बावधनमध्ये डीजे-डॉल्बी टाळणाऱ्या २५ गणेश मंडळांचा गौरव; विकासाबद्दल हातेकरांचे मत

रुंद रस्ते आणि चकचकीत पायाभूत सुविधा झाल्या म्हणजे विकास झाला, असे म्हणता येत नाही, असे प्रसिद्ध अर्थतज्ज्ञ डॉ. नीरज हातेकर यांनी बावधन येथे सांगितले. सामान्य माणसाला रोजगार, चांगली आरोग्यसेवा आणि मूलभूत सुविधा मिळणे तितकेच गरजेचे आहे, असे ते म्हणाले. विकास करताना निसर्गाचे नुकसान होणार असेल आणि स्थानिक लोकांच्या हिताकडे दुर्लक्ष होणार असेल, तर त्याचा गांभीर्याने विचार व्हायला हवा, असे त्यांचे मत होते.

मुख्यमंत्री समृद्ध पंचायतराज अभियान आणि सेवा संकल्प अभियानांतर्गत बावधन ग्रामपंचायत व मंगलमूर्ती सोशल क्लब यांनी मिळून ग्रामपंचायत कार्यालयात हा कार्यक्रम आयोजित केला होता. डीजे-डॉल्बी न वापरता पारंपरिक पद्धतीने गणेशोत्सव साजरा करणाऱ्या गावातील २५ मंडळांचा यावेळी सन्मान झाला. झाडे जगवण्यासाठी योगदान देणाऱ्या तीन वृक्षमित्रांचाही सत्कार करण्यात आला.

डॉ. हातेकर म्हणाले की, विकासाची गरज नाकारता येणार नाही, पण त्यासाठी पर्यावरणाला कोणती किंमत मोजावी लागते, तेही पाहिले पाहिजे. सुरूर-वाई रस्त्याच्या रुंदीकरणासाठी होणारी वृक्षतोड, वाढते तापमान आणि पुढे येऊ शकणारी पाणीटंचाई यांचा एकमेकांशी संबंध आहे, तो समजून घेण्याची गरज आहे. मोठे प्रकल्प उभे राहताना स्थानिक लोकांच्या जगण्यावर त्यांचा काय परिणाम होतो, याचाही विचार व्हावा, असे ते म्हणाले. समृद्धी महामार्गाचा दाखला देत, अशा प्रकल्पांमुळे शेतकऱ्यांच्या आयुष्यात अपेक्षित समृद्धी आली का, असा प्रश्न त्यांनी विचारला.

निसर्गप्रेमी आणि सामाजिक कार्यकर्ते प्रशांत डोंगरे यांनी बावधन परिसरात प्रस्तावित असलेल्या दगडखाणींकडे लक्ष वेधले. या खाणींमुळे उडणारी धूळ आणि तिचा पर्यावरणावर तसेच लोकांच्या आरोग्यावर होऊ शकणारा परिणाम लक्षात घेतला पाहिजे, असे ते म्हणाले. हा प्रश्न फक्त बावधनपुरता राहणार नाही, वाई परिसरालाही त्याची झळ बसू शकते, अशी चिंता त्यांनी बोलून दाखवली. वृक्षरक्षणाबद्दल आज्ञापत्रातील विचारांचा संदर्भ देत त्यांनी झाडांची संपत्ती जपण्याचे आवाहन केले. वाईच्या भाजी मंडईतील झाडे तोडल्यानंतर विक्रेत्यांना उन्हात बसून व्यवसाय करावा लागतो, असे उदाहरणही त्यांनी दिले.

वाईचे पोलीस निरीक्षक प्रदीप सूर्यवंशी यांनी ध्वनिप्रदूषण टाळून गणेशोत्सव साजरा करणाऱ्या बावधनकरांचे कौतुक केले. उत्सवाचा आनंद टिकवून डीजे-डॉल्बीपासून दूर राहण्याचा मंडळांचा निर्णय अनुकरण करण्यासारखा आहे, असे सांगत ही परंपरा गावाने पुढेही चालू ठेवावी, असे आवाहन त्यांनी केले.

ग्रामविकास अधिकारी प्रशांत धुमाळ यांनी ग्रामपंचायतीच्या एका उपक्रमाची माहिती दिली. विवाह नोंदणी करताना एक झाड लावायचे, असा हा उपक्रम आहे. कुटुंबातील महत्त्वाच्या प्रसंगाशी झाडे लावण्याची सांगड घातली, तर लोकांचा सहभाग वाढेल आणि झाडे जपण्याची जबाबदारी मनात रुजेल, असा प्रयत्न असल्याचे त्यांनी सांगितले.

वृक्षमित्र संजय मदन भोसले, निलेश अरुणराव शिंदे आणि संजय बाळकृष्ण कुंभार यांना सन्मानचिन्ह व प्रशस्तीपत्र देऊन गौरवण्यात आले. नवयुग गणेश मंडळ, अहिल्यादेवी गणेशोत्सव मंडळ, अमर गणेशोत्सव मंडळ, अजिंक्य गणेशोत्सव मंडळ, श्रीराम गणेशोत्सव मंडळ, श्री छत्रपती शिवाजी महाराज गणेशोत्सव मंडळ, जय हिंद गणेशोत्सव मंडळ आणि मानाचा गणपती गणेश मंडळ यांच्यासह एकूण २५ मंडळांचा सन्मान झाला.

कार्यक्रमाला गटविकास अधिकारी नारायण घोलप, मंगलमूर्ती सोशल क्लबचे अध्यक्ष धनंजय भोसले, तंटामुक्त संघटनेचे माजी अध्यक्ष प्रदीप कदम, मदन भोसले, चंद्रकांत भोसले, सयाजी पिसाळ पाटील, विजयकुमार रासकर, राजेंद्र कदम यांच्यासह ग्रामस्थ उपस्थित होते. अनिल पिसाळ यांनी प्रास्ताविक केले, केशव कोदे यांनी सूत्रसंचालन केले आणि राजेंद्र तरटे यांनी आभार मानले.