कांदा-लसूण न वापरता कन्यापूजनासाठी बनवा रसरशीत बटाट्याची भाजी

नवरात्रीत कन्यापूजन केले जाते. या कन्यापूजनासाठी कांदा आणि लसूण न वापरता सात्त्विक जेवण बनवण्याची प्रथा असते. आता अनेकांना असा प्रश्न पडतो की, कांदा आणि लसणाशिवाय भाजीला चव कशी येणार किंवा जेवण बेचव होईल का. पण तसं नाहीये. ही भाजी योग्य प्रकारे केली तर नेहमीच्या भाजीपेक्षाही जास्त चवदार लागते. त्यासाठी फक्त रेसिपी नीट फॉलो करणे गरजेचे आहे. कांदा-लसूण न घालता बटाट्याची रसरशीत भाजी कशी करायची हे तुम्हाला माहिती नसेल, तर ही रेसिपी तुमच्या कामाची ठरेल.

योग्य मसाल्यांचा वापर केल्यामुळे भाजीला छान चव येते. टोमॅटोमुळे भाजीला छान रंग आणि आंबटसर चव मिळते. कन्यापूजनाच्या जेवणात पुरीसोबत ही बटाट्याची भाजी सर्व्ह करता येते.

साहित्य: २ चमचे तूप किंवा तेल, २ तेजपत्ता, १ मोठी वेलची, ५-७ काळी मिरी, १ चमचा अख्खी धणेपूड, १ चमचा बडीशेप, पाव चमचा हिंग, १ इंच आले, ३-४ हिरव्या मिरच्या, ३-४ मध्यम आकाराचे टोमॅटो आणि २-३ उकडलेले बटाटे.

याशिवाय अर्धा चमचा लाल तिखट, अर्धा चमचा धणेपूड, अर्धा चमचा भाजलेल्या जिऱ्याची पूड, १ चमचा आमचूर पूड, १ चमचा सैंधव मीठ, २ चमचे कोथिंबीर आणि दीड कप पाणी लागेल.

कृती: कांदा-लसणाशिवाय बटाट्याची रसरशीत भाजी करण्यासाठी सर्वात आधी गॅसवर एक कढई ठेवा आणि त्यात तूप गरम करा. त्यानंतर त्यात तेजपत्ता, काळी वेलची, काळी मिरी, जाडसर वाटलेली धणेपूड, बडीशेप आणि चिमूटभर हिंग घाला. सोबत बारीक चेचलेले आले आणि चिरलेली हिरवी मिरची घाला. हे सगळे साहित्य मंद आचेवर साधारण २ मिनिटे शिजू द्या.

त्यानंतर चिरलेले टोमॅटो घालून ५ मिनिटे शिजवा. टोमॅटो मऊ झाला की त्यात लाल तिखट, धणेपूड, भाजलेल्या जिऱ्याची पूड, आमचूर पूड आणि सैंधव मीठ घाला. मसाल्यांना चांगले तेल सुटले की उकडलेले बटाटे चिरून घाला.

आता गरजेनुसार पाणी घाला आणि वर झाकण ठेवून भाजी मंद आचेवर शिजू द्या. शेवटी चिरलेली कोथिंबीर घालून गॅस बंद करा. अशी ही रसरशीत बटाट्याची भाजी कन्यापूजनाच्या जेवणासाठी तयार होते.