अकोल्यात पाणीटंचाईचे संकट गडद, शहराला आता दहा दिवसाआड पाणी

अकोला शहरात आता दहा दिवसाआड, म्हणजेच अकराव्या दिवशी नळाला पाणी येत आहे. यंदा पाऊस अत्यल्प पडल्याने राज्यभरात कोरड्या दुष्काळासारखी परिस्थिती तयार झाली आहे आणि त्याच्या झळा अकोला जिल्ह्यालाही जाणवू लागल्या आहेत. शहरासह संपूर्ण जिल्ह्यात पाणीपुरवठा करणाऱ्या प्रकल्पांमध्ये अगदी थोडा जलसाठा शिल्लक आहे. त्यामुळे ऐन हिवाळ्यातच पाणीकपात करण्याची वेळ प्रशासनावर आली आहे. ग्रामीण भागातही कमी-अधिक फरकाने हीच स्थिती दिसत आहे.

शहराला पाणी देणारा काटेपूर्णा प्रकल्प बार्शीटाकळी तालुक्यातील महान येथे आहे. या प्रकल्पात फक्त १६ टक्के जलसाठा शिल्लक राहिला आहे. म्हणून दहा दिवसाआड पाणीपुरवठा करण्याचा निर्णय महापालिका प्रशासनाने घेतला आहे. काटेपूर्णा धरणातील पाणीसाठा दिवसेंदिवस कमी होत चालला आहे. आधी सात दिवसाआड, म्हणजे आठव्या दिवशी पाणी दिले जात होते. ते आता ४ ऑक्टोबर २०२६ पासून दहा दिवसाआड, म्हणजे अकराव्या दिवशी देण्यात येत आहे.

यंदा पावसाने सुरुवातीपासूनच दडी मारली. त्यामुळे जलसाठ्यांमध्ये अपेक्षित पाणी जमा झाले नाही. जिल्ह्यातील बहुतांश प्रकल्प निम्म्यापेक्षाही कमी भरले आहेत. मागच्या वर्षी काटेपूर्णा प्रकल्पातून दोन ते तीनदा पाणी सोडावे लागले होते. यंदा मात्र याच प्रकल्पात फक्त १६ टक्के साठा आहे. त्यामुळे पाणीटंचाईचे संकट गडद झाले असून त्यावर उपाय करण्यासाठी प्रशासनाची धावपळ सुरू आहे.

शहरात पाणीपुरवठा अनेक जलकुंभांमधून केला जातो. महाजनी जलकुंभ, मोठी उमरी, गुडधी जलकुंभ, नेहरु पार्क जलकुंभ, तोष्णीवाल जलकुंभ, आदर्श कॉलनी जलकुंभ, केशवनगर जलकुंभ, रेल्वे स्टेशन जलकुंभ, गंगानगर जलकुंभ, अकोट फैल जलकुंभ, जोगळेकर प्लॉट जलकुंभ आणि लोकमान्य नगर जलकुंभ यांच्यावरून शहराच्या मूळ हद्दीतील मलकापूर, शिवापूर, खडकी, शिवर, उमरी, गुडधी, न्यू तापडियानगर, हिंगणा, सोमठाणा, गीतानगर, गंगानगर, अयोध्यानगर, मेहरेनगर, गजानननगर, आश्रयनगर आणि डाबकी या भागांत पाणी जाते. हद्दवाढ भागात शिवनगर जलकुंभ, आश्रयनगर जलकुंभ, बस स्टॅण्ड जलकुंभ आणि शिवणी जलकुंभ येथून पाणीपुरवठा केला जातो.

अकराव्या दिवशी नळाला पाणी येत असल्याने नागरिकांची अडचण झाली आहे. जुनेशहर, अकोला येथील प्रीती देशमुख म्हणाल्या, की गेल्या काही दिवसांपासून दहा दिवसाआड, अकराव्या दिवशी नळाला पाणी येते आणि त्यामुळे अडचण निर्माण झाली आहे. पिण्याचे पाणी दहा दिवसांसाठी कुठे साठवायचे, असा प्रश्न पडला आहे. तरीही जमेल तसे पाणी साठवून आम्ही पिण्याच्या पाण्याचा प्रश्न भागवतो, असे त्यांनी सांगितले.