'ईठा'चा ट्रेलर प्रदर्शित, ४ डिसेंबरला येणार विठाबाई नारायणगावकरांच्या आयुष्यावरचा चित्रपट

श्रद्धा कपूर यांचा आगामी 'ईठा' हा चित्रपट सध्या चर्चेत आहे. या चित्रपटाचा ट्रेलर आता प्रदर्शित झाला आहे. लावणीसम्राज्ञी विठाबाई नारायणगावकर यांच्या आयुष्यावर हा चित्रपट आधारित आहे, आणि त्यामुळे प्रेक्षकांमध्ये त्याबद्दल उत्सुकता आहे.

ट्रेलर येण्याआधी काही दिवसांपूर्वी चित्रपटातील रणदीप हुड्डा यांचा 'मर्चंट' या भूमिकेतला लूक समोर आला होता. त्यानंतर निर्मात्यांनी आता ट्रेलर प्रदर्शित करून प्रेक्षकांना आणखी एक सरप्राईज दिलं आहे.

ट्रेलरची सुरुवात एका खुल्या मैदानातल्या मोठ्या गर्दीने होते. मंचावर ईठा लावणी सादर करताना दिसते. तिच्या नृत्यातल्या वेगवेगळ्या छटा, प्रेक्षकांचा उत्साह आणि बदलणारे लूक यामुळे पहिल्या दृश्यांपासूनच ट्रेलरमध्ये वेगळी ऊर्जा जाणवते. ईठाच्या भूमिकेत श्रद्धा कपूर यांची झलक या दृश्यांमध्ये पाहायला मिळते.

पुढे ईठाचा संघर्ष आणि तिच्या आयुष्यातल्या भावनिक घडामोडी समोर येतात. एका प्रसंगात ती म्हणते, "तूच म्हणाला होतास ना की बघूयात काय तुटतं? माझा विश्वास की माझा अहंकार?" त्यानंतर ती स्वतःच्याच पोस्टरवर दगड मारताना दिसते. या दृश्यात अभिनेता सिद्धार्थ जाधव यांचीही झलक आहे.

आणखी एका दृश्यात मंचासमोर मोठी गर्दी आहे. घुंगरू बांधलेल्या पायांवर रक्त दिसतं, आणि त्यातून ईठाच्या संघर्षाची तीव्रता जाणवते. याच वेळी श्रद्धा यांच्या तोंडचा संवाद लक्ष वेधून घेतो. ती म्हणते, "माझा विश्वासच माझा अहंकार होता. जेव्हा तो तुटला तेव्हा सगळंच तुटलं."

ट्रेलरमध्ये ईठाच्या आयुष्यातले कठीण प्रसंग, तिचा संघर्ष आणि लावणीशी असलेलं तिचं नातं दाखवलं आहे. अनेक अडचणींना तोंड देत असतानाही नृत्यावरचं तिचं प्रेम कायम असल्याचं दिसतं. "नाचता नाचता मेले तर एक आदर्श होईन," हा तिचा संवाद विशेष लक्षात राहणारा आहे. त्यातून विठाबाईंची जिद्द आणि कलेला वाहून घेण्याची वृत्ती दिसते.

'ईठा'चं दिग्दर्शन लक्ष्मण उतेकर करत आहेत. श्रद्धा कपूर प्रमुख भूमिकेत आहेत, तर रणदीप हुड्डा 'मर्चंट'च्या भूमिकेत दिसणार आहेत. सिद्धार्थ जाधव, शुभंकर एकबोटे आणि राधा सागर यांच्यासह अनेक मराठी कलाकार महत्त्वाच्या भूमिकांमध्ये आहेत.

हा चित्रपट येत्या ४ डिसेंबरला प्रदर्शित होणार आहे. विठाबाईंच्या आयुष्यातल्या महत्त्वाच्या व्यक्ती, त्यांचा संघर्ष आणि कलेच्या क्षेत्रातला त्यांचा प्रवास चित्रपटातून उलगडणार आहे. ट्रेलरमधले दमदार संवाद, लावणीचं सादरीकरण आणि संघर्षाची झलक पाहून उत्सुकता आणखी वाढली आहे. मोठ्या पडद्यावर श्रद्धा कपूर विठाबाई नारायणगावकर यांची भूमिका कशी साकारतात, याकडे आता प्रेक्षकांचं लक्ष लागलं आहे.