गवराळ्यातील कर्मयोगी गाडगे महाराज स्वच्छता समितीला एक वर्ष पूर्ण, वर्धापन दिन साजरा

गवराळा येथील कर्मयोगी गाडगे महाराज स्वच्छता समितीने आपल्या कामाचे पहिले वर्ष पूर्ण केले. कोणत्याही स्थानिक स्वराज्य संस्थेची किंवा बाहेरच्या संस्थेची मदत न घेता, फक्त सामाजिक बांधिलकीतून ही समिती स्वच्छतेचे काम करत आहे. या निमित्ताने रेल्वे स्टेशन रोडवरील राजमनी गार्डन येथे वर्धापन दिनाचा कार्यक्रम उत्साहात साजरा झाला.

हा उपक्रम ऑक्टोबर २०२५ मध्ये सुरू झाला. समितीचे ज्येष्ठ सदस्य स्वतः पुढाकार घेऊन स्वच्छतेचे काम करतात. वयाची ऐंशी वर्षे ओलांडलेले सदस्यही नियमितपणे या कामात सहभागी होतात. त्यांच्या निःस्वार्थ सेवाभावामुळे समाजासमोर एक आदर्श उभा राहिला आहे. संत गाडगे महाराज यांच्या स्वच्छता, समाजप्रबोधन आणि समाजसेवेच्या विचारांपासून प्रेरणा घेऊन समितीने वर्षभर हे काम सुरू ठेवले.

कार्यक्रमाच्या अध्यक्षस्थानी प्राध्यापक विवेक सरपटवार होते. प्रमुख पाहुण्यांमध्ये ज्येष्ठ पत्रकार दिलीप मांढरे, राष्ट्रीय कीर्तनकार सुवर्णा ताई पिंपळकर, प्रकाश पिंपळकर, राजुरकर सर, प्रबोधनकार विशाल गावंडे, तसेच ज्येष्ठ सदस्य बबन पाटील जीवतोडे, उद्धवराव निळे, शामराव पाटील खापणे आणि निळकंठजी आत्राम यांचा समावेश होता. समितीचे अध्यक्ष मंगेश येरमे, मार्गदर्शक राजेश बदखल, संघटक लिमेश माणूसमारे, रमेशजी खातखेडे यांच्यासह समितीचे सदस्य आणि महिला मोठ्या संख्येने हजर होत्या.

राजेश बदखल यांनी कार्यक्रमाचे प्रास्ताविक केले. समितीचे प्रवर्तक लिमेश माणूसमारे यांनी सूत्रसंचालन केले, तर अजय बोंडे यांनी आभार मानले.

वर्धापन दिनानिमित्त गवराळा येथील स्मशानभूमी परिसरात स्वच्छता समितीच्या फलकाचे अनावरण झाले. ज्येष्ठ सदस्य निळकंठजी आत्राम आणि कार्यक्रमाचे अध्यक्ष विवेक सरपटवार यांच्या हस्ते हे अनावरण करण्यात आले. स्वच्छतेचा संदेश सगळ्या भद्रावती शहरात पोहोचवून शहर स्वच्छ, सुंदर आणि आरोग्यदायी करण्याचा संकल्प यावेळी व्यक्त करण्यात आला.

स्वच्छता ही फक्त प्रशासनाची जबाबदारी नाही, तर प्रत्येक नागरिकाचे कर्तव्य आहे, असे यावेळी मांडण्यात आले. प्रसिद्धीची किंवा बाहेरच्या मदतीची अपेक्षा न ठेवता ज्येष्ठ नागरिकांनी स्वतःहून उभा केलेला हा उपक्रम नव्या पिढीसाठी प्रेरणादायी ठरत आहे. संत गाडगे महाराज यांचे विचार फक्त अभिवादनापुरते मर्यादित न ठेवता प्रत्यक्ष कृतीतून समाजापर्यंत पोहोचवण्याचा निर्धार अध्यक्ष मंगेश येरमे आणि मार्गदर्शक राजेश बदखल यांनी व्यक्त केला.

स्वच्छतेचा हा सेवाप्रवास पुढेही अखंड सुरू ठेवण्याचा निर्धार व्यक्त करण्यात आला. 'स्वच्छ भद्रावती, सुंदर भद्रावती आणि निरोगी भद्रावती' या संकल्पनेसह आणि जगन्नाथ महाराज यांचा जयजयकार करून कार्यक्रमाची सांगता झाली.