दिवाळीसाठी पुणे एसटी विभागाच्या १२०० जादा बस, विदर्भ, खानदेश, मराठवाड्यासाठी ९०० लालपरी

दिवाळीनिमित्त गावी जाणाऱ्या प्रवाशांची गर्दी वाढत चालली आहे. ही गर्दी लक्षात घेऊन पुणे एसटी विभागाने यंदा १२०० जादा बस सोडण्याचे नियोजन केले आहे. प्रवाशांच्या सोयीसाठी एसटी महामंडळाने हा निर्णय घेतला आहे. या विशेष बस ४ ते ७ नोव्हेंबरदरम्यान पिंपरी-चिंचवड, स्वारगेट आणि शिवाजीनगर येथून सुटणार आहेत.

या १२०० जादा बसपैकी ९०० लालपरी बस विदर्भ, खानदेश आणि मराठवाड्याच्या दिशेने धावतील. उरलेल्या ३०० जादा बस सोलापूर, कोल्हापूर, सांगली आणि सातारा या भागांसाठी सोडल्या जाणार आहेत. म्हणजेच पुण्यातून सुटणाऱ्या एकूण १२०० जादा बसमध्ये या दोन्ही बाजूंच्या प्रवाशांची सोय केली आहे.

दिवाळीच्या काळात पुण्यात नोकरी, व्यवसाय आणि शिक्षणासाठी राहणारे अनेक जण मोठ्या संख्येने गावी जातात. त्यामुळे विदर्भ, मराठवाडा, खानदेश आणि पश्चिम महाराष्ट्राकडे जाणाऱ्या बसला मोठी मागणी असते. दुसरीकडे रेल्वेगाड्यांचे आरक्षण फुल्ल झाल्यामुळे ऐनवेळी प्रवास करणाऱ्यांसाठी एसटीचा पर्याय महत्त्वाचा ठरणार आहे. प्रवाशांची गैरसोय होऊ नये म्हणून नेहमीच्या बससेवेसोबत या जादा गाड्यांचे नियोजन केले आहे.

विदर्भ, मराठवाडा आणि खानदेशात जाणाऱ्या प्रवाशांसाठी यंदा पिंपरी-चिंचवड आगारातून विशेष बस सुटतील. याआधी अशा जादा बस खडकी कॅन्टोन्मेंट परिसरातून सोडल्या जात होत्या. पण जागेची अडचण लक्षात घेऊन आता पिंपरी-चिंचवड आगाराला प्राधान्य दिले आहे. बस उभ्या करण्यासाठी जवळचे मैदान भाड्याने घेतले असून, ठरलेल्या वेळेनुसार गाड्या रवाना होतील. हे आगार मेट्रोशी जोडलेले असल्यामुळे प्रवाशांना तिथे पोहोचणेही सोयीचे ठरणार आहे.

सोलापूर, कोल्हापूर, सांगली आणि सातारा या भागांत जाणाऱ्या प्रवाशांसाठी स्वारगेट बसस्थानकातून जादा बस सोडल्या जातील. शिवाजीनगर बसस्थानकातूनही विशेष गाड्यांची व्यवस्था केली आहे. या जादा बसचे ऑनलाइन आरक्षण सुरू झाले असून, प्रवाशांनी आधीच आरक्षण करून प्रवासाचे नियोजन करावे, असे आवाहन एसटी प्रशासनाने केले आहे.

पुणे एसटी विभागाचे विभाग नियंत्रक अरुण सिया म्हणाले, की दिवाळीनिमित्त पुण्यातून यंदाही पिंपरी-चिंचवडमधून जादा बस सोडण्याचे नियोजन केले आहे. ४ ते ७ नोव्हेंबरदरम्यान पिंपरी-चिंचवड, स्वारगेट आणि शिवाजीनगर येथून या बस धावतील. यंदा पुण्यातून १२०० बस सोडण्याचे नियोजन आहे. प्रवाशांनी आरक्षण करून सुरक्षित प्रवासाला प्राधान्य द्यावे, असेही त्यांनी सांगितले.