न्यूझीलंडचा माजी सलामीवीर जीत रावल क्रिकेटच्या सर्व प्रकारांतून निवृत्त

न्यूझीलंडचा माजी सलामीवीर जीत रावल याने क्रिकेटच्या सर्व प्रकारांतून निवृत्त होत असल्याचे जाहीर केले आहे. तो ३८ वर्षांचा असून भारतीय वंशाचा क्रिकेटपटू आहे. २०२६-२७ च्या देशांतर्गत हंगामाआधीच त्याने हा निर्णय सांगितला. न्यूझीलंडचा हा माजी कसोटीपटू आता व्यावसायिक क्रिकेटमधून बाजूला होत आहे.

रावलने नॉर्दर्न डिस्ट्रिक्ट्स क्रिकेट असोसिएशनला निवृत्तीची माहिती दिली. ही माहिती देताना तो म्हणाला, 'हा निर्णय घेताना त्याला खूप अभिमान वाटत आहे. मी माझ्या निर्णयावर पूर्णपणे आनंदी आणि समाधानी आहे. लहानपणापासूनच न्यूझीलंडसाठी खेळण्याचे हे माझे स्वप्न होते आणि मी त्या दिवसांकडे मोठ्या अभिमानाने पाहतो. हे केवळ माझेच नाही, तर वडिलांचेही स्वप्न होते. माझ्या वडिलांना न्यूझीलंडमध्ये एका चांगल्या भविष्याची आशा दिसली आणि त्यांनी संपूर्ण कुटुंबाला स्थलांतरित केले, जेणेकरून मी क्रिकेटपटू बनण्याचे स्वप्न पूर्ण करू शकेल.'

रावलचा जन्म सप्टेंबर १९८८ मध्ये गुजरातमधील अहमदाबाद इथे झाला. तो विद्यानगर शाळेत शिकला. तिथे लहानपणी तो भारताचा विकेटकीपर-फलंदाज पार्थिव पटेल याच्यासोबत डावाची सुरुवात करायचा. त्याने गुजरातच्या १५ वर्षांखालील आणि १७ वर्षांखालील संघांकडूनही क्रिकेट खेळले आहे. २००४ मध्ये, वयाच्या १६ व्या वर्षी, तो आपल्या कुटुंबासह न्यूझीलंडमधील ऑकलंड इथे राहायला गेला.

न्यूझीलंडच्या देशांतर्गत क्रिकेटमधील सर्वात यशस्वी सलामीच्या फलंदाजांपैकी एक म्हणून रावलची ओळख होती. प्रथम श्रेणी कारकिर्दीत त्याने १६४ सामने खेळले आणि ३७.६६ च्या सरासरीने १०,४३२ धावा केल्या. म्हणजेच प्रथम श्रेणी क्रिकेटमध्ये त्याने १०,००० हून अधिक धावा केल्या आहेत. त्यात २४ शतके आणि ५० अर्धशतके आहेत. न्यूझीलंडमधील प्रमुख देशांतर्गत स्पर्धांपैकी एक असलेल्या प्लंकेट शील्डमध्ये त्याच्या नावावर ८,६६२ धावा आहेत.

आंतरराष्ट्रीय पातळीवर रावलने २०१६ ते २०२० या काळात न्यूझीलंडकडून २४ कसोटी सामने खेळले. ३९ डावांत त्याने १,१४३ धावा काढल्या, ज्यात एक शतक आणि सात अर्धशतके आहेत. त्याचा शेवटचा कसोटी सामना जानेवारी २०२० मध्ये ऑस्ट्रेलियाविरुद्ध पर्थ इथे झाला होता.

त्यानंतर म्हणजे २०२० पासून तो न्यूझीलंड संघात परतला नाही. राष्ट्रीय संघापासून सहा वर्षे दूर राहिल्यावर अखेर त्याने निवृत्त होण्याचा निर्णय घेतला आहे. तब्बल १८ वर्षांच्या प्रथम श्रेणी कारकिर्दीनंतर त्याने व्यावसायिक क्रिकेटमधून बाजूला होण्याची घोषणा केली आहे.