भारतीय महिला संघाच्या कर्णधारपदी स्मृती मंधाना, बीसीसीआयची घोषणा

भारतीय महिला क्रिकेट संघाची कप्तानी आता स्मृती मंधाना सांभाळणार आहे. बीसीसीआयने तिन्ही फॉरमॅटसाठी तिची कर्णधारपदी निवड केल्याची अधिकृत घोषणा केली आहे.

भारताची माजी कर्णधार हरमनप्रीत कौरने तिन्ही फॉरमॅटमधील कर्णधारपदाचा राजीनामा दिला होता. भारतीय क्रिकेट नियामक मंडळाच्या आढावा बैठकीनंतर अवघ्या एका दिवसाने तिने हा निर्णय घेतला आणि क्रिकेट जगतात मोठी खळबळ उडाली. त्यानंतर संघाचे नेतृत्व कोण करणार, अशी चर्चा सुरू झाली होती. अखेर बीसीसीआयने ही जबाबदारी स्मृतीकडे दिली आहे.

स्मृती आतापर्यंत भारताची उपकर्णधार म्हणून काम पाहत होती. आता ती तिन्ही फॉरमॅटमध्ये संघाचे नेतृत्व करणार आहे. याआधीही तिने वेगवेगळ्या फॉरमॅटमध्ये भारताचे नेतृत्व केले होते. भारतीय महिला क्रिकेटमधील तिचे योगदान पाहून बीसीसीआयने तिच्यावर ही नवी जबाबदारी टाकली आहे.

आंतरराष्ट्रीय क्रिकेटशिवाय डोमेस्टिक फ्रँचायझी क्रिकेटमध्येही स्मृतीने आपली प्रभावी नेतृत्वक्षमता दाखवून दिली आहे. तिच्या नेतृत्वाखाली रॉयल चॅलेंजर्स बंगळुरू संघाने महिला प्रीमियर लीगचे 2024 चे विजेतेपद जिंकले होते.

मंगळवारी जारी केलेल्या अधिकृत पत्रकात बीसीसीआयने म्हटले, 'ती २०१३ पासून भारतीय संघाचा एक महत्त्वाचा भाग आहे. या नव्या जबाबदारीसाठी तिच्याकडे प्रचंड अनुभव आहे. भारतीय महिला क्रिकेट संघ आता एका नव्या युगात प्रवेश करत असून, गेल्या काही वर्षांत झालेल्या प्रगतीला अधिक उंचीवर नेण्याची आणि संघाला पुढे घेऊन जाण्याची जबाबदारी आता स्मृतीवर असणार आहे.'

कर्णधार म्हणून निवड झाल्यावर स्मृती मंधाना म्हणाली, 'भारतीय संघाचे नेतृत्व करण्याची संधी मिळणे हा माझ्यासाठी खूप मोठा आणि खास सन्मान आहे. भारताचे प्रतिनिधित्व करणे ही माझ्यासाठी नेहमीच अत्यंत मोलाची गोष्ट राहिली आहे आणि आता संघाचे नेतृत्व करण्याचा मिळालेला हा सन्मान देखील तितकाच महत्वाचा असणार आहे. माझ्यावर विश्वास दाखवल्याबद्दल मी निवड समिती, संघातील सर्व सहकारी खेळाडू आणि मला सतत पाठिंबा देणाऱ्या प्रत्येकाची अत्यंत आभारी आहे.'

हरमनप्रीत कौर ही भारतीय महिला क्रिकेटच्या इतिहासातील सर्वात यशस्वी कर्णधारांपैकी एक मानली जाते. तिच्याच नेतृत्वाखाली भारतीय महिला संघाने गेल्या वर्षी पहिल्यांदाच ऐतिहासिक महिला वनडे वर्ल्ड कपचे विजेतेपद पटकावून इतिहास रचला होता. तिच्या राजीनाम्यानंतर आता संघ नव्या कर्णधारासह नव्या टप्प्यात उतरत आहे.