टेस्ला मॉडेल Y साठी कार्निव्हल: 19,990 रुपये हा प्रत्यक्ष हप्ता नाही, EMI 39,990 पासून

इलेक्ट्रिक कार घ्यायचा विचार करणाऱ्यांसाठी टेस्लाने भारतात एक खास कार्यक्रम ठेवला आहे. कंपनीने 23 ते 25 ऑक्टोबर 2026 दरम्यान 'स्विच अँड सेव्ह कार्निव्हल' आयोजित केला आहे. तीन दिवस चालणाऱ्या या कार्यक्रमात टेस्ला मॉडेल Y ची प्रभावी मासिक मालकी किंमत 19,990 रुपये असल्याचा दावा करण्यात आला आहे.

पण इथे एक गोष्ट नीट समजून घ्यायला हवी. ही 19,990 रुपयांची रक्कम म्हणजे प्रत्यक्ष EMI नाही. फ्युल आणि मेंटेनन्समध्ये होणारी अंदाजित बचत वजा केल्यानंतर जो आकडा येतो, तो कंपनीने मांडला आहे.

प्रत्यक्ष हप्ता किती, हे पाहिलं तर ग्राहकांना आधी 6 लाख रुपये डाउन पेमेंट करावं लागेल. त्यानंतर 7 वर्षांच्या स्टेप-अप EMI प्लॅनमध्ये 8.5 टक्के वार्षिक व्याजदराने मासिक हप्ता 39,990 रुपयांपासून सुरू होतो. बँकेची मंजुरी आणि कर्जाच्या अटींनुसार प्रत्यक्ष EMI बदलू शकतो. अंतिम हप्त्याची रक्कम कर्ज देणाऱ्या संस्थेच्या अटींवर अवलंबून असेल.

टेस्लाच्या गणनेनुसार पेट्रोल किंवा डिझेल कारच्या तुलनेत दर महिन्याला अंदाजे 20,000 रुपयांची बचत होऊ शकते. त्यामुळे कंपनी प्रभावी मासिक खर्च 19,990 रुपये सांगते.

ही बचत कशी मोजली, हेही कंपनीने सांगितलं आहे. मॉडेल Y ला 100 किमी प्रवासासाठी 14.3 kWh वीज लागते आणि विजेचा दर प्रति युनिट 7 रुपये धरला आहे. तुलनेसाठी पेट्रोल किंवा डिझेल कारचं मायलेज 8 किमी प्रति लिटर आणि सर्व्हिसिंगचा खर्च 2 रुपये प्रति किमी गृहीत धरला आहे.

इलेक्ट्रिक कारला इंजिन ऑइल, स्पार्क प्लग आणि मल्टिस्पीड ट्रान्समिशनच्या सर्व्हिसिंगची गरज नसते. रिजनरेटिव्ह ब्रेकिंगमुळे ब्रेक पॅड कमी झिजू शकतात. त्यामुळे नियमित मेंटेनन्सचा खर्च कमी होण्यास मदत होते.

कार्निव्हलमध्ये ग्राहकांना टेस्ला मॉडेल Y आणि 6-सीटर मॉडेल Y L पाहता येईल. जुन्या कारचं एक्सचेंज व्हॅल्युएशन आणि टेस्लाच्या फायनान्स पार्टनर्सकडून कर्ज प्रक्रियेची सुविधाही मिळणार आहे. या काळात खरेदी केलेल्या प्रत्येक कारसोबत टेस्ला वॉल कनेक्टर दिला जाणार आहे.

हा कार्यक्रम नोएडा, दिल्ली, गुरुग्राम, चेन्नई, हैदराबाद, बंगळुरू आणि मुंबई येथील टेस्ला सेंटर्समध्ये सकाळी 11 ते रात्री 8 या वेळेत होणार आहे. 2026 मॉडेल Y प्रीमियम रिअर-व्हील ड्राइव्ह आणि मॉडेल Y L साठी टेस्ट ड्राइव्ह बुक करता येईल. त्यामुळे कार घेण्याआधी तिचा अनुभव घेण्याची संधी ग्राहकांना मिळणार आहे.