सांगली जिल्हा बँक निवडणुकीत ९३.९१ टक्के मतदान, सहा जागांची मतमोजणी मंगळवारी

सांगली जिल्हा मध्यवर्ती सहकारी बँकेच्या संचालक मंडळाच्या निवडणुकीसाठी रविवारी मतदान झाले. २०२६ ते २०३१ या पाच वर्षांसाठीच्या या निवडणुकीत सकाळी आठ ते सायंकाळी पाच या वेळेत मतदान घेण्यात आले. जिल्ह्यात १२ मतदान केंद्रे होती आणि एकूण २ हजार ४४६ मतदार पात्र होते. दिवसअखेर ९३.९१ टक्के मतदानाची नोंद झाली.

बँकेच्या २१ पैकी १५ जागा आधीच बिनविरोध झाल्या होत्या. उरलेल्या सहा जागांसाठी १३ उमेदवार रिंगणात होते. जत, कवठेमहांकाळ, तासगाव आणि मिरज या चार सोसायटी गटांसाठी, तसेच अनुसूचित जाती आणि भटक्या जाती-जमाती या दोन राखीव प्रवर्गांसाठी मतदान झाले. मंगळवारी (ता. ३) मतमोजणी होणार असून त्यातून बँकेच्या सत्ताकारणाचे चित्र स्पष्ट होईल.

सकाळी काही केंद्रांवर मतदान संथ होते. दिवस पुढे सरकला तसा वेग वाढला आणि दुपारनंतर अनेक केंद्रांवर मतदारांची गर्दी झाली. आपापल्या गटातील मतदारांनी मतदान करावे, यासाठी उमेदवार आणि त्यांचे समर्थक प्रयत्न करत होते.

जत सोसायटी गटात आमदार गोपीचंद पडळकर यांची लढत विनोद पवार यांच्याशी झाली. पडळकर यांच्या उमेदवारीचा विषय न्यायालयापर्यंत गेला होता, मात्र त्यांचा अर्ज वैध ठरल्यानंतर निवडणुकीचा मार्ग मोकळा झाला. तासगावमध्ये माजी खासदार संजय पाटील आणि माजी आमदार सुमन पाटील आमनेसामने होते. सुमन पाटील यांच्या उमेदवारीमुळे आमदार रोहित पाटील यांची प्रतिष्ठा पणाला लागली आहे. कवठेमहांकाळमध्ये माजी मंत्री अजितराव घोरपडे आणि टी. व्ही. पाटील यांच्यात सामना झाला.

मिरज सोसायटी गटात अण्णासाहेब कोरे आणि भाजपचे अनिल शेगुणशे यांच्यात लढत झाली. या निकालाकडे खासदार विशाल पाटील यांचेही लक्ष आहे. अनुसूचित जाती प्रवर्गात के. डी. कांबळे, बाबासाहेब मधाळे आणि विलास बेले रिंगणात होते. भटक्या जाती-जमाती प्रवर्गात संभाजी कचरे, शंकर माने आणि अमोल पारेकर यांच्यात लढत झाली.

जतच्या मतदान केंद्रावर मतदानाची गोपनीयता पाळली गेली नाही, असा आरोप करून माजी आमदार विक्रमसिंह सावंत आणि त्यांच्या समर्थकांनी आक्षेप घेतला. त्यामुळे सुमारे अर्धा तास मतदान थांबवण्यात आले आणि नंतर पुन्हा सुरू झाले. या प्रकाराशिवाय जिल्ह्यातील इतर केंद्रांवर मतदान शांततेत पार पडले.

जिल्हा सहकार उपनिबंधक सुनील चव्हाण यांनी निवडणूक निर्णय अधिकारी म्हणून काम पाहिले. जिल्हाधिकारी डॉ. मैनाक घोष यांनी मतदान आणि मतमोजणी केंद्रांच्या परिसरात प्रतिबंधात्मक आदेश लागू केले होते. केंद्रात जाण्यापूर्वी मतदारांची तपासणी होत होती. मोबाईल, कॅमेरा, इलेक्ट्रॉनिक वस्तू आणि पेन यांसह प्रतिबंधित वस्तू आत नेण्यास मनाई होती.

लढत अटीतटीची असल्याने अनेक नेत्यांनी आपले मतदार फुटू नयेत म्हणून त्यांना मतदानापूर्वीच पर्यटनस्थळी हलवले होते. मतदानाच्या दिवशी त्यांना कडेकोट बंदोबस्तात थेट केंद्रांवर आणण्यात आले आणि मतदानानंतर पुन्हा रवाना करण्यात आले. मतमोजणी मंगळवारी सकाळी आठ वाजता सांगली कृषी उत्पन्न बाजार समितीच्या मार्केट यार्डातील शेतकरी भवनात सुरू होईल.