लिंबाच्या साली फेकू नका! घरच्या घरी बनवा चटपटीत लिंबाच्या सालींचा मसाला

जेवणाला चव यावी आणि खाल्लेले अन्न नीट पचावे म्हणून आपण जेवणात लिंबाचा रस पिळतो. त्यामुळे पदार्थाला चटपटीत चव येते आणि पचनालाही मदत होते. कोशिंबीर, चाट किंवा सॅलड तयार झाले की त्यावर आवर्जून लिंबू पिळले जाते. पण रस काढून झाल्यावर साली मात्र आपण सरळ फेकून देतो.

या साली फेकण्याऐवजी त्यापासून घरच्या घरी सोप्या पद्धतीने मसाला बनवता येतो. लिंबाच्या सालींपासून बनवलेला हा मसाला चिकन आणि फिशच्या मॅरिनेशनसाठी वापरता येतो. शिवाय पॉपकॉर्न, फ्रेंच फ्राईज आणि इतर स्नॅक्सवर टाकूनही खाता येतो. त्यामुळे पदार्थाची चव चटपटीत आणि मस्त लागते.

बाजारातून नेहमी विकतचे मसाले आणण्यापेक्षा घरी बनवलेला हा चटपटीत मसाला सगळ्यांना जास्त आवडेल. योग्य पद्धतीने बनवला तर तो महिनाभर व्यवस्थित टिकून राहतो. चला तर मग, लिंबाच्या सालींचा मसाला बनवण्याची सोपी कृती पाहू.

साहित्य म्हणून सुकवलेली लिंबाची साल, काळे मीठ, ऑरिगॅनो पावडर, सायट्रिक एसिड, साखर, भाजलेल्या जिऱ्याची पावडर, लाल तिखट पावडर आणि काळीमिरी लागते.

सर्वात आधी लिंबाची साल दोन ते तीन दिवस कडक उन्हात सुकवून घ्या. असे केल्याने मसाला जास्त दिवस व्यवस्थित टिकून राहतो. मसाला बनवताना साली अजिबात ओल्या ठेवू नका, कारण ओल्या सालींमुळे मसाला लवकर खराब होऊन जातो.

त्यानंतर मिक्सरच्या भांड्यात सुकवलेल्या लिंबाच्या साली, काळे मीठ, ऑरिगॅनो पावडर, सायट्रिक एसिड, साखर, भाजलेले जिरे आणि लाल तिखट पावडर घाला. हे सगळे जाडसर बारीक वाटून घ्या.

मसाला वाटून झाल्यावर तो मिक्सरमधून काढा आणि पूर्णपणे थंड होण्यासाठी ठेवा. थंड झाल्यावर मसाला वापरायला तयार आहे.

लिंबाच्या सालींचा हा मसाला फ्रेंच फ्राईज, पॉपकॉर्न, रोस्टेड मखाना, भाज्या किंवा कोणत्याही चटपटीत चाटवर टाकून खाता येतो. हा मसाला रोजच्या मसाल्यांपेक्षा चवीला वेगळा आणि चटपटीत लागतो.