सातारा, सांगली, अहिल्यानगर जिल्हा बँकांचे निकाल जाहीर; साताऱ्यात भाजपला ९ जागा, सांगलीत संजय काका पाटील

मुंबई : राज्यातल्या सहकार क्षेत्राचं लक्ष लागून राहिलेल्या सातारा, सांगली आणि अहिल्यानगर या तीन जिल्हा मध्यवर्ती सहकारी बँकांच्या निवडणुकांचे निकाल जाहीर झाले आहेत. या निकालांमुळे राज्यातल्या स्थानिक राजकारणाची नवी समीकरणं समोर आली आहेत. अहिल्यानगरमध्ये विखे-थोरात पॅनेलने वर्चस्व मिळवलं, सांगलीत अपक्ष संजय काका पाटील यांच्या विजयामुळे सत्तेची गणितं बदलली, तर साताऱ्यात कोणाची सत्ता येणार, याबद्दल उत्सुकता वाढली आहे.

सातारा जिल्हा मध्यवर्ती सहकारी बँकेच्या २१ संचालकपदांसाठी निवडणूक झाली. त्यात भाजपने ९ जागा जिंकल्या. अजित पवार यांच्या राष्ट्रवादी काँग्रेसला ८ जागा मिळाल्या, तर एकनाथ शिंदे यांच्या शिवसेनेला ४ जागा मिळाल्या. म्हणजेच भाजप साताऱ्यात सर्वाधिक जागा मिळवणारा पक्ष ठरला, पण सत्तेचा पेच अजूनही कायम आहे.

विशेष म्हणजे, राज्यात महायुतीत एकत्र असलेले हे तिन्ही पक्ष साताऱ्यात मात्र एकमेकांविरोधात लढले. त्यामुळे आता बँकेच्या अध्यक्षपदासाठी कोणतं राजकीय समीकरण जुळणार, याकडे सगळ्यांचं लक्ष लागलं आहे.

अहिल्यानगर जिल्हा बँकेत राधाकृष्ण विखे पाटील आणि बाळासाहेब थोरात यांच्या नेतृत्वाखालील सहकार विकास पॅनेलने २१ पैकी तब्बल १८ जागा जिंकल्या. भाजप नेते राम शिंदे यांच्या गटाला २ जागा मिळाल्या, तर शरद पवार यांच्या राष्ट्रवादीचे खासदार निलेश लंके यांनीही विजय मिळवला. त्यामुळे या जिल्हा बँकेत विखे-थोरात गटाचं वर्चस्व स्पष्ट झालं आहे.

सांगली जिल्हा बँकेच्या निवडणुकीत मात्र वेगळंच चित्र पाहायला मिळालं. काँग्रेस आघाडीला ६ जागा मिळाल्या, भाजपला ५, शरद पवार यांच्या राष्ट्रवादीला ४, शिवसेनेला ३ आणि अजित पवार यांच्या राष्ट्रवादीला २ जागा मिळाल्या.

माजी खासदार संजय काका पाटील यांनी अपक्ष म्हणून विजय मिळवला. विशेष म्हणजे, त्यांचा विजय अवघ्या २ मतांनी झाला. सत्ता स्थापनेसाठी ११ जागा लागतात आणि त्या गणितात त्यांची भूमिका महत्त्वाची ठरणार आहे. त्यामुळे सांगलीत ते किंगमेकर ठरणार, असं चित्र आहे.

एकूणच, तीन जिल्ह्यांतल्या या निकालांनी सहकार क्षेत्रातली राजकीय समीकरणं बदलली आहेत. अहिल्यानगरमध्ये चित्र स्पष्ट झालं असलं, तरी सातारा आणि सांगलीत सत्तास्थापनेसाठी काय हालचाली होतात, याकडे आता सर्वांचं लक्ष असणार आहे.