCCI) व्यावसायिक खेळाडू अशी करून दिली आहे. एवढेच नाही, तर त्याने स्वतःला बिझनेसमॅन असेही संबोधले आहे. अ‍ॅगिलाटासमध्ये आपण गुंतवणूकदार आहोत आणि वन८वर्ल्डचा सह-संस्थापक आहोत, असेही त्याने सांगितले आहे.
क्रिकेटच्या मैदानावर आपली छाप सोडणारा कोहली आता प्रोफेशनल नेटवर्किंग प्लॅटफॉर्मवर का आला, याबद्दल चाहत्यांमध्ये चर्चा सुरू झाली आहे.
लिंक्डइनवर टाकलेल्या कोहलीच्या पहिल्या पोस्टला चाहत्यांकडून प्रचंड प्रेम मिळाले आहे. अवघ्या काही तासांतच या पोस्टला हजारो लाईक्स, शेकडो कमेंट्स आणि रिपोस्ट्स मिळाले. या पोस्टमधून या स्टार फलंदाजाने भारतीय खेळांच्या भविष्याबद्दलची आपली दृष्टी मांडली, तसेच प्रोफेशनल क्रिकेटपटू म्हणून निवृत्त झाल्यानंतरही व्यवसाय उभारण्याची आपली महत्त्वाकांक्षा बोलून दाखवली.
आपल्या पहिल्या पोस्टमध्ये विराट कोहलीने लिहिले की, 'मला नेहमीच एक असा भारत पाहायचा होता, जिथे प्रत्येक खेळाला फॉलो केले जाईल, तो साजरा केला जाईल आणि खेळला जाईल. आज, ते व्हिजन पूर्वीपेक्षा अधिक जवळ आल्यासारखे वाटते. एक नवीन पिढी हे सिद्ध करत आहे की, भारत जागतिक दर्जाचे खेळाडू निर्माण करू शकतो आणि जागतिक स्तरावर ब्रँड तयार करू शकतो.'
त्याने पुढे लिहिले की, 'प्रोडक्ट, कस्टमर ब्रँड आणि स्पोर्ट्स डिस्ट्रीब्युशन यांचा समावेश असलेला, भारतातून एक संपूर्ण स्पोर्ट्स प्लॅटफॉर्म तयार करणे हे आमचे ध्येय आहे. आमचा विश्वास आहे की, भारत केवळ जागतिक क्रीडा प्रकारात सहभागी होऊ शकत नाही, तर त्याचे भविष्य घडविण्यातही मदत करू शकतो. याच कारणामुळे मी गुंतवणूकदार आणि One8World चा को-फाउंडर को- क्रिएटर म्हणून Agilitas मध्ये सामील झालो आहे.'
मैदानाकडे पाहिले, तर कोहली अलीकडेच वेस्ट इंडिजविरुद्धच्या तीन सामन्यांच्या एकदिवसीय मालिकेत खेळताना दिसला होता. त्या मालिकेत त्याने आपले ८६ वे शतक झळकावले.
आता भारतीय संघ न्यूझीलंड दौऱ्यावर जाणार आहे. या दौऱ्यादरम्यान कोहली पुन्हा एकदा मैदानावर खेळताना दिसेल, त्यामुळे चाहत्यांना त्याला पुन्हा खेळताना पाहता येईल.
