प्रदीप पूर्णेकर हत्या: राम पूर्णेकर ताब्यात, नौपाडा पोलीस स्टेशनमध्ये सर्वपक्षीय नेत्यांचा ठिय्या

ठाण्यातील शिवसेना (उबाठा) नेते प्रदीप उर्फ बाळू पूर्णेकर यांच्या हत्येच्या प्रकरणाला आता वेगळं वळण लागलं आहे. राम पूर्णेकर यांना पोलिसांनी ताब्यात घेतल्यानंतर ठाण्यातलं राजकीय वातावरण चांगलंच तापलं आहे.

उपमुख्यमंत्री एकनाथ शिंदे यांच्या ठाण्यातील निवासस्थानाबाहेर निदर्शनं करण्याचा प्रयत्न राम पूर्णेकर यांनी केला होता. त्यांना वागळे इस्टेट पोलिसांनी ताब्यात घेतलं आणि नौपाडा पोलीस स्टेशनला आणलं. त्यानंतर तिथे मोठा राजकीय हायव्होल्टेज ड्रामा पाहायला मिळाला.

राम पूर्णेकर यांना ताब्यात घेऊन नौपाडा पोलीस स्टेशनमध्ये आणल्याची बातमी वाऱ्यासारखी पसरली. त्याबरोबर सर्वपक्षीय नेते, कार्यकर्ते आणि पूर्णेकर कुटुंबीय मोठ्या संख्येने पोलीस स्टेशनमध्ये धडकले.

स्टेशनच्या वरिष्ठ पोलीस अधिकाऱ्यांच्या केबिनमध्ये माजी खासदार राजन विचारे (शिवसेना उबाठा), मनसे ठाणे जिल्हाध्यक्ष अविनाश जाधव, काँग्रेस पक्षाचे स्थानिक नेते, विविध राजकीय आणि सामाजिक संघटनांचे प्रतिनिधी आणि पूर्णेकर कुटुंबीय एकत्र आले होते. या सगळ्यांनी पोलिसांवर प्रश्नांचा जोरदार भडिमार केला.

पोलीस स्टेशनमध्ये हजर असलेल्या सर्वपक्षीय नेत्यांनी आणि पूर्णेकर कुटुंबीयांनी अतिशय आक्रमक पवित्रा घेतला. प्रदीप उर्फ बाळू पूर्णेकर यांच्या हत्या प्रकरणातील मुख्य संशयित माजी महापौर मीनाक्षी शिंदे आणि त्यांचे पती राजेंद्र शिंदे यांना तात्काळ अटक करावी, अशी त्यांची मागणी आहे.

जोपर्यंत या दोघांना अटक होत नाही आणि तपासाबाबत ठोस आश्वासन मिळत नाही, तोपर्यंत पोलीस स्टेशनमध्येच ठिय्या मांडू आणि बाहेर पडणार नाही, असा इशारा सर्वपक्षीय नेत्यांनी पोलिसांना दिला आहे.

एकीकडे स्टेशनच्या आत नेत्यांची वरिष्ठ अधिकाऱ्यांशी चर्चा आणि बाचाबाची सुरू होती. दुसरीकडे स्टेशनच्या आवारात महिला आणि पुरुष नागरिकांनी प्रचंड गर्दी केली होती. समर्थक आणि स्थानिक नागरिकांनी नौपाडा पोलीस स्टेशनच्या परिसराला अक्षरशः घेराव घातल्याचं चित्र दिसत होतं.

प्रदीप पूर्णेकर यांच्या हत्येला 26 दिवस उलटले तरी मुख्य सूत्रधार आणि आरोपी मोकाट आहेत. त्यामुळे नागरिकांमधला संताप आणि असंतोष या वेळी उफाळून आला.

उपमुख्यमंत्र्यांच्या बंगल्याबाहेरचं आंदोलन, राम पूर्णेकर यांना ताब्यात घेणं आणि त्यानंतर सर्वपक्षीय नेत्यांनी नौपाडा पोलीस स्टेशनमध्ये मांडलेला ठिय्या, यामुळे ठाण्यातील कायदा आणि सुव्यवस्थेचा प्रश्न गंभीर झाला आहे.

संबंधित व्यक्तींवरचे आरोप आणि अटकेच्या थेट मागण्यांबाबत ठाणे पोलिसांनी अद्याप कोणतीही अधिकृत प्रतिक्रिया किंवा भूमिका जाहीर केलेली नाही. वाढत्या राजकीय दबावावर पोलीस प्रशासन काय कारवाई करतं, याकडे संपूर्ण राज्याचं लक्ष लागलं आहे.