रुग्णालयाच्या परिसरातही फुलला दिवाळीचा आनंद; 400 जणांना फराळ, 75 महिलांना साड्या

दिवाळीचा सण प्रत्येकाच्या आयुष्यात आनंद आणि गोडवा घेऊन येतो. पण रुग्णालयात उपचार घेणाऱ्या रुग्णांना आणि त्यांच्या नातेवाईकांना अनेकदा या सणाचा आनंद घेता येत नाही. अशा रुग्णांच्या आणि गरजूंच्या चेहऱ्यावर हसू फुलवण्यासाठी सौरभ मित्र मंडळाने पुढाकार घेतला.

मंडळाने अन्नमित्र सत्कार्याच्या माध्यमातून टाटा आणि केईएम रुग्णालयाच्या परिसरातील 400 हून अधिक रुग्ण, त्यांचे नातेवाईक आणि गरजू लोकांना दिवाळी फराळाचे डबे भेट दिले. प्रत्येक डबा एक किलो वजनाचा होता. म्हणजेच फक्त रुग्णच नाही, तर त्यांच्यासोबत असलेल्या नातेवाईकांपर्यंत आणि इतर गरजूंपर्यंतही हा फराळ पोहोचला. याशिवाय 75 गरजू महिलांना साड्यांचे वाटपही करण्यात आले.

घरातली एखादी व्यक्ती रुग्णालयात दाखल झाली की सगळ्या कुटुंबाचे लक्ष उपचारांकडे आणि रुग्णाच्या प्रकृतीकडे लागते. पैशांची चिंता आणि उपचारांची काळजी यामुळे सण-उत्सवाचा आनंदही बाजूला पडतो. टाटा आणि केईएम रुग्णालयाच्या परिसरात असे अनेक रुग्ण आणि त्यांचे नातेवाईक दिवाळीपासून दूर असतात. त्यांच्या आयुष्यात थोडासा गोडवा निर्माण व्हावा, या भावनेतून मंडळाने हा उपक्रम राबवला.

या उपक्रमामागे अनेक दात्यांचे आर्थिक सहकार्य, कार्यकर्त्यांची मेहनत आणि सामाजिक बांधिलकीची भावना होती. अन्नमित्र संजय सोमनाथ शेटये यांच्या नेतृत्वाखाली हा उपक्रम पार पडला. विशेष म्हणजे, पाच वर्षांपूर्वी 150 फराळाच्या डब्यांपासून सुरू झालेल्या या उपक्रमाने यंदा 400 हून अधिक जणांपर्यंत मजल मारली आहे. दात्यांची वाढती संख्या आणि सहकाऱ्यांचे प्रोत्साहन यामुळे मंडळाच्या या सामाजिक कामाचा विस्तार होत आहे.

या उपक्रमासाठी, म्हणजे फराळ भेट देण्यासाठी, सान्वी पेडणेकर, आशालता खानोलकर, नुपूर खानोलकर, प्रल्हाद गवरे, उज्वला गवरे, अशोक गोरीवले, सुलभा गोरीवले, विपुल छेडा, संजय मीना, सुनिता कोटियन, प्रसाद कोरगावकर, जोत्स्ना गुप्ते, दिलीप कदम, मनमोहन निंबाळकर, सत्तार शेख आणि कल्पना वारिया यांनी आर्थिक मदत केली.

दानाची रक्कम किती मोठी आहे, यापेक्षा त्यामागची भावना महत्त्वाची असते. आपल्या आनंदात गरजूंनाही सहभागी करून घेण्याच्या या उपक्रमात आणखी संवेदनशील दात्यांनी सहभागी व्हावे, असे आवाहन सौरभ मित्र मंडळाचे सरचिटणीस मंगेश वरवडेकर यांनी केले. आपल्या आनंदाचा थोडासा गोडवा दुसऱ्याच्या आयुष्यात उतरवला, तरच दिवाळी खऱ्या अर्थाने गोड होते, हा संदेश या उपक्रमातून देण्यात आला.