आयपीएल २०२७ आधी पंजाब किंग्सला धक्का, हॅडिन आणि होप्स यांनी संघ सोडला

आयपीएल २०२७ ची तयारी आता सुरू झाली आहे आणि त्याआधी प्रत्येक फ्रँचायझीमध्ये मोठे बदल होत आहेत. सध्या पंजाब किंग्स संघातूनही एक मोठी बातमी समोर येत आहे. पंजाब किंग्सच्या कोचिंग स्टाफमध्ये सतत बदल होत आहेत. फिल्डिंग प्रशिक्षक ब्रॅड हॅडिन आणि वेगवान गोलंदाजी प्रशिक्षक जेम्स होप्स या दोघांनी संघ सोडला आहे.

याआधी साईराज बहुतुले यांनी नुकताच पंजाबला निरोप दिला होता. म्हणजेच बहुतुले यांच्यापाठोपाठ आता आणखी दोन प्रशिक्षकांनी पंजाब किंग्स सोडले आहे. त्यामुळे पंजाबच्या कोचिंग स्टाफमध्ये फक्त रिकी पाँटिंग उरले आहेत. पंजाबला पुढच्या वर्षीच्या आयपीएलपूर्वी तीन नवीन प्रशिक्षक शोधावे लागतील.

होप्स आणि पाँटिंग यांनी एकत्र मोठ्या प्रमाणावर काम केले असून ते दिल्ली कॅपिटल्स संघाचाही भाग होते. हॅडिन मात्र काही वर्षांपूर्वी पंजाब किंग्समध्ये सामील झाले होते. आता त्या दोघांनीही संघ सोडण्याचा निर्णय घेतला आहे आणि त्यांनी अलीकडेच फ्रँचायझीला तसे कळवले आहे.

मुख्य प्रशिक्षक रिकी पाँटिंग यांच्यावर आता मोठी जबाबदारी आली आहे. नवीन सपोर्ट स्टाफची निवड करण्याची जबाबदारी त्यांच्यावर असेल. सूत्रांनी दिलेल्या माहितीनुसार, फ्रँचायझी पाँटिंग यांच्या संपर्कात असून संभाव्य उमेदवारांबाबत चर्चा सुरू आहे. व्यवस्थापन काही नावे सुचवू शकते, पण अंतिम निर्णय पाँटिंग यांचाच असेल. पंजाब डिसेंबरपूर्वी आपल्या नवीन प्रशिक्षकांची नावे जाहीर करू शकते.

हॅडिन आणि जेम्स होप्स यांची नजर आता बीबीएलवर, म्हणजेच बिग बॅश लीगवर आहे. या दोघांनाही बिग बॅश लीगमध्ये नवीन जबाबदाऱ्या मिळू शकतात.

पंजाबसाठी हा पहिलाच धक्का नाही. आयपीएल २०२६ नंतर पंजाबला मोठा धक्का बसला होता. फिरकी प्रशिक्षक साईराज बहुतुले यांनी तात्काळ आपल्या पदाचा राजीनामा दिला. त्यानंतर त्यांनी भारतीय संघाच्या फिरकी गोलंदाजीची जबाबदारी स्वीकारली. बहुतुले आयपीएल २०२६ पूर्वी पंजाबमध्ये सामील झाले होते आणि सुनील जोशी यांच्या जाण्यानंतर त्यांची नियुक्ती करण्यात आली होती.

पुढच्या वर्षीच्या आयपीएलपूर्वी पंजाबमध्ये आणखी मोठे बदल होऊ शकतात. फ्रँचायझी कोणत्या तीन अनुभवी खेळाडूंना प्रशिक्षक म्हणून संघात सामील करते, हे पाहणे बाकी आहे.