सातारा जिल्हा बँकेच्या निवडणुकीत विक्रमी ९७.९२ टक्के मतदान, २८ उमेदवारांचे भवितव्य मतपेटीत बंद

सातारा जिल्हा मध्यवर्ती सहकारी बँकेच्या सत्तेचा ताबा मिळवण्यासाठी सुरू असलेल्या राजकीय संघर्षात मतदारांनी मोठ्या संख्येने हजेरी लावली. अकराही तालुक्यांतील एकूण २ हजार २१ मतदारांपैकी १ हजार ९७९ जणांनी मतदान केले. त्यामुळे ९७.९२ टक्के मतदानाची नोंद झाली आणि हा उच्चांक ठरला आहे.

बारा जागांसाठी २८ उमेदवार मैदानात होते. त्या सर्वांचे भवितव्य आता मतपेट्यांत बंद झाले आहे. मतमोजणी ३ नोव्हेंबरला होणार असून, त्यातून जिल्ह्यातील सहकाराच्या राजकारणाची पुढची दिशा ठरणार आहे. इतक्या मोठ्या प्रमाणात मतदान झाल्याने नेत्यांच्या विजयाच्या दाव्यांची कसोटी लागणार आहे आणि अनेक राजकीय दिग्गजांची धाकधूक वाढली आहे.

जिल्हा बँकेच्या या निवडणुकीला यंदा सुरुवातीपासूनच राजकीय प्रतिष्ठेचे स्वरूप आले होते. महायुतीतील अंतर्गत समीकरणे, नेत्यांचे शक्तिप्रदर्शन आणि स्थानिक पातळीवरील राजकीय संघर्ष यामुळे लढत कमालीची चुरशीची झाली. मतदानाच्या दिवशीही प्रत्येक मतासाठी नेत्यांच्या यंत्रणा कामाला लागल्या होत्या. विशेषतः कराड, पाटण, माण, महाबळेश्वर आणि फलटण येथील लढतींमुळे राजकीय वातावरण तापले होते.

तालुकानिहाय आकडे पाहिले तर पाटणमध्ये सर्वाधिक ९८.९९ टक्के मतदान झाले. त्यानंतर साताऱ्यात ९८.७३ आणि कराडमध्ये ९८.२१ टक्के मतदानाची नोंद झाली. कोरेगाव, खंडाळा आणि वाई या तालुक्यांत शंभर टक्के मतदान झाले. जावलीत ९४.२०, महाबळेश्वरमध्ये ९०.२०, खटावमध्ये ९६.६६, माणमध्ये ९६.७४ आणि फलटणमध्ये ९६.१९ टक्के मतदान झाले. एकूण मतदानात १ हजार ८१८ पुरुष आणि १६१ महिला मतदारांचा समावेश आहे.

साताऱ्यातील आयटीआय केंद्रावर खासदार उदयनराजे भोसले आणि सार्वजनिक बांधकाम मंत्री शिवेंद्रसिंहराजे भोसले यांनी मतदान केले. भाजपच्या कोअर टीमची उपस्थितीही लक्षवेधी ठरली. शिवेंद्रसिंहराजे हे उमेदवार नाहीत, तरीही निवडणुकीचे नियोजन आणि राजकीय मोर्चेबांधणी यात त्यांची भूमिका महत्त्वाची राहिली. त्यांनी सातारा आणि मेढा येथे भेट देऊन मतदान प्रक्रियेचा आढावा घेतला.

विक्रमी मतदान म्हणजे सत्ताधारी गटाला पाठिंबा आहे की प्रस्थापितांविरोधातील नाराजी, याबद्दल आता तर्कवितर्क सुरू झाले आहेत. शंभर टक्के मतदान झालेल्या तालुक्यांचा कौल कोणाच्या बाजूने जाणार, याविषयी उत्सुकता आहे. कराड-पाटणमधील प्रतिष्ठेच्या लढती आणि माण-महाबळेश्वरमधील मतविभाजन यामुळे निकालाचे गणित बदलू शकते. मतदानाचा टक्का वाढला म्हणून विजय निश्चित मानणे कोणत्याही गटाला परवडणारे नाही. ३ नोव्हेंबरला मतपेट्या उघडल्यानंतरच नेत्यांच्या शक्तिप्रदर्शनाचा खरा हिशेब समोर येईल. जिल्हा बँकेच्या सत्तेचा मुकुट कोणाच्या डोक्यावर चढणार, यासाठी आता अवघ्या जिल्ह्याचे लक्ष निकालाकडे लागले आहे.