प्रभू रामानंतर आता राजा दशरथ! अरुण गोविल यांचा 'रामायण'मधील नवा लूक समोर

'रामायण' म्हटलं की आजही अनेक प्रेक्षकांच्या डोळ्यांसमोर अरुण गोविल यांचा प्रभू रामाच्या वेशातला चेहरा येतो. एका पिढीने त्यांच्या अभिनयातून प्रभू रामांना पाहिलं आणि त्यांची ती भूमिका भारतीय प्रेक्षकांच्या मनात कायमची राहिली. आता तेच अरुण गोविल पुन्हा एकदा 'रामायण'च्या विश्वात परतले आहेत. पण यावेळी ते प्रभू राम नाहीत, तर अयोध्येचे राजा आणि प्रभू रामांचे वडील दशरथ यांच्या भूमिकेत दिसणार आहेत.

नमित मल्होत्रा यांच्या 'रामायण'च्या निर्मात्यांनी सोशल मीडियावर अरुण गोविल यांचं राजा दशरथच्या भूमिकेतलं खास सोलो पोस्टर प्रदर्शित केलं आहे. म्हणजेच या पोस्टरमध्ये फक्त गोविल एकटेच दिसतात. ते राजेशाही रूपात दिसत असून, त्यांच्या लूकमधून अयोध्येच्या राजाची भव्यता, प्रतिष्ठा आणि अधिकार ठळकपणे जाणवतो.

पोस्टर शेअर करताना निर्मात्यांनी अरुण गोविल यांचं 'रामायण'शी असलेलं खास नातं अधोरेखित केलं. त्यांनी लिहिलं, "एका पिढीसाठी त्यांनी रामाला जिवंत केले. आता ते 'रामायण'च्या विश्वात अयोध्येचा राजा म्हणून परतले आहेत. राजा दशरथच्या भूमिकेत अरुण गोविल."

प्रभू रामाच्या भूमिकेसाठी संपूर्ण देशात ओळखले जाणारे गोविल आता त्याच रामाचे वडील म्हणजे राजा दशरथ म्हणून प्रेक्षकांना दिसणार आहेत. प्रेक्षकांना ही संधी पहिल्यांदाच मिळणार असल्यामुळे त्यांचा हा नवा लूक चांगलाच चर्चेत आला आहे. त्यांनी साकारलेला प्रभू राम आजही प्रेक्षकांच्या आठवणीत आहे, म्हणूनच त्यांना दशरथाच्या भूमिकेत पाहण्याची चाहत्यांमध्ये उत्सुकता निर्माण झाली आहे.

नितेश तिवारी दिग्दर्शित या 'रामायण'मध्ये रणबीर कपूर प्रभू रामांच्या भूमिकेत दिसणार आहेत. साई पल्लवी सीतेची भूमिका साकारत आहेत, तर रॉकिंग स्टार यश रावणाच्या भूमिकेत दिसणार आहे. सनी देओल हनुमान आणि रवी दुबे लक्ष्मणाच्या भूमिकेत असतील.

नमित मल्होत्रा यांच्या प्राइम फोकस स्टुडिओजच्या निर्मितीखाली, DNEG आणि यश यांच्या मॉन्स्टर माइंड क्रिएशन्सच्या सहकार्याने 'रामायण'ची निर्मिती होत आहे. हा दोन भागांत प्रदर्शित होणारा भव्य महाकाव्यात्मक चित्रपट आहे. पहिला भाग ५ नोव्हेंबर २०२६ रोजी जगभरात प्रदर्शित होणार असून, दुसरा भाग दिवाळी २०२७ मध्ये प्रेक्षकांच्या भेटीला येईल.

भारतात हा चित्रपट हिंदी, तमिळ, तेलुगू, कन्नड आणि मल्याळम भाषांमध्ये प्रदर्शित होणार आहे. तो IMAXमध्येही दाखवला जाईल. भारताबाहेरच्या वितरणाची जबाबदारी सोनी पिक्चर्सकडे आहे, तर हिंदी भाषिक बाजारपेठेसाठी धर्मा प्रॉडक्शन्स वितरक म्हणून काम पाहणार आहे.