पूर्णेकर हत्येत तरुणीचा हात असल्याचा मुलाचा दावा; मानपाड्यातील प्रकरणाला नवे वळण

ठाण्यातील मानपाडा भागातले शिवसेना (उद्धव बाळासाहेब ठाकरे) पक्षाचे विभागप्रमुख प्रदीप पूर्णेकर यांच्या हत्येच्या प्रकरणाला आता नवे आणि रहस्यमय वळण मिळाले आहे. या हत्येमागे राजकीय वैमनस्य असल्याचा संशय व्यक्त केला जात होता. पण त्यांचा मुलगा राम पूर्णेकर यांनी दिलेल्या पुरवणी जबाबात एका तरुणीच्या संशयास्पद सहभागाचा दावा केल्यामुळे या प्रकरणातले गूढ आणखीनच वाढले आहे.

पोलिसांकडे नोंदवलेल्या जबाबात राम पूर्णेकर यांनी हत्येआधी घडलेल्या एका प्रसंगाचा सविस्तर उल्लेख केला आहे. त्यांच्या म्हणण्यानुसार, हत्येच्या काही दिवस आधी परिसरातली एक तरुणी दोन पुरुषांसोबत एका खोलीत सापडली होती. ही माहिती कळताच प्रदीप पूर्णेकर घटनास्थळी गेले आणि त्या दोन तरुणांना त्यांनी चांगलाच चोप दिला. त्यानंतर त्या तरुणीसह दोघांनाही त्यांनी कापूरबावडी पोलिसांच्या ताब्यात दिले होते.

हीच तरुणी हत्येच्या आधी आणि नंतरही प्रदीप पूर्णेकर यांच्या कार्यालयाच्या आसपास संशयास्पद पद्धतीने फिरताना दिसली होती, असा दावा राम पूर्णेकर यांनी केला आहे. वडिलांनी बेकायदेशीर कृत्याविरोधात भूमिका घेतली होती आणि त्यानंतर त्या तरुणीकडून धमक्या मिळाल्या होत्या, असा संदर्भ देऊन या हत्येत तिचा किंवा तिच्याशी जोडलेल्या कटाचा हात असू शकतो, अशी शक्यता मांडण्यात आली आहे. या दिशेनेही कसून चौकशी करावी, अशी मागणी कुटुंबीयांनी पोलिसांकडे केली आहे.

या हत्येप्रकरणी पोलिसांनी मुख्य शूटर म्हणून निखिल यादव आणि कोयत्याने वार करणारा म्हणून नितेश पवार या दोघांना मुंबई-गोवा महामार्गावरून अटक केली आहे. त्यांना 8 ऑक्टोबरपर्यंत पोलीस कोठडी सुनावण्यात आली आहे.

दरम्यान, ठाणे महापालिका निवडणुकीपासून सुरू असलेल्या राजकीय वैमनस्यातून ही हत्या झाली, असा आरोप राम पूर्णेकर यांनी केला आहे. शिवसेनेच्या माजी महापौर मीनाक्षी शिंदे आणि त्यांचे पती राजेंद्र शिंदे यांनी कट रचून ही हत्या घडवून आणली, असा गंभीर आरोप त्यांनी केला आहे.

दुसरीकडे, मीनाक्षी शिंदे यांनी पत्रकार परिषद घेऊन हे सर्व आरोप फेटाळले आहेत. प्रदीप पूर्णेकर यांनी एका तरुणीच्या घरी जाऊन मारहाण केली होती आणि त्याच तरुणीने त्यांना धमक्या दिल्या होत्या, असा दावा त्यांनी केला. राजकीय द्वेषापोटी या प्रकरणात आपल्याला गोवले जात आहे, असेही त्यांनी म्हटले आहे.

आता पोलीस या प्रकरणाचा राजकीय आणि इतर सर्व बाजूंनी कसून तपास करत आहेत. पुढच्या तपासातून हत्येचे खरे कारण समोर येईल, अशी अपेक्षा आहे.