'रामायण: पार्ट वन' थिएटरनंतर जिओहॉटस्टारवर पे-पर-व्ह्यूने पाहता येणार

'रामायण' हे भारतीय महाकाव्य मोठ्या पडद्यावर आल्यानंतर ते देशभरातील जास्तीत जास्त प्रेक्षकांपर्यंत पोहोचावे, यासाठी निर्माते नमित मल्होत्रा यांनी नवा उपक्रम हाती घेतला आहे. प्राइम फोकस स्टुडिओज आणि जिओहॉटस्टार यांच्यात त्यासाठी भागीदारी झाली आहे. या भागीदारीनुसार 'रामायण: पार्ट वन' हा चित्रपट थिएटरमधील प्रदर्शनानंतर डिजिटल माध्यमातून प्रेक्षकांना पाहता येईल.

विशेष म्हणजे, जिओहॉटस्टारवर पहिल्यांदाच पे-पर-व्ह्यू सुविधा उपलब्ध होणार आहे. म्हणजे प्रेक्षकांना वेगळे पैसे देऊन हा चित्रपट पाहता येईल.

नमित मल्होत्रा यांची निर्मिती असलेला 'रामायण: पार्ट वन' ५ नोव्हेंबर २०२६ रोजी जगभरातील चित्रपटगृहांमध्ये प्रदर्शित होणार आहे. हिंदीसह तमिळ, तेलुगू, कन्नड, मल्याळम आणि इंग्रजी या भाषांमध्ये तो प्रेक्षकांच्या भेटीला येईल. IMAX 3D सह प्रीमियम सिनेमॅटिक फॉरमॅट्सचाही त्यासाठी विचार करण्यात आला आहे.

थिएटरमधील प्रदर्शनाचा कालावधी संपल्यानंतर भारतीय प्रेक्षकांना जिओहॉटस्टारवर खास ऑन-डिमांड खरेदी पर्यायाने हा चित्रपट पाहता येईल. नेहमीच्या सबस्क्रिप्शनसोबतच चित्रपट स्वतंत्रपणे विकत घेऊन पाहण्याचा पर्याय यामुळे मिळणार आहे. जिओहॉटस्टारची तांत्रिक क्षमता आणि मोठी डिजिटल पोहोच यांच्या मदतीने देशभरातील प्रेक्षकांपर्यंत चित्रपट नेणे, हा या भागीदारीचा उद्देश आहे.

या भागीदारीबद्दल बोलताना मल्होत्रा यांनी 'रामायण'चा अनुभव सर्वात मोठ्या पडद्यावर आणि IMAX 3D मध्ये घेण्याचे महत्त्व सांगितले. मात्र देशातील चित्रपटगृहांची पायाभूत सुविधा या महाकाव्याशी भावनिक नाते असलेल्या प्रत्येकापर्यंत पोहोचू शकत नाही, असेही त्यांनी नमूद केले. 'रामायण हे प्रत्येक भारतीयाचं आहे,' या भावनेतून थिएटरनंतर चित्रपट लोकांच्या घराघरांत आणि हातातील उपकरणांवर पोहोचावा, अशी त्यांची इच्छा आहे. जिओहॉटस्टार हा त्यासाठी योग्य भागीदार असल्याचेही त्यांनी स्पष्ट केले.

जिओस्टारच्या अध्यक्षा नीता एम. अंबानी यांनीही आनंद व्यक्त केला. त्यांच्या मते 'रामायण' हे केवळ महाकाव्य नाही, तर भारताच्या सांस्कृतिक वारशाचा अविभाज्य भाग आहे. या कथेने शतकानुशतके भारतीयांच्या सामूहिक जाणिवांना आकार दिला आणि त्यांच्या कल्पनाशक्तीला प्रेरणा दिली, असे त्या म्हणाल्या. तंत्रज्ञानाच्या मदतीने सर्वोत्तम कथा प्रत्येक भारतीयापर्यंत पोहोचवणे हे जिओहॉटस्टारचे ध्येय असल्याचे त्यांनी सांगितले. भव्य सिनेमॅटिक सादरीकरणातून देशभरातील कुटुंबांपर्यंत पोहोचण्याची संधी मिळणे अभिमानास्पद आहे, असेही त्यांनी म्हटले. नव्या पिढीला कर्तव्य, प्रेम, धैर्य आणि सद्गुण या महाकाव्यातील शाश्वत मूल्यांची ओळख करून देता येईल, असा विश्वास त्यांनी व्यक्त केला.

'रामायण'चे दिग्दर्शन नितेश तिवारी यांनी केले आहे. प्राइम फोकस स्टुडिओजची निर्मिती असलेल्या या दोन भागांच्या लाइव्ह-ॲक्शन सिनेमॅटिक सादरीकरणाची पटकथा श्रीधर राघवन यांनी लिहिली आहे. हा चित्रपट वाल्मीकी रामायणावर आधारित आहे.

चित्रपटात रणबीर कपूर भगवान राम, साई पल्लवी सीता, यश रावण, सनी देओल हनुमान आणि रवी दुबे लक्ष्मण यांच्या भूमिकेत दिसतील. अरुण गोविल, लारा दत्ता, रकुल प्रीत सिंग, विवेक ओबेरॉय, कुणाल कपूर आणि काजल अग्रवाल यांच्याही महत्त्वाच्या भूमिका आहेत.

ऑस्कर विजेते संगीतकार हान्स झिमर आणि ए. आर. रहमान यांनी चित्रपटाचे संगीत केले आहे. रवी बन्सल आणि रॅमसे एव्हरी यांनी प्रॉडक्शन डिझाइन केले, तर टेरी नॉटरी आणि गाय नॉरिस यांनी ॲक्शन कोरिओग्राफी सांभाळली आहे. आठ ऑस्कर पुरस्कार मिळवलेला प्रॉडक्शन आणि व्हिज्युअल इफेक्ट्स स्टुडिओ DNEG, तसेच यशची मॉन्स्टर माइंड क्रिएशन्स यांचेही निर्मितीत सहकार्य आहे. भारतीय आणि आंतरराष्ट्रीय चित्रपटसृष्टीतील प्रतिभावंतांना एकत्र आणून 'रामायण'चे विश्व भव्य स्वरूपात पडद्यावर साकारण्याचा निर्मात्यांचा प्रयत्न आहे.

थिएटर प्रदर्शनानंतर जिओहॉटस्टारवर मिळणारा स्वतंत्र खरेदीचा पर्याय चित्रपटाला जास्त मोठा प्रेक्षकवर्ग मिळवून देऊ शकतो. मात्र डिजिटल प्रदर्शनाची नेमकी तारीख आणि पे-पर-व्ह्यूची किंमत याबाबत अजून तपशील जाहीर झालेला नाही.